މިދިޔަ ހަފްތާގައި ގދ. ތިނަދޫގައި ބޭއްވުނު މުޒާހަރާ ރޭވުމުގައި ބައިވެރިވި ބަންގްލަދޭޝްގެ މަސައްކަތްތެރިން ހައްޔަރުކޮށް އަނބުރާ ފޮނުވާލުމަށް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ނިންމި ނިންމުމާމެދު 3 ޖަމިއްޔާއަކުން ކަންބޮޑުވުން ފާޅުކޮށްފިއެވެ.

އެސޯސިއޭޝަން ފޯ ޑިމޮކްރަސީ އިން ދަ މޯލްޑިވްސް, ޕަބްލިކް އިންޓަރެސްޓް ލޯ ސެންޓަރ އަދި ޓްރާންސްޕޭރަންސީ މޯލްޑިވްސް އިން ނެރެފައިވާ ގުޅިފައިވާ ބަޔާނުގައި ބުނެފައިވަނީ އދ ގެ އިންސާނީ ހައްގުތަކުގެ އާންމު ގަރާރުގެ 20 ވަނަ މާއްދާގެ ދަށުންް, ކޮންމެ މީހަކަށްވެސް ސުލްހަވެރިކަމާއެކު އެއްވެއުޅުމާއި ޖަމްއިއްޔާ ހެދުމުގެ ހައްގުު ލިބިގެންވާ ކަމަށެވެ. މި ހައްގުތަކަކީ ދިވެހިރާއްޖޭގެ ގާނޫނުއަސާސީގެ ދެވަނަ ބާބުގައިވެސް ކަށަވަރުކޮށްފައިވާ ހައްގުތަކެކެވެ. އަދި ގާނޫނުއަސާސީގެ 32 ވަނަ މާއްދާއިން ކޮންމެ މީހަކަށް ދައުލަތުގެ ހުއްދައެއް ކުރިން ހޯދުމަކާނުލައި، ސުލްހަވެރިކަމާއެކު އެއްވެއުޅުމުގެ މިނިވަންކަން ލިބިދެއެވެ.

ޖަމިއްޔާގެ ބަޔާނުގައި ބުނެފައިވަނީ 25 ޖުލައި 2024 ގައިރާއްޖޭގެ ނޫހަކަށް ދެއްވި އިންޓަވިއުއެއްގައި މިނިސްޓަރ އަލީ އިޙްސާން ވިދާޅުވެފައިވަނީ، ބިދޭސީން "ސިޔާސީ ހަރަކާތް" ކުރުމުގައި ބައިވެރިވުމަކީ ވިސާއާ ހިލާފުވުން ކަމަށްވާތީ، މުޒާހަރާ އިންތިޒާމުކުރި ފަރާތްތައް އަނބުރާ ފޮނުވާލަންޖެހޭ ކަމަށެވެ. ގދ. ތިނަދޫގައި ބަންގްލަދޭޝްގެ މަސައްކަތްތެރިން ރޭވިސުލްހަވެރި މުޒާހަރާއަކީ ބަންގްލަދޭޝްގައި ހިނގަމުންދާ މުޒާހަރާތަކަށް އެއްބާރުލުން ދިނުމުގެ ގޮތުން ބޭއްވި މުޒާހަރާއެއް ކަމަށް ބަޔާނުގައި ބުނެފައިވެއެވެ.

އަދި ދިވެހިރާއްޖޭގެ ގާނޫނުއަސާސީން ލިބިދޭ އަސާސީ ހައްގެއް ނިގުޅައިގަންނަ ގޮތަށް ވިސާގެ ޝަރުތެއް ކަނޑައެޅުމަކީ ޤާނޫނާ ހިލާފު ކަމެއް ކަމަށާއި، މަސައްކަތްތެރިންނަށް ލިބިދޭ އަސާސީ ހައްގުތަކަށް ހުރަސްއަޅާ މިފަދަ ހަނިކުރުންތައް ބޭނުންކޮށްގެން ރާއްޖޭގެ އެއްވެސް ގާނޫނަކާއި ގަވައިދަކާއި ހިލާފުނުވާހާ ހިނދަކު ދިވެހިރާއްޖޭގައި ތިބޭ ބިދޭސީން ހައްޔަރުކޮށް, ވަޒީފާއިން ވަކިކޮށް އަނބުރާ ފޮނުވާލުމަކީ ކަންބޮޑުވުމެއް ކަމަށް ބުނެފައިވެއެވެ.

މި ޖަމިއްޔާތަކުން 3 ކަމަކަށް ގޮވާލާފައިވެއެވެ.

ދިވެހި ރާއްޖޭގެ މަސައްކަތު އާބާދީގެ 32 އިންސައްތައަަކީ ބިދޭސީިންނެވެ. ބިދޭސީން ރާއްޖޭގެެ މުޖުތަމައުުގައި މުހިންމު ދައުރެއް އަދާކޮށް ހުރިހާ ދާއިރާއެއްގައިވެސް ބޮޑެތި ހިިދުމަތްތަކެއްކޮށްދޭ ކަމަށް ޖަމިއްޔާތަކުން ބުނެފައިވެއެވެ. އަދި ދިވެހިރާއްޖޭގެ ގާނޫނުއަސާސީން ކޮންމެ މީހަކަށްވެސް ތަފާތުކުރުމަކާ ނުލައި، ޖަމްއިއްޔާތައް އުފެއްދުމުގެ ހައްގާއި، މުޒާހަރާ ކުރުމުގެ ހައްގާއި، ސުލްހަވެރިކަމާއެކު އެއްވެއުޅުމުގެ މިނިވަންކަން ކަށަވަރުކޮށްދޭ ކަމަށް ޖަމިއްޔާތަކުން ބުނެފައިވެއެވެ.

އަދި ދައުލަތާއި އެނޫންވެސް ފަރާތްތަކަށް ދިވެހިރާއްޖޭގައި ދިރިއުޅޭ ބިދޭސީންގެ މި އަސާސީ، ގާނޫނީ އަދި ބައިނަލްއަގްވާމީ އިންސާނީ ހައްގުތައް ކަށަވަރުކުރުމަށް މަސައްކަތްކުރުމަށް މި ތިން ޖަމިއްޔާއިން ވަނީ ގޮވާލާފައެވެ.