ހުސްނުވާ އާސަންދަ މެޑިކަލް މާފިޔާއަކަށް ހަދާފައިވާއިރު، އަދިވެސް ރަނގަޅު ނިޒާމެއް މިސަރުކާރަށް އެކުލަވާނުލައި އާއްމު ރައްޔިތުން ވަރަށް ބޮޑު ނުތަނަވަސްކަމެއްގެ ތެރެއަށް ވައްޓާލުމަށް މަސައްކަތް ކުރާ މަންޒަރު ފެންނަ ކަމަށް ދަ ޑިމޮކްރެޓްސް ޕާޓީގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޝިފާޒު ވިދާޅުވީ ކުރީގެ ރައީސް މުހައްމަދު ނަޝީދުގެ ސަރުކާރުގައި އިޖްތިމާއީ ރައްކާތެރިކަން ފޯރުކޮށްދިނުމުގެ ސިޔާސަތުގެ ދަށުން ރައްޔިތުންނާ ގުޅުންހުރި ވަރަށް ގިނަކަންކަން ގާނޫނު އަސާސީގެ ތެރެއިން ކަށަވަރުކޮށްދީފައިވާ ކަމަށެވެ.
އާސަންދައަށް އިޝާރާތް ކުރައްވައި ޝިފާޒު ވިދާޅުވީ ސިޔާސީގޮތުން އެއްބޭފުޅަކު އަނެއް ބޭފުޅަކަށް ވުރެ މޮޅަށް ކަންކަން ކުރެއްވުމުގެ މަގުސަދުގައި އާސަންދަ ސްކީމް ވެސް ހުސްނުވާ އާސަންދައަށް ހަދާފައިވާ ކަމަށެވެ. އަދި މިއަދު އެ ސްކީމް މެޑިކަލް މާފިޔާއަކަށް ބަދަލުވެފައިވާ ކަމަށް އޭނާ ވިދާޅުވިއެވެ. ނަތީޖާއެއް ގޮތުން ދައްކަން ޖެހޭ ފައިސާ ނުދެއްކި، އިންޑިއާއިން ދިވެހިން އެންމެ ގިނައިން ބޭސްފަރުވާ ޚިދުމަތް ހޯދާ ހޮސްޕިޓަލް މަނިޕާލް ހޮސްޕިޓަލުން އާސަންދައިގެ ޚިދުމަތް މެދުކަނޑާލާފައިވާ ކަމަށް ޝިފާޒު ވިދާޅުވިއެވެ. އަދި އައިޖީއެމްއެޗާއި އޭޑީކޭއަށް ދޭންޖެހޭ ފައިސާ ވެސް ނުދޭ ކަމަށް ޝިފާޒު ތުހުމަތު ކުރެއްވިއެވެ.
މީގެ އިތުރުން ޝިފާޒު ވިދާޅުވީ ސަރުކާރަށް ހަރަދު ބޮޑުވެ ގައުމުގެ އިގްތިސާދަށް ކާރިސާއެއް ކުރިމަތި ވާއިރު، ރައްޔިތުންނަށް ވާނުވާ އެނގެން ޖެހޭ ކަމަށެވެ.
ސަރުކާރުގެ ސްޓޭންޑް ފެންނަމުންދަނީ ސަރުކާރުގެ ބޭފުޅުން އާއްމު ރައްޔިތުންނަށް ލިބޭ ޚިދުމަތްތަކާ އިނާއަތްތާއެކު މެދު ސުވާލު އުފައްދައި، ރައްޔިތުން ނުތަނަވަސްކަމެއްގެ ތެރެއަށް ވައްޓާލާ މަންޒަރު ކަމަށް ޝިފާޒު ވިދާޅުވިއެވެ. އެކަމުގެ ސަބަބުން މިއަދު ފެންޝަން ފަންޑާމެދު ވެސް ރައްޔިތުން ސުވާލު އުފައްދާ ކަމަށް އޭނާ ވިދާޅުވިއެވެ. ޝިފާޒު ވިދާޅުވީ މިއަދު ވާނުވާ ނޭނގޭ ކަންތައް ގަނޑެއްގެ ތެރޭގައި ކައުންސިލަރުން ތާށިވާ މަންޒަރު ފެންނަ ކަމަށާއި، ދޮށީ އުމުރުގެ މީހުންނަށް ދޭ އެލަވަންސާއި ހިލޭ ޑިގްރީ ޕްރޮގްރާމް ކުރިއަށް އޮތްތަނުގައި ހިންގާނެ ކަމާމެދު ސުވާލު އުފެދިފައިވާ ކަމަށެވެ.
