އެއްލާލި ދަބަހަކުން ބަނގުރާ ދަޅުތަކެއް ފެނުނު މައްސަލައާ ގުޅިގެން ދެ ދިވެހިން ހައްޔަރުކޮށްފިއެވެ.
ފުލުހުން ބުނީ ބަނގުރާ ދަޅުތަކަކާއެކު ހުޅުމާލެއިން ދެ މީހަކު ހައްޔަރުކޮށްފައިވާ ކަމަށާއި، ބުރާސްފަތި ދުވަހުގެ ހެނދުނު ހައްޔަރުކޮށްފައިވަނީ 29 އަހަރުގެ ފިރިހެނަކާއި 38 އަހަރުގެ ފިރިހެނެއް ކަމަށެވެ.
ފުލުހުން ބުނީ ހުޅުމާލެ ފޭސް 1 ގެ ފުލުހުން ރަށުތެރެ ޕެޓްރޯލުކުރަމުން ދިޔައިރު ހުޅުމާލެ ބީޗު ކުލަބް ކައިރިން ދެ މީހަކު ދަބަހެއް އެއްލައިލާފައި ދާކަމަށް ލިބުނު މައުލޫމާތަކާ ގުޅިގެން އެ ދެ މީހުން ހުއްޓުވައި ސުވާލުކޮށްފައިވާ ކަމަށެވެ. އަދި އެ ދެ މީހުން އެއްލައިލި ދަބަސް ބަލައިފާސްކުރިއިރު 27 ދަޅު ބަނގުރާ ފެނިފައިވާ ކަމަށް ފުލުހުން ބުނެއެވެ.
މި މައްސަލަ ހުޅުމާލެ ފޭސް 1 ޕޮލިސް ސްޓޭޝަނުން ގެންދަނީ ތަހުގީގު ކުރަމުންނެވެ.
މިފަހުން ހުޅުމާލެއިން މަސްތުވާތަކެއްޗާއި، ގިނަ އަދަދެއްގެ ދަޅު ބަނގުރާ އަތުލައިގަނެފައިވެއެވެ. އަދި ހުޅުމާލެ ބީޗް ސަރަހައްދުގައި ހުސްކުރި ބަނގުރާ ދަޅާއި، ފުޅި ހުންނަ ކަމުގެ ޝަކުވާ އާއްމު ރައްޔިތުން ދަނީ ކުރަމުންނެވެ.
