ސައިންސްވެރިން ހަނދުން ފުރަތަމަ ފަހަރަށް ބޮޑު ހޮހޮޅައެއް ހޯދައިފިއެވެ. މި ހޮހޮޅައިގެ ފުން މިނުގައި 100 މީޓަރު ވަރު ހުންނާނެ ކަމަށް ސައިންސްވެރިން ލަފާ ކުރެއެވެ.

ސައިންސްވެރިން ބުނާ ގޮތުގައި މިއީ އިންސާނުން ހަނދުގައި ގާއިމްވުމަށް ދާއިމީ ބޭސް އެއް ހެދުމަށް އެކަށީގެންވާ ތަނަކަށް ވުމުގެ ފުރުސަތު ބޮޑެވެ.

ދިރާސާ ކުރާ ފަރާތްތަކުން ބުނާ ގޮތުގައި މިއީ ހަނދުގައިވާ މިފަދަ އެތައް ހޮހޮޅައެއްގެ ތެރެއިން އެއް ތަނަށް ވުމީ އެކަށީގެންވާ ކަމެކެވެ.

ހަނދުގައި އެސްޓްރޮނަޓުން ބޭތިއްބުމަށް ހަލުއި މަސައްކަތްތަކެއް ބައެއް ގައުމުތަކުން ކުރަމުން ދާއިރު، ހަނދުގައި ތިބޭ ބަޔަކަށް ރޭޑިއޭޝަނުން ސަލާމަތް ވެވޭނެ ގޮތަކާއި، ޖައްވީ މޫސުމުން ރައްކާތެރިކަން ލިބޭނެ މާހައުލެއް ތަނަވަސް ވުމަކީ މުހިންމު ކަމެއް ކަމަށް ސައިންސްވެރިން ބުނެއެވެ.

އިނގިރޭސިވިލާތުގެ ފުރަތަމަ އެސްޓްރޮނަޓް ހެލެން ޝާމަން ބީބީސީ އަށް ދިން ބަސްދީގަތުމެއްގައި ބުނެފައިވަނީ، މުޅިން އަލަށް މި ހޯދުނު ހޮހޮޅައަކީ ހަނދުގައި އެސްޓްރޮނަޓުން ގާއިމްވެ ތިބެން ބޭސް އެއް ހެދުމަށް އެކަށީގެންވާ ތަނަކަށް ވެދާނެއެވެ. އެހެން ނަމަވެސް އޭނާ ބުނެފައިވަނީ މި ހޮހޮޅަ ފުން ކަމުން އެތަނުން އަރާފައިބަން ގޮތްތަކެއް ހޯދަން ޖެހޭނެ ކަމަށެވެ.

މި ހޮހޮޅަ ހޯދީ އިޓަލީ ވިލާތުގެ ޓްރެންޓޯ ޔުނިވަރސިޓީގެ ދެ ސައިންސްވެރިން ކަމަށްވާ ލޮރެންޒޯ ބްރުއްޒޯނީ އާއި ލިއޮނާޑޯ ކައްރޭރާ އެވެ.

ހޮހޮޅަ ހޯދީ ސައިންސްވެރިން ކިޔާ ގޮތުން ހަނދުގެ "މާރޭ ޓްރެންކުއިލިޓާޓިސް" ސަރަހައްދުން ނެވެ.

ސައިންސްވެރިން ބުނާ ގޮތުން "މާރޭ" އަކީ ކުރިން ބޮޑު ކަނޑެއް އޮތް ތަނެއް ކަމަށް ބެލެއެވެ. މިއީ ދުނިޔެއިން ހަމަ ލޮލަށް ފެންނަން ހުންނަ ސަރަހަދެކެވެ. އަދި މއީ 1969 ވަނަ އަހަރު އެޕޯލޯ 11 ހަނދުގައި ޖެއްސި ތަނެވެ.

ސައިންސްވެރިން އަލަށް މި ހޯދި ހޮހޮޅައާ ބެހޭ ގޮތުން އަދި އެގެން ބޭނުންވާ ވަރަށް ގިނަ ކަންކަން އެބަހުއްޓެވެ. މި ތަނުގެ ޗާޓު ކުރެހުމުގައި ބިންގަނޑުގެ އަޑި ދެނެގަނެވޭ ރާޑަރާއި، ކެމެރާ އާއި ރޮބޮޓްގެ ބޭނުން ހިފިދާނެ ކަމަށް ސައިންސްވެރިން ބުނެއެވެ.

ހަނދުގައި ހޮހޮޅަ ހުންނަ ކަން މީގެ 50ށް އަހަރު ކުރިން ސައިންސްވެރިން ވަނީ ދެނެގަނެފައެވެ. އޭގެ ފަހުން 2010 ވަނަ އަހަރު ލޫނާ ރިކޮނިސެންސް އޮބިޓަރގެ މިޝަންގައި ބޭނުން ކުރި ކެމެރާ އިން ނަގާފައިވާ ފޮޓޯ ތަކުގައި ހުރި ބައެއް ވަޅުގަނޑުގަނޑުން އެއީ ހޮހޮޅައިގެ އަނގަމައްޗަށް ވެދާނެ ކަމަށް ސައިންސްވެރިން ވަނީ ލަފާ ކޮށްފައެވެ. އެހެން ނަމަވެސް އެކަން ޔަގީން ކުރެވޭ ވަރަށް އެ ހިސާބަށް އައި އިރު އެކަށީގެންވާ މައުލޫމާތު ސައިންސްވެރިންނަށް ލިބިފައެއް ނުވެއެވެ.

ޕްރޮފެސަރ ބްރުއްޒޯނީ އާއި ޕްރޮފެސަރ ކައްރޭރާ ގެ މަސައްކަތުން ކުރިން ޖަވާބު ނުލިބޭ އެތައް ސުވާލަކަށް ވަނީ ޖަވާބު ލިބިފައެވެ. އެހެން ނަމަވެސް ހަނދުގައި ހުންނަ ހޮހޮޅައާ ބެހޭ ގޮތުން އަދި ސައިންސްވެރިންނަށް އެނގެން ބޭނުންވާ ގިނަ މައުލޫމާތުތަކެއް އެބަހުއްޓެވެ.

ސައިންސްވެރިން ދެކޭ ގޮތުގައި ހަނދުގެ ހޮހޮޅައިގެ ދިރާސާ އަކީ ހަނދުގެ ތާރީޚާއި، އުފެދުމާއި، އަދި ދުނިޔޭގެ ސޯލާ ސިސްޓަމް އާ ބެހޭ ގިނަ ސުވާލުތަކަކަށް ޖަވާބު ހޯދުމަށް މުހިންމު ކަމެކެވެ.

ސައިންސްވެރިން ގަބޫލު ކުރާ ގޮތުގައި ހޮހޮޅައިގެން ތެރެއިން ނަގާ ހިލައަކީ ރަނގަޅަށް ރައްކާތެރި ވެފައި ހުންނަ އެއްޗެއްސަށް ވުމާއެކު އެފަދަ ހިލައިގެ ދިރާސާތަކުން އެތައް ބިލިއަން އަހަރެއްގެ މައުލޫމާތު ހޯދިގެން ދާނެއެވެ.