ގަޑީއިރެއްހާ އިރުގެ ތެރޭގައި ގާޒާގެ 3 ތަނަކަށް ބޮން އަޅާ 48 މަރު!
ޔަހޫދީ ސިފައިން ހުއްޓުމެއް ނެތި ބޮން އަޅަމުން ގެންދަނީ ސްކޫލްތަކަށާއި، ގެދޮރު ގެއްލިފައިވާ މީހުންގެ ވަގުތީ ހިޔާތަކަށް ކަން ފާހަގަ ކުރެވެއެވެ. އޭގެ ނަތީޖާ އެއްގެ މަރުވާ މީހުންނާއި ޒަޚަމްވާ މީހުންގެ ތެރޭގައި ގިނަ އަދެއްގެ ކުޑަކުދިންނާއި އަންހެނުން ހިމެނެއެވެ.
ފުނޑުވެފައިވާ އިމާރާތްތަކުގެ ދަށުން މަރުވެފައި ވަނިކޮށް ފެނިފައިވާ ފަލަސްތީން މީހެއްގެ ހަށިގަނޑުގެ ކައިރީގައި އޭނާގެ އާއިލާ މީހުން ހިތާމަ ކުރަނީ
ގަޑީއިރަކަށް ވުރެ ވެސް ކުޑަ ވަގުތު ކޮޅެއްގެ ތެރޭގައި ޔަހޫދީ ސިފައިން ގާޒާގެ 3 ތަނަކަށް ބޮން އަޅާ 48ށް ވުރެ ގިނަ ފަލަސްތީން މީހުން މަރާލައިފިއެވެ.
ގާޒާގެ ސިވިލް ޑިފެންސް އޭޖެންސީ އާ ހަވާލާދީ އަލް ޖަޒީރާ އިން ބުނެފައިވާ ގޮތުގައި އަންގާރަ ދުވަހު ދިން މި ތިން ހަމަލާގެ ތެރެއިން އެއް ހަމަލާ އަކީ ގާޒާގެ މެދުތެރޭގެ ނުސީރަތު ސަރައްދުގައި ހުންނަ އދ އިން ހިންގާ ސްކޫލަކަށް ދިން ހަމަލާ އެވެ. އެ ހަމަލާގައި މަދުވެގެން 25 މީހުން ވަނީ މަރުވެފައެވެ.
އަނެއް ހަމަލާ އަކީ ޚާން ޔޫނިސް އަށް ދިން ހަމަލާ އެވެ. އެ ހަމަލާގައި 18 މީހުން މަރުވި ކަމަށް ޚަބަރުތައް ބުނެއެވެ.
ތިން ވަނަ ހަމަލާ އަކީ ބައިތު ލަހްޔާ އަށް ދިން ހަމަލާ އެވެ. މި ހަމަލާގައި މަދުވެގެން 5 މީހުން މަރުވި ކަމަށް ރިޕޯޓް ކޮށްފައިވެއެވެ.
ގާޒާ އަށް ހަމަލާ ދެމުން ދާތާ 9 މަސް ދުވަސް ފާއިތުވެގެން ދިޔައިރު އދ އިން ގާޒާ ގައި ހިންގާ 70 އިންސައްތަ ސްކޫލަށް ޔަހޫދީ ސިފައިން ވަނީ ބޮން އަޅާފައެވެ. މި ތަންތަނުން 539 ފަލަސްތީން މީހުން މަރުވެފައިވާ ކަމަށް އދ އިން ވަނީ ބުނެފައެވެ.
ހުސްވި އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ޔަހޫދީ ސިފައިން ގާޒާގައި ހިންގަމުންދާ ލާ އިންސާނީ ހަނގުރާމައިގެ ސަބަބުން ފަލަސްތީނުން މިހާތަނަށް 38،713 މީހުން ވަނީ މަރުވެފައެވެ. އިޒްރޭލުގެ ހަމަލާތަކުން ފަލަސްތީނުން ޒަޚަމްވީ މީހުންގެ އަދަދު 89،166ށް ވުރެ މައްޗަށް ގޮސްފައިވެއެވެ.
