ސްޕޭން ކީޕަރަށް ސީޒަނުގެ ބޮޑުބައެއްގައި ނުކުޅެވިދާނެ

ސްޕޭނުގެ ގައުމީ ޓީމުގެ ކީޕަރު އުނާއީ ސިމޮން އަށް ކުރިއަށް އޮތް ސީޒަނުގެ ބޮޑު ބައެއްގައި ނުކުޅެވިދާނެ ކަމުގެ ބިރު ހީވެއްޖެ އެވެ.

ސްޕޭނަށް ޔޫރޯ ފުޓްބޯޅަ މުބާރާތް ކާމިޔާބުކޮށްދިން ކީޕަރުގެ އަތުގެ ކުޑަހުޅުގެ ކަށިކޮޅެއް ބިންދައިގެން ދިއުމުން މިހާރު ވަނީ އޮޕަރޭޝަންކޮށްފަ އެވެ. މި އޮޕަރޭޝަނަށް ފަހު އޭނާ ހޮސްޕިޓަލުން ދޫކޮށްލާފައިވީ ނަމަވެސް އަނިޔާ އެއްކޮށް ރަނގަޅުވެގެން ކުޅެން ނުކުތުމަށް ހަތަރު މަސް ހޭދަވާނެ ކަމަށް ވެ އެވެ. އެއީ އެންމެ ކުރު މުއްދަތެވެ. އަތުގެ ކަށިކޮޅު ބައްދަން ބޯލްޓް ޖަހާފައިހުރުމާއެކު މުޅިން ރަނގަޅުވާން ހަ މަސް ދުވަސް ހޭދަވުން ވެސް އެކަށީގެންވެ އެވެ.

މިހެންވެއްޖެނަމަ އޭނާ އަށް ކުޅެން ނުކުމެވޭނީ 2025 ވަނަ އަހަރުގެ ކުރީކޮޅު އެވެ. އަދި މި މުއްދަތުގައި ގައުމީ ޓީމުގެ ހަ މެޗެއް ގެއްލުން ވެސް އެކަށީގެންވެ އެވެ. އެހެންނޫނަމަ އޭނާ އަށް ގެއްލޭނީ ގައުމީ ޓީމުގެ ހަތަރު މެޗެކެވެ.

އޭނާގެ ކުލަބު ކަމަށްވާ އެތްލެޓިކް ކުލަބުން ވަނީ މިހެންވެ ޓީމުގެ އެއްވަނަ ކީޕަރަކަށް ޗެލްސީގެ ކީޕަރު ކެޕާ އަރިޒަބަލަގާ ގެނައުމަށް މަސައްކަތް ކުރަމުންނެވެ. ސްޕޭނަށް އުފަން ކެޕާ ނިމިދިޔަ ސީޒަނުގައި ކުޅުނީ ލޯނު އެއްބަސްވުމެއްގެ ދަށުން ރެއާލް މެޑްރިޑަށެވެ. ނަމަވެސް އެއްވަނަ ކީޕަރު ބެލްޖިއަމްގެ ތިބައޫ ކޯޓުއާ އަނިޔާއިން ރަނގަޅުވެގެން އައުމާއެކު ރެއާލްގެ ކީޕަރުންގެ ތެރޭގައި އުފެދުފައިވާ ވާދެވެރިކަމުގެ ސަބަބުން އެކުލަބުން ވަނީ ކެޕާގެ ކޮންޓްރެކްޓް ދާއިމީ ނުކުރަން ނިންމައިފަ އެވެ.