ގާޒާގައި ހިންގަމުންދާ "ނިމުމެއް ނެތް ގަތުލުއާންމު" ބްރެޒިލްގެ ރައީސް ކުށްވެރި ކުރައްވައިފި
15 ޖުލައި 2024 | ހޯމަ 07:52އިޒްރޭލުގެ އަނިޔާވެރި ކަމުގެ ކުރިމަތީގައި ދުނިޔޭގެ ގައުމުތަކުން މަޑުން އެއްޗެއް ނުބުނެ ނުތިބުމަށް ބްރެޒިލްގެ ރައީސް ވަނީ ގޮވާލައްވާފައި
އެޕާޗޭ ހަނގުރާމަމަތީ ބޯޓަކުން އިޒްރޭލް ސިފައިން ގާޒާ އަށް މިސައިލް ހަަމަލާ ދެނީ
ގާޒާގައި ހިންގަމުންދާ ދަނީ "ނިމުމެއް ނެތް ގަތުލުއާންމު" ކަމަށާއި އެކަން ކުށްވެރި ކުރައްވާ ކަމަށް ބްރެޒިލްގެ ރައީސް ލުއިޒް އިނާޝިއޯ ލޫލާ ޑަ ސިލްވާ ވިދާޅުވެއްޖެއެވެ. ބްރެޒިލްގެ ރައީސް މިހެން ވިދާޅުވިއިރު އިޒްރޭލުން ގެންދަނީ އެމީހުން އަމިއްލަ އަށް ރައްކައުތެރި ޒޯންގެ ގޮތުގައި ކަނޑައަޅާފައިވާ ތަންތަނުގައި ތިބި ފަލަސްތީނުގެ ރެފިއުޖީންނަށް އެއްވެސް ބެލުމެއްނެތި ހަމަލާދީ މަރަމުންނެވެ.
އާދިއްތަ ދުވަހު ބްރެޒިލްގެ ރައީސްގެ އޮފީހުން ނެރުނު ބަޔާނެއްގައިވަނީ ގާޒާ ސްޓްރިޕް އަށް އެންމެ ފަހުން އިޒްރޭލުން ބޮން އަޅާ މި ދިން ހަމަލާތަކުގައި އެތައް ސަތޭކަ ފަލަސްތީންގެ ކުށެއް ނެތް ބަޔަކު މަރުވުމަކީ ބަލައިގަނެވޭނެ ކަމެއް ނޫން ކަމަށާއި އިޒްރޭލުގެ އެ އަމަލު ހަރުކަށި އިބާރާތުން ކުށްވެރި ކުރާ ކަމަށެވެ.
ބްރެޒިލްގެ ރައީސް ލޫލާ ޑަ ސިލްވާ އިޒްރޭލު ކުށްވެރިކުރައްވާ ބަޔާން ނެރުއްވި އިރު ހޮނިހިރު ދުވަހު ދެކުނު ގާޒާގެ ކޭމްޕަކަށް ޔަހޫދީ ސިފައިން ދިން ހަމަލާގައި 90 މީހުން މަރުވެ، 300ށް ވުރެ ގިނަ މީހުން ވަނީ ޒަޚަމްވެފައެވެ.
އޭގެ އިތުރުން ހޮނިހިރު ދުވަހު އަލް-ޝާތީ ރެފިއުޖީ ކޭމްޕްގައި ހުރި މިސްކިތަކަށް ހަމަލާދީ 20 މީހުން ވަނީ މަރާލާފައެވެ.
ބްރެޒިލްގެ ރައީސް ވިދާޅުވެފައިވަނީ ފަލަސްތީން ރައްޔިތުނަނަށް ދެމުން މިދާ އަނިޔާތައް ބަލަން މަޑުން ނުތިބުމަށް ބައިނަލް އަގްވާމީ މުޖްތަމައަށް ގޮވާލައްވާ ކަމަށެވެ.
