މާލެ ސިޓީ ކައުންސިލާއި އެންޑީއެމްއޭ ގުޅިގެން މުޖުތަމައު ވިލުންތެރި ކުރުމުގެ ހަރަކާތެއް ފަށައިފި

މަލޭ ސިޓީ ކައުންސިލާއި ނޭޝަނަލް ޑިޒާސްޓަރ މެނޭޖްމަންޓް އެންޑީއެމްއޭ ގުޅިގެން މުޖުތަމައު ވިލުންތެރިކުރުމުގެ ގޮތުން މޭކިން ސިޓީސް ރެސިލިއެންސް 2030 (އެމްސީއާރު 2030)ގެ ނަމުގައި ޚާއްސަ ހަރަކާތެއް ފަށައިފިއެވެ.

ސިޓީ ކައުންސިލުން ބުނީ މި މަސައްކަތުގެ މަޤްސަދަކީ، ދިމާވާ ކާރިސާތަކަށް އިޖާބަ ދިނުމުގެ ގާބިލްކަން އިތުރުކުރުން ކަމަށެވެ. މީގެ އިތުރުން މުޖުތަމައުގެ ބައިވެރިވުމާއެކު އެ ކަމުން އަރައިގަތުމަށް ކުރާ މަސައްކަތް އެއް ނިޒާމެއްގެ ދަށުން ކުރުމަކީ ވެސް މި ހަރަކާތުގެ މަޤްސަދެއް ކަމަށް ބުނެފައިވެއެވެ. އެގޮތުން މާލޭގައި ކާރިސާއެއް ހިނގުމަށް މެދުވެރިވެދާނެ ކަންކަމާއި، ކާރިސާތަކުން އަރައިގަތުމަށް މާލޭގައި ހުރި ވަސީލަތްތައް އަދި ވިލުންވެރިކަން ހުރި މިންވަރު ބަލާނެ އޮނިގަނޑަކާއި ޕްލޭނެއް ތައްޔާރު ކުރުމަށް ހަމަޖެހިފައިވާ ކަމަށް ސިޓީ ކައުންސިލުން ވަނީ ބުނެފައެވެ.

އެ ޕްލޭންގެ ސަަބަބުން ކާރިސާއަކުން ލިބިދާނެ ގެއްލުންތައް ކުރިއާލާ ދެނެގަނެވޭނެ ކަމަށާއި ގެއްލުން ކުޑަކުރުމަށް އަޅަންޖެހޭ ފިޔަވަޅުތައް އެނގިގަނެވޭނެ ކަމަށް ވެސް މި ދެ ފަރާތުން ފާހަގަކުރެއެވެ. މި ހަރަކާތުގެ ދަށުން އެކުލަވާލާ އެކްޝަން ޕްލޭންގައި އިންފްރާންސްޓްރަކްޗަރ ފަރުމާކުރުމާއި ދިރިއުޅުމާއި މުޖުތަމައުގެ ސަލާމަތަށް ދެމެހެއްޓެނިވި އިންވެސްޓްމަންޓްތައް ކަށަވަރުކޮށްދޭ އުސޫލެއް ކަނޑައެޅުމަށް ވަނީ ހަމަޖެހިފައެވެ. މާލެ ސިޓީ ކައުންސިލްގެ މޭޔަރ އާދަމް އާޒިމް ވަނީ މުޖުތަމައުގެ ހިރާސް ކުޑަކުރުމަށް އެކުގައި ތަރުތީބުން މަސައްކަތް ކޮށްގެން މަސައްކަތްކުރަމުން ދަނީ މާލެ ސިޓީއާއި އެ ސިޓީގެ ރައްޔިތުންގެ ދުޅަހެޔޮކަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް ކަމަށް ވިދާޅުވެފައެވެ.

އަދި އެންޑީއެމްއޭގެ ޗީފް އެގްޒެކެޓިވް ހިސާން ވިދާޅުވީ، މި މަސައްކަތުގެ ސަބަބުން މުޖުތަމައު ވިލުންތެރި ކުރުމަށް ބޭނުންވާ ވަސީލަތްތަކާއެކު، ކުރިއަށް ހުރި ގޮންޖެހުންތަކުން ސަލާމަތްވެ ހިމާޔަތް ކަށަވަރު ކުރެވޭނެ ކަމަށެވެ.

އެމްސީއާރު 2030ގެ ދަށުން އަންނަ އާދިއްތަ ދުވަހު ޓެކްނިކަލް ތަމްރީނު ޕްރޮގްރާމެއް ފެށުމަށް ވަނީ ނިންމާފައެވެ.