ދިޔަވަރު ބޮޑުވާ ގަޑިތަކުގައި އުދައެރުން އެކަށީގެންވޭ، ސިނަމާލެ ބްރިޖުން ދަތުރުކުރާއިރު ސަމާލުވޭ
ގެދޮރުގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އަޅަންޖެހޭ
ހައިވޭ އަށް އުދަ އަރާފައި
ދިޔަވަރު ބޮޑުވާ ގަޑިތަކުގައި އުދައެރުން އެކަށީގެންވާތީ ސިނަމާލެ ބްރިޖާއި ހައިވޭގައި ދަތުރުކުރާ މީހުން ސާމަލުވުމަށް ފުލުހުން އިލްތިމާސްކޮށްފިއެވެ.
ފުލުހުން ބުނީ ކ. އަތޮޅުން ފެށިގެން އައްޑޫ ސިޓީގެ ރަށްރަށަށް އުދަ އެރުމުގެ ފުރުސަތު އޮތްކަމަށް މެޓް އޮފީހުން ލަފާކޮށްފައިވާ ކަމަށެވެ. އަދި ސިނަމާލެ ބްރިޖާއި ހައިވޭގައި ދަތުރުކުރާ ފަރާތްތަކުން ސަމާލުވާންޖެހޭ ކަމަށް ފުލުހުން ބުނެއެވެ.
ފުލުހުން ބުނީ ރަށްރަށުގައި ވެސް ގޮނޑުދޮށާ ކައިރި ހިސާބުތަކުގައި ދިރިއުޅޭ ފަރާތްތަކުން މުދަލާއި ގެދޮރުގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އަޅަންޖެހޭ ކަމަށެވެ.
އާދިއްތަ ދުވަހުގެ މެންދުރުފަހު ބްރިޖާއި އެއާޕޯޓަށްދާ ޓްރެފިކް ލައިޓް ސަރަހައްދު އަދި ހައިވޭއަށް ވަނީ ވަރަށް ބޮޑަށް އުދަ އަރާފައެވެ. އެސަރަހައްދުން ވެހިކަލްތައް ދުއްވުމަށް ދަތިވެ ވަރަށް ބޮޑަށް ޓްރެފިކް ވެގެންދިޔައެވެ.
މީގެ އިތުރުން ނެޝެނަލް ޑިޒާސްޓާ މެނޭޖްމެންޓް އޮތޯރެޓީ (އެންޑީއެމްއޭ)އިން ބުނީ އުދައެރުމުން ލިބޭ ގެއްލުންތަކުން ރައްކާތެރިވުމަށް ފިޔަވަޅުތައް އަޅަންޖެހޭ ކަމަށެވެ.
އެގޮތުން ގެއަށް ފެން ނުވަންނާނެހެން ރައްކާތެރި ފިޔަވަޅު އެޅުމާއި، މިގޮތުން ކުރިމަތީ ވެލިބަސްތާ ފަދަ ތަކެތި ޖެއްސުމާއި، ގޭތެރޭގައި ފެންބޮޑުވެއްޖެ ހިނދެއްގައި ގެއްލުންވާނެ މުދާ ފެން ނުޖެހޭ ފަދަ އުސްތަންތަނަށް ބަދަލުކުރުމާއި، އުސް ތަންތަނަށް ބަދަލު ނުކުރެވޭ ތަކެތި ފެނުގެ އަސަރު ނުފޯރާނެ ތަނަކަށް ބަދަލުކުރުމާއި، ބަނދަރުގައި އަޅާފައިވާ އޮޑި ދޯނި ފަހަރުގެ ވައު ކަނޑައިގެން ނުދާނެ ފަދައަކުން އެއްސުމަށް އެދިފައިވެއެވެ.
ކުރިމަތިވެދާނޭ އާއްމު ސިއްހީ މައްސަލައަކުން ސަލާމަތްވުމަށް އުދައާއި އެކު ރަށުތެރެއަށް ފެތުރޭ ކުނިބުނި އަވަހަށް ސާފު ކުރުމަށް ސަމާލުވުމަށް ވެސް އެންޑީއެމްއޭއިން ވަނީ އެދިފައެވެ.
ދިޔަވަރު ބޮޑުވާ ގަޑިތަކުގައި އުދައެރުން އެކަށީގެންވާ ކަމަށް މޫސުމާބެހޭ ގައުމީ އިދާރާއިން ބުނެފައިވާއިރު، ކުރިއަށް އޮތް 24 ގަޑީއިރު ބައެއް ރަށްތަކަށް ކެރީގެ އަސަރުކޮށް ގުގުރުން އެކަށީގެންވޭއެވެ. ހުޅަނގުދެކުނާއި ހުޅަނގުން ގަޑިއަކު 05 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށް އެ އިދާރާއިން ބުނެއެވެ.
ރާޅުގެ އުސްމިނުގައި 4 ނުވަތަ 2 ފޫޓު ހުންނާނެ އެވެ. އާދައިގެ ވަރަކަށް ކަނޑު މަޑުވި ނަމަވެސް ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުން އެކަށީގެންވާ ކަމަށް މޫސުމާބެހޭ ގައުމީ އިދާރާއިން ބުނެއެވެ.
