މައިންޒް އިން ސޮއިކުރުވި ޖަޕާން މިޑްފީލްޑަރ ކްލަބާ ގުޅުމުގެ ކުރިން ފުލުހުން ހައްޔަރުކޮށްފި

މައިންޒް އިން ސޮއިކުރުވި ޖަޕާން މިޑްފީލްޑަރ ކައިޝޫ ސާނޯ ކްލަބާ ގުޅުމުގެ ކުރިން ފުލުހުން ހައްޔަރުކޮށްފި އެވެ.

ޖަރުމަނުގެ ބުންޑަސްލީގުގެ މައިންޒް އިން ބުނީ މީޑިޔާ ތަކުން އެޚަބަރު ލިބުމުން ހައިރާންކަމެއް ލިބިފައިވާ ކަމަށެވެ. އަދި އެކަމުގެ ތަފްސީލް ނުލިބޭ ކަމަށް ކްލަބުން ބުންޏެވެ. އެކަމަކު ޖަޕާނު ގައުމީ ޓީމްގައިވެސް ހިމެނޭ ޑިފެންސިވް މިޑްފީލްޑަރު ހައްޔަރުކޮށްފައި މިވަނީ ކްލަބާ ގުޅެން ޖަރުމަނަށް ދިއުމަށް ދެ ދުވަހަށް ވެފައި ވަނިކޮށެވެ. އާދިއްތަ ދުވަހު އޭނާ ކްލަބާ ގުޅެން ޖެހޭނެ އެވެ. މައިންޒް އިން ސާނޯގެ ސޮއި ހޯދީ ޖުލައި 3 ވަނަ ދުވަހު އެވެ. 23 އަހަރުގެ މިޑްފީލްޑަރ މިހާތަނަށް ޖަޕާން ގައުމީ ޓީމަށް ކުޅުނީ 4 މެޗެވެ. ފުރަތަމަ އޭނާ ގައުމީ ޓީމަށް ކުޅުނީ މިދިޔަ އަހަރުގެ ނޮވެމްބަރު މަހުއެވެ. އޭނާ މައިންޒް އާއެކު ސޮއިކުރީ 4 އަހަރުގެ އެއްބަސްވުމެއްގަ އެވެ. މިއީ އެކްލަބުން ސޮއިކުރުވި ޖަޕާނުގެ ތިންވަނަ ކުޅުންތެރިޔާ އެވެ.

އެެހެން ބައެއް ރިޕޯރޓްތައް ބުނާ ގޮތުން ކައިޝޫ ސާނޯ ޖަޕާނު ފުލުހުން ހައްޔަރުކުރީ އިތުރު ދެމީހަކާއެކު އަންހެންކާ ގަދަކަމުން ޖިންސީ ގުޅުން ހިންގަން އުޅުމުގެ މައްސަލައެއްގައެވެ. އެކަން ހިނގާފައިވަނީ ބުދަ ދުވަހު ދަންވަރު ޓޯކިޔޯގެ ހޮޓަލެއްގައެވެ.