އައްޑޫގައި ބޮޑު އިގްތިސާދެއް ގާއިމްކުރުމަށް ކުރީ ސަރުކާރުން ގިނަ މަސައްކަތްތައް ކޮށްފައިވޭ، ނަމަވެސް މިހާރު ވަނީ މަސައްކަތްތައް ހުއްޓިފައި: މޭޔަރު ނިޒާރު

އައްޑޫ ސިޓީގައި ބޮޑު އިގްތިސާދެއް ގާއިމްކުރުމަށް ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ގިނަ މަސައްކަތްތައް ކޮށްފައިވާ ކަމަށާއި، މިސަރުކާރުން މިހާތަނަށް އަދި އެއްވެސް މަސައްކަތެއް ކޮށްފައިނުވާ ކަމަށް އައްޑޫ ސިޓީ މޭޔަރު އަލީ ނިޒާރު ވިދާޅުވެއްޖެއެވެ.

ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަމުން މޭޔަރު ނިޒާރު ވިދާޅުވީ އެމްޑީޕީގެ ވެރިކަމުގައި އައްޑޫ ސިޓީ ތަރައްގީ ކުރުމަށް ބޮޑެތި ހޭދަތަކެއް ކޮށްފައިވާ ކަމަށެވެ.

އެ މަޝްރޫއުތަކުގެ ދަށުން އައްޑޫގެ އެއާޕޯޓު އިތުރަށް ތަރައްގީ ކުރުމުގެ މަސައްކަތް ފަށާއި، އައްޑޫގެ މަގުތައް ޒަމާނާ އެއްގޮތަށް ތަރައްގީ ކުރެވި، ފެނާއި ނަރުދަމާގެ ނިޒާމު ގާއިމް ކުރެވިފައިވާ ކަމަށް މޭޔަރު ނިޒާރު ވިދާޅުވިއެވެ. އަދި ވިދާޅުވީ ބިމުގެ ދަތިކަން ކުރިމަތިވެފައިވާތީ ބޮޑު ބިމެއް ވެސް މި ދިޔަ ސަރުކާރުން ހިއްކާދީފައިވާ ކަމަށެވެ.

ސަރުކާރު ބަދަލުވެގެންދިޔަ ފަހުން މިއަދާ ހަމައަށް ރައީސް ޑރ.މުހައްމަދު މުއިއްޒުގެ ސަރުކާރުން އެއްވެސް މަސައްކަތެއް ކޮށްފައިނުވާކަން ފާހަގަކުރައްވައި މޭޔަރު ނިޒާރު ވިދާޅުވީ އައްޑޫ ތަރައްގީ ކުރުމުގެ ހެޔޮ ނިޔަތުގައި އެ މަސައްކަތްތައް ކުރިއަށް ގެންދަންޖެހޭ ކަމަށެވެ. އަދި މުޅިން އައު މަޝްރޫއުތަކެއް ފަށަން ނުޖެހޭ ކަމަށް އޭނާ ވިދާޅުވިއެވެ.

ހަންކެޑެ މަޝްރޫއާ ގުޅޭގޮތުން މޭޔަރު ނިޒާރު ވިދާޅުވީ މިމަޝްރޫއުގެ މަސައްކަތް ވެސް ކުރިއަށް ނުދާ ކަމަށެވެ. ނަމަވެސް މިއީ މުޅި ރާއްޖޭގެ ތަރައްގީއާ ގުޅިފައިވާ ބޮޑު މަޝްރޫއެއް ކަމަށް މޭޔަރު ނިޒާރު ވިދާޅުވިއެވެ.

އައްޑޫ ސިޓީގެ ފަތުރުވެރިކަމަށް އިންގިލާބީ ބަދަލެއްގެ ގެނެސްދޭ މަޝްރޫއެއް ކަމަށްވާ ހަންކެޑެ މަޝްރޫއުގެ އެއްބަސްވުމުގައި ސޮއިކޮށްފައިވަނީ 30 މާޗް 2023ގައެވެ.

142.9 މިލިއަން ޑޮލަރުގެ މި މަޝްރޫއުގެ ދަށުން އައްޑޫ ސިޓީގެ ހަންކެޑެގައި ޖުމްލަ 2082 އެނދު ހިމެނޭގޮތަށް 1041 ކޮޓަރި ތަރައްގީކުރުމަށް ވަނީ ހަމަޖެހިފައެވެ. މީގެ ތެރޭގައި 2 ގްރޭންޑް ހޮޓެލް، 2 ޑިލަކްސް ހޮޓެލް، 10 ބުޓީކް ހޮޓެލް، 17 ބީޗް ވިލާ، އަދި 64 ސަރވިސްޑް އެޕާޓްމަންޓުގެ އިތުރުން ރެސްޓޯރެންޓްތަކާއި، ޝޮޕިންގް އޭރިއާތަކާއި، ވޯޓަރ ޕާކަކާއި، ކުޅިވަރުކުޅުމާއި މުނިފޫހިފިލުވުމުގެ ވަސީލަތްތައް ތަރައްގީކުރާނެއެވެ.

މި މަޝްރޫއާއެކު ގިނަ ވަޒީފާތަކެއް އުފެދި، އިގުތިސާދީ ގޮތުން ބޮޑު ކުރިއެރުމެއް އައްޑޫސިޓީއަށް ލިބޭނެ އެވެ.