މި ސަރުކާރުގެ ފަރާތުން ބޮޑަށް ފެންނަނީ ބަހަނާ ދައްކާ މަންޒަރު: މެމްބަރު އަހުމަދުދީދީ
26 ޖުލައި 2024 | ހުކުރު 07:46އައްޑޫ ކަރަންޓުގެ މައްސަލައަށް ހައްލު ހޯދައިދިނުމަށް ޕަވަރ ހައުސްއެއް އިމާރާތް ކޮށްފައިވޭ
ނޫސްވެރިންގެ ބައްދަލުވުމުގައި ރައްޔިތުން މަޖިލީހުގެ މަރަދޫ ދާއިރާގެ މެންބަރު އަހުމަދުދީދީ ވާހަކަދައްކަވަނީ
މިސަރުކާރުގެ ފަރާތުން ބޮޑަށް ފެންނަނީ ޒިންމާއިން ރެކި ބަހަނާ ދައްކާ މަންޒަރު ކަމަށް ރައްޔިތުން މަޖިލީހުގެ މަރަދޫ ދާއިރާގެ މެންބަރު އަހުމަދުދީދީ ވިދާޅުވެއްޖެއެވެ.
ބުދަ ދުވަހު ރައްޔިތުންގެ މަޖިލީހުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޕީޖީ ގުރޫޕުން ބޭއްވި ނޫސްވެރިންގެ ބައްދަލުވުމުގައި މެމްބަރު ވަނީ އައްޑޫސިޓީގެ ކަރަންޓަށް ދިމާވެފައިވާ މައްސަލައަށް އަލިއަޅުއްވާލައްވާ ވާހަކަދައްކަވާފައެވެ. އައްޑޫގެ ކަރަންޓުގެ މައްސަލަ ހައްލު ކުރުމަށް މަސައްކަތް ކުރުމުގެ ބަދަލުގައި ފެނިގެންދަނީ ކުރީ ސަރުކާރު ކުށްވެރިކުރަން އުޅޭ މަންޒަރު ކަމަށް މެމްބަރު ވިދާޅުވިއެވެ.
މެމްބަރު ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އައްޑޫސިޓީގެ ކަރަންޓުގެ މައްސަލައަށް ހައްލު ހޯދައިދިނުމަށް ބޮޑު ހަރަދެއްގެ ކޮށްގެން ޕަވަރ ހައުސްއެއް އިމާރާތް ކޮށްފައިވާ ކަމަށާއި، މިސަރުކާރުން އެތަނަށް ބޭނުންވާ ޖަނަރޭޓަރާއި، ވަސީލަތްތައް ގާއިމްކޮށް ރައްޔިތުންނަށް ބޭނުންވާ ޚިދުމަތްތައް ފޯރުކޮށްދޭން ޖެހޭ ކަމަށެވެ.
މެމްބަރު ވިދާޅުވީ ރައްޔިތުންނަށް އެކަށީގެންވާ ޚިދުމަތް ދޭންޖެހޭ ކަމަށާއި، ކުރީ ސަރުކާރު ކުރީ ސަރުކާރު ކިޔުން ހުއްޓާލަން ޖެހޭ ކަމަށެވެ. ކުރީ ސަރުކާރު ނުކިޔާނެ ކަމަށް ބުނެ އައި ސަރުކާރަކުން އަބަދު ކުރީ ސަރުކާރު ކުށްވެރިކުރާ އުސޫލުން ވާހަކަތައް ދެއްކުމަކީ ރައްޔިތުން ބަލައިގަންނާނެ ކަމެއް ނޫން ކަމަށް މެމްބަރު ވިދާޅުވިއެވެ.
