ގަވާއިދާ ހިލާފަށް އުޅޭ ބިދޭސީން ރިޕޯޓް ކުރުމަށް އޮންލައިން ޕްލެޓްފޯމް "އިމިގްރޭޝަން ވޮޗް" ލޯންޗުކޮށްފިއެވެ.
ބުދަ ދުވަހު އިމިގްރޭޝަނުން ބޭއްވި ނޫސްވެރިންގެ ބައްދަލުވުމެއްގައި އިމިގްރޭޝަން ވޮޗް ލޯންޗުކޮށްދެއްވީ ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން އެވެ.
މި އޮންލައިން ފްލެޓްފޯމާ ގުޅޭގޮތުން ޝަމްއާން ވިދާޅުވީ ކޮންމެ މީހަކަށް ވެސް ގަވާއިދާ ހިލާފަށް އުޅޭ ބިދޭސީންގެ މައްސަލަ ރިޕޯޓު ކުރެވޭނެ ކަމަށާއި، ފޮޓޯއާއި އެހެނިހެން މައުލޫމާތު ވެސް ހިއްސާކުރެވޭނެ ކަމަށެވެ. އަދި މައްސަލަ ހުށަހަޅާ މީހާގެ އައިޑެންޓީ ވެސް ސިއްރުކުރެވޭނެ ކަމަށް އޭނާ ވިދާޅުވިއެވެ.
މި ފްލެޓްފޯމްއަކީ ވަރަށް ގިނަ އާއްމުންނަށް އަޅުގަނޑުމެންނާ ގުޅިގެން މަސައްކަތް ކުރެވިދާނެ ފްލެޓްފޯމެއް. މި ތައާރަފް ކުރެވުނު ފްލެޓްފޯމުން ކޮންމެ ފަރާތަކަށް ވެސް ގަވާއިދާ ހިލާފަށް އުޅޭ ބިދޭސީއަކު މައްސަލަ ރިޕޯޓުކުރެވިދާނެ. ނޫނީ ރާއްޖެއަށް ވަގަށް އެތެރެވާން މަސައްކަތް ކުރާ ބިދޭސީއެއްގެ މައުލޫމާތު ވެސް ހިއްސާކުރެވިދާނެ. އަދި މިފްލެޓް ފޯމް ބޭނުންކޮށްގެން ކޮންމެހެން ތިބޭފުޅުންގެ އަމިއްލަ އައިޑެންޓިޓީ ފާހަގަކުރާކަށް. މިކަމުގެ ސަބަބުން އަޅުގަނޑުމެންނަށް ކޮމިއުނިޓީއާ ގުޅިގެން ކުރެވޭނެ މަސައްކަތްތައް އެބަހުރި. އަޅުގަނޑުމެންނަށް ބޭނުންވާ އަޅުގަނޑުމެންނަށް ބައެއް ހާލަތްތަކުގައި ނުލިބި ހުރި މައުލޫމާތުތައް ވެސް ފަސޭހަކަމާއެކު އާއްމުންނަށް ހިއްސާކުރެވޭނެ ފްލެޓް ފޯމެއް. މިފްލެޓް ފޯމްގެ އެންމެ ފަސޭހަ ޚިދުމަތަކީ 24 ގަޑިއިރު ރިޕޯޓުކުރެވޭނެ. މިފެލްޓް ފޯމް ފޮޓޯ އަދިވެސް އެހެނިހެން މައުލޫމާތު ހިއްސާކުރެވޭނެ.ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން
އިމިގްރޭޝަނުން ބުނީ މިއީ ދުނިޔޭގެ އެހެން ގައުމުތަކުގައި ވެސް ފުޅާ ދާއިރާއެއްގައި އިމިގްރޭޝަންއާ ގުޅުންހުރި އެހެނިހެން ކަންކަމުގައި ރިޕޯޓު ކުރުމަށް ގެންގުޅޭ ބެސްޓް ޕްރެކްޓިސް ކަމަށެވެ. އަދި ފްލެޓްފޯމާއެކު ގިނަ އާއްމު ރައްޔިތުންނާ ގުޅިގެން މަސައްކަތް ކުރެވޭނެ ކަމަށް އުންމީދުކުރާ ކަމަށް އިމިގްރޭޝަނުން ބުނެއެވެ.
