ފަތަހް އާއި ހަމާސް އިން ގައުމީ އެއްބައިވަންތަ ކަމުގެ އެއްބަސްވުމެއްގައި ސޮއިކޮށްފި

ފަލަސްތީނުގެ އެންމެ ބޮޑު ވާދަވެރި ދެ ޖަމާއަތް ކަމަށްވާ ފަތަހް އާއި ހަމާސް އިން ގައުމީ އެއްބައިވަންތަ ކަމުގެ އެއްބަސްވުމެއްގައި ސޮއިކޮށްފިއެވެ.

މިއީ އިޒްރޭލުން ގާޒާ ގައި ހިންގާ ހަނގުރާމަ ނިމުމަކަށް އައުމަށް ފަހު ގާޒާ ފަލަސްތީނުގެ ކޮންޓްރޯލްގެ ދަށުގައި ބޭއްވުމަށް ދެ ފަރާތުން ގުޅިގެން މަސައްކަތް ކުރުމަށް ވީ އެއްބަސްވުމެއް ކަމަށް އޭއެފްޕީން ބުނެފައިވެއެވެ.

ޗައިނާ އިން މެދުވެރިއެއްގެ ދައުރު އަދާކުރި ވާހަކަތަކުގައި އަންގާރަ ދުވަހު އެއްބަސްވުމަކަށް އާދެވުނީ ތިން ދުވަހުގެ މުއްދަތައް ފުޅާދާއިރާއެއްގައި ކުރެވުނު މަޝްވަރާތަކަށް ފަހުގައި ކަމަށް ޗައިނާގެ ޚާރިޖީ ވަޒީރު ވޮންގް ޔީ ވިދާޅުވިއެވެ.

ގައުމީ އެއްބައިވަންތަ ކަމުގެ ވަގުތީ ސަރުކާރެއް އެކުލަވާލުމަށް ހަމާސް އާއި ފަތަހް ޖަމާއަތުން ސޮއި ކުރިއިރު ފަލަސްތީނުގެ އިތުރު އެހެން ބާރަ ގްރޫޕަކުންވެސް އެއްބަސްވުމުގައި ބައިވެރިވެ ސޮއިކޮށްފައިވެއެވެ.

ހާމާސް އާއި ފަތަހް ޖަމާއަތުން މީގެ ކުރިންވެސް އެއްބައިވަންތަ ކަމުގެ އެއްބަސްވުން ތަކުގައި ސޮއި ކޮށްފައި ވީނަމަވެސް، ވާދަވެރިކަން ބޮޑު މި ދެ ޖަމާއަތުން އެ އެއްބަސްވުންތަކަށް އަމަލު ކޮށްފައި ނުވާކަން ފާހަގަ ކުރެވެއެވެ.

އަނެއްކޮޅުން އިޒްރޭލުން ބުނެފައިވަނީ ހަނގުރާމައިގެ ފަހުން ވެސް ގާޒާ ހިންގުމުގައި ފަތަހް އަށްވެސް ހަމާސް އަށްވެސް އެއްވެސް ދައުރެއް ނުދޭނެ ކަމަށެވެ.

ފަތަހް އާއި ހަމާސް ގެ ގުޅުން އެންމެ ބޮޑަށް ހީނަރު ވެގެން ދިޔައީ 2007 ވަނަ އަހަރު ހަމާސް ޖަމާއަތުން އެކަނި ގާޒާ ހިންގަން ފެށި ހިސާބުންނެވެ. އޭރު ހަމާސް އިން ވަނީ ބާރުގެ ބޭނުން ކޮށްގެން ގާޒާ އިން ފެޔަށް ފަތަހް ޖަމާއަތް ޖައްސާފައެވެ.

2006 ވަނަ އަހަރު ފަލަސްތީނުގެ އިންތިޚާބު ހަމާސް އިން ކާމިޔާބު ކުރުމާއެކު ހަމާސް އިން އިސްވެ އުފައްދާފައި އޮތް ގުޅިފައިވާ އިއްތިހާދުގެ ސަރުކާރު ފަލަސްތީނުގެ ރައީސް އަދި ފަތަހް ޖަމާއަތުގެ ވެރިޔާ މަހްމޫދު އައްބާސް އުވާލެއްވި ހިސާބުން، ގާޒާ ގެ ކޮންޓްރޯލް ފަތަހް ޖަމާއަތައް ގެއްލި، ފަތަހް ޖަމާއަތުގެ ބާރު އޮންނަ ފަލަސްތީނު ސަރުކާރުގެ ކޮންޓްރޯލް ހުޅަނގު އައްސޭރީގެ ބައެއް ސަރަހައްދުތަކަށް އެކަނި އޮންނަ ގޮތައް ހަނިވެގެން ދިޔައެވެ.

އަނެއްކޮޅުން އޮކްޓޯބަރ 7 ގައި އިޒްރޭލް ސިފައިން ގާޒާ އަށް އަރާ ހިންގަންފެށި ނުރައްކާތެރި ހަނގުރާމަ އާ އެކު ހަމާސްގެ ފުރިހަމަ ކޮންޓްރޯލް ގާޒާ އިން ގެއްލިގެން ދިޔަކަން ވަނީ ފާހަގަ ކުރެވިފައެވެ.

ބެއިޖިންގައި ސޮއިކުރި އެއްބަސްވުމާ ބެހޭ ގޮތުން ހަމާސްގެ ތަރުޖަމާނު ހުސާމް ބަދްރަން ޓެލެގްރާމް ގައި އާންމު ކުރި ބަޔާނުގައި ބުނެފައިވަނީ މި މުއާހަދާ އަކީ ފަލަސްތީނުގެ އެއްބައިވަންތަ ކަމަށް ކުރިއަށް އެޅުނު ރަނގަޅު އިތުރު ފިޔަވަޅެއް ކަމަށެވެ.

ބަޔާނުގައި ބުނެފައިވަނީ، މި އެއްބަސްވުމުގެ އެންމެ މުހިންމު ކަމަކީ ގާޒާ އާއި ހުޅަނގު އައްސޭރީގައި ހުރިހާ ފަރާތަކުން ގުޅިގެން އެއްބައިވަންތަ ކަމުގެ ވަގުތީ ސަރުކާރެއް އުފައްދާ، އައު ސަރުކާރުގެ ބެލުމުގެ ދަށުން ގާޒާ އަލުން އާރާސްތު ކުރުމުގެ މަސައްކަތް ބަލަހައްޓާ އައު އިންތިޚާބަކަށް ތައްޔާރުވުމަށް ކުރަންޖެހޭ މަސައްކަތް ކުރުން ކަމަށެވެ.

ޗައިނާގައި ފަލަސްތީނުގެ ޖަމާއަތްތައް ގުޅިގެން ވީ އެއްބަސްވުމަށް އިހްތިރާމް ނުކުރާނޭ ކަމަށް އިޒްރޭލުގެ ޚާރިޖީ ވަޒީރު ކަޓްޒް އެކްސް ގައި ކުރި ޕޯސްޓެއްގައި ބުނެފައިވެއެވެ.