އާޖެންޓީނާގެ ޤައުމީ ފުޓުބޯޅަ ޓީމުގެ ކޯޗުކަމުގައި ދެމި ހުރުމަށްޓަކައި، އައު އެއްބަސްވުމެއްގައި ސޮއި ކުރަން ތައްޔާރު ކަމަށް ލިއޮނަލް ސްކަލޯނީ ބުނެފި އެވެ.

އޭނާ މިހެން ބުނީ އާޖެންޓީނާ އިން، އެމެރިކާ ގައި ކުރިއަށް ދިޔަ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) ކާމިޔާބު ކުރުމަށްފަހު ނޫސްވެރިންނާ ވާހަކަ ދައްކަމުންނެވެ.

އުމުރުން 46 އަހަރުގެ ސްކަލޯނީ އާޖެންޓީނާގެ ކޯޗުކަމާ ހަވާލުވީ 2018 ވަނަ އަހަރުގެ އޯގަސްޓު މަހުގެ ތެރޭގަ އެވެ. އޭގެ ފަހުން 2022 ވަނަ އަހަރު ޤަތަރުގައި އޮތް ފީފާ ވޯލްޑް ކަޕަށްފަހު އޭނާ ވަނީ އާޖެންޓީނާގެ އެއްބަސްވުން އައު ކޮށްފަ އެވެ. އައު އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ވޯލްޑް ކަޕްގެ ނިޔަލަށެވެ.

ނޫސްވެރިންނާ ވާހަކަ ދައްކަމުން ސްކަލޯނީ ބުނީ، އޭނާގެ އެއްބަސްވުމުގައި ބާކީ ދެ އަހަރު އޮތް ކަމަށެވެ. އެ ދެ އަހަރުގެ ތެރޭގައި ވެސް ކުރަން ޖެހޭ މަސައްކަތް ކުޑަ ކަމަކަށް ސްކަލޯނީ ޤަބޫލެއް ނުކުރެ އެވެ. އަދި އޭނާ ހުރީ ވެސް، އާޖެންޓީނާ އާއެކު އަދި ވެސް ކާމިޔާބީތައް ހޯދަން ބޭނުން ވެފަ އެވެ.

ސްކަލޯނީ ބުނީ، އޭނާގެ އެއްބަސްވުން އިތުރު 15 އަހަރަށް އައު ކުރުމަށް އާޖެންޓީނާ ފުޓުބޯޅަ ފެޑެރޭޝަންގެ ރައީސް ގާތު ބުނަން ޖެހޭ ކަމަށެވެ. އަދި އައު އެއްބަސްވުމުގައި ސޮއި ކުރަން އޭނާ ތައްޔާރަށް ހުރި ކަމަށް ވެސް ސްކަލޯނީ ވަނީ ބުނެފަ އެވެ. އިތުރަށް އޭނާ ބުނީ އަނެއްކާ ވެސް މިއީ އުފާ ފާޅު ކުރަންވީ ވަގުތު ކަމަށާއި، އާޖެންޓީނާ އަކީ މޮޅުވާ ޓީމެއް ކަމަށެވެ.

އާޖެންޓީނާއާ ހަވާލުވެ ސްކަލޯނީ ވަނީ އެ ޓީމަށް ކާމިޔާބުތަކެއް ހޯދައިދީފަ އެވެ. އޭނާގެ އިރުޝާދުގެ ދަށުން އާޖެންޓީނާ އިން ވަނީ 2021 ވަނަ އަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ކާމިޔާބު ކޮށްފަ އެވެ. އޭގެ ފަހުން ބައްރުތަކުގެ ޗެމްޕިއަނުންގެ މެދުގައި ކުޅޭ ފައިނަލިސިމާ ކާމިޔާބު ކުރީ އިޓަލީ ބަލިކޮށްގެންނެވެ. ރަނގަޅު ރޫޙެއްގައި އޮތް އާޖެންޓީނާ އިން ވަނީ 2022 ވަނަ އަހަރު ޤަތަރުގައި ކުރިއަށް ދިޔަ ވޯލްޑް ކަޕް ވެސް ކާމިޔާބު ކޮށްފަ އެވެ. އެއީ 36 އަހަރަށް ފަހު އާޖެންޓީނާ އަށް ވޯލްޑް ކަޕް ކާމިޔާބު ކުރެވުނު ފުރަތަމަ ފަހަރެވެ.

ވޯލްޑް ކަޕަށްފަހު އާޖެންޓީނާ އިން ވަނީ، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އާންމު ކުރާ ދުނިޔޭގެ ރޭންކިންގެ އެއް ވަނަ އަށް ވެސް ޖެހިލައިފަ އެވެ. އެއް ވަނައިގައި މިވަގުތު ވެސް އާޖެންޓީނާ އޮތްއިރު، އެ ޓީމުން ވަނީ މިއަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ކާމިޔާބު ކޮށްފަ އެވެ. އެއާއެކު އާޖެންޓީނާ އިން ވަނީ ޖެހި ޖެހިގެން ދެ ވަނަ ފަހަރަށް އެ މުބާރާތް ކާމިޔާބު ކޮށްފަ އެވެ.