ދުނިޔޭގެ ފުޓްބޯޅަ ޖަމިއްޔާ ފީފާއިން ނެރޭ ދުނިޔޭގެ ފުޓްބޯޅަ ރޭންކިންގެ އެއްވަނަ އާޖެންޓީނާ އަށް ދީފި އެވެ.
ކޮޕާ އެމެރިކާގެ އެންމެ ފަހުގެ ދެ އަހަރުގެ ޗެމްޕިއަނުންނަށް އެއްވަނަ ލިބުނީ 1901 ޕޮއިންޓާއެކުގަ އެވެ. ދެ ވަނާގައިވަނީ މި ފަހަރުގެ ޔޫރޯގެ ސެމީ ފައިނަލުން ކެޓި ފްރާންސެވެ. އެ ގައުމަށް ލިބިފައިވަނީ 1854 ޕޮއިންޓެވެ. ތިން ވަނާގައިވަނީ އެއްވެސް މެޗަކުން ބަލިވެ ޔޫރޯގެ ޗެމްޕިއަންކަން ހޯދި ސްޕޭނެވެ. އެ ގައުމަށް ލިބިފައިވަނީ 1835 ޕޮއިންޓެވެ. ކުރިން ސްޕޭން އޮތީ އަށް ވަނާގަ އެވެ. ކުރިން ފަސް ވަނާގައި އޮތް އިނގިރޭސި ވިލާތް ވަނީ ހަތަރު ވަނަ އަށް ކުރިއަސް ޖެހިލައިފަ އެވެ. ޔޫރޯ ފައިނަލް ކުޅުނު އިނގިރޭސިނަށް ލިބިފައިވަނީ 1812 ޕޮއިންޓެވެ.
މަޝްހޫރު ބްރެޒިލް ލައްވާނީ ފަސް ވަނާގަ އެވެ. މިއީ އެއް ދަރަޖައިގެ ވެއްޓުމެކެވެ. މި ފަހަރުގެ ކޮޕާ އެމެރިކާގެ ދެ ވަނަ ބުރުން މުބާރާތުން ކެޓި ގައުމަށް ލިބިފައިވަނީ 1785 ޕޮއިންޓެވެ.
ގަދަ 10ގައި ދެން ހިމެނުނީ ބެލްޖިއަމާއި ނެދަލޭންޑްސް އަދި ޕޯޗުގަލް އާއި ކޮލަމްބިއާ އާއި އިޓަލީ އެވެ. މީގެ ތެރެއިން ހަ ވަނާގައިއޮތް ބެލްޖިއަމަކީ ކުރިން ރޭންކިންގެ ތިން ވަނަ ގައުމެވެ. ނެދަލޭންޑްސް ކުރިން ވެސް އޮތީ ހަތް ވަނާގަ އެވެ. ކުރިން ހަ ވަނާގައި އޮތް ޕޯޗުގަލް އަށް ވަނަ އަށް ވެއްޓުނުއިރި ކޮޕާ އެމެރިކާގެ ފައިނަލް ކުޅުނު ކޮލަމްބިއާ ކުރިން އޮތީ 12 ވަނާގަ އެވެ.
އިޓަލީގެ މަގާމަށް ބަދަލެއް ނާދެ އެވެ. ނަމަވެސް ކުރިން ނުވަ ވަނާގައިއޮތް ކްރޮއޭޝިޔާ މި ފަހަރު ލައްވާލީ 12 ވަނާގަ އެވެ. ޖަރުމަނު ވަނީ 16 ވަނައިން 13 ވަނަށް އަރައިފަ އެވެ. ރޭންކިންގައި މި ފަހަރު އެންމެ ބޮޑު ކުރިއެރުމެއް ލިބުނީ ވެނެޒުއޭލާ އަށެވެ. އެ ގައުމު 17 ދަރަޖަ ކުރިއަށްދިޔަ އެންމެ ގިނަ ޕޮއިންޓް ހޯދި ޓީމަކީ ސްޕޭނެވެ. މިދިޔަ މަހުގެ ރޭންކިން އާއި މި ފަހަރުގެ ރޭންކިންއާ ދެމެދު ސްޕޭން ވަނީ 105.75 ޕޮއިންޓް ހޯދައިފަ އެވެ. އެންމެ ބޮޑު ވެއްޓުމެއް ކުރިމަތިވީ ޗެކްރިޕަބްލިކަށެވެ. އެ ގައުމު ވަނީ ޖުމުލަ 13 ދަރަޖަ ފަހަތަށް ވެއްޓިފަ އެވެ.