ޝިފާޒު ވިދާޅުވީ ރައްޔިތުންނާ ގުޅުންހުރި މިފަދަ ކަންކަމުގައި ސަރުކާރުން މިއަށްވުރެ ރަނގަޅަށް މެނޭޖްކުރަންޖެހޭ ކަމަށެވެ. ހަރުދަނާ ފިޔަވަޅުތަކެއް އަޅައިގެން ކަންކަން އިސްލާހު ކުރަން މަސައްކަތް ކުރާނަމަ އެކަމަކަށް މަރުހަބާ ކިޔާނެ ކަމަށް ޝިފާޒު ވިދާޅުވިއެވެ. ނަމަވެސް އަދިވެސް ފެންނަނީ ހަރުދަނާ ފިޔަވަޅުތައް އެޅުމުގެ ބަދަލުގައި ބޭކާރު ހަރަދުތައް ކުރާ މަންޒަރު ކަމަށް އޭނާ ވިދާޅުވިއެވެ.
ދެން ހަމައެއާއެކު އިޖްތިމާއީ ރައްކާތެރިކަން ފޯރުކޮށްދިނުން 2008 ގެ ގާނޫނު އަސަސީއަށްފަހު އެންމެ ބޮޑަށް އެންމެ ފުރަތަމަ އަޅުގަނޑުމެންނަށް ވައުދެއްގެ ގޮތުގައި މިހާރުގެ މި ޖީލަށް ހަދުމަފުޅު ހުންނާނެހެން ހީވަނީ ފޮތް ފަންސޫރަށް ސަލާން ޖެހުން ހުއްޓާލަން. ހިލޭ ބޭސްފަރުވާ ކޮށްދޭނަމޭ. ބޯހިޔާވަހިކަން ފޯރުކޮށްދޭނަމޭ ދަތުރުފަތުރުން ރާއްޖޭގެ ރަށްތައް ގުޅާލަދޭނަމޭ. ރައީސް ނަޝީދު އޭރުގައި ވިދާޅުވީ އެވާހަކަފުޅުތައް. މެނިފެސްޓޯގައި ލިޔުނިން. އެވީ ވަރަށް ބޮޑު ކަމަކަށް. މިއަދާ ހަމައަށް ވެސް ދޮށީއުމުރު މީހުންގެ އެލަވަންސް ވެސް އެނގޭތޯ މިދަންނަވާ އިޖްތިމާއީ ރައްކާތެރިކަމުގެ ތެރެއިން ފޯރުކޮށްދޭ ހިލޭ ބޭސްފަރުވާ ވެސް އެއް ބޭފުޅަކު އަނެއް ބޭފުޅަކު މޮޅަށް ކަންކަން ކުރަން ރީތިކޮށް ނިޒާމެއްގެ ތެރެއިން އެކަންކަން ކޮށް އޮއްވާ ހުސްނުވާ އެއްޗަކަށް ހަދާފައި ދައުލަތުން ލިބޭ އާމްދަނީއާ ނިޒާމު އެނބުރޭ ގޮތަކަށް ނުބަލާ. ހުސްނުވާ އެއަށް އިތުރުކޮށްފައި ދެން ހެޔޮ ކޮންމެ ގޮތެއް ވިޔަސް. މެޑިކަލް މާފިޔާއަކަށް އާސަންދަ ވެއްޖެ. އޭގެން އަރައިނުގަނެގެން އުޅޭތަން އެބަ ފެނޭ އެންމެނަށް. އަދިވެސް އެއަށް ހަރުދަނާ ސިޔާސަތެއް އެކުލަވާލާފައިނުވޭ. ރަނގަޅު އިންޝުއަރެންސް އަކަށް އެބަދަލުކޮށްފައި ލިމިޓް ކުރެވޭނެ ރީތި ހަމައެއް މިހާރުވެސް އޮތީ އެ އޮތް ގޮތައް. އިހަށް ދުވަހު މިއެނގުނީ މަނިޕާލް ހޮސްޕިޓަލުން ޚިދުމަތް ކަނޑާލި ވާހަކަ. އެންމެ ގިނަ ދިވެހިން ރާއްޖެއިން ބޭރުން ފަރުވާ ހޯދާ ހޮސްޕިޓަލް. މައްސަލައެއް ނެތް. އަގު ބޮޑީ ކަމަށް ވިދާޅުވީ. އެހެން ނަމަވެސް ކިހިނެތްތޯ އާއްމު ރައްޔިތުން ގަބޫލުކުރާނީ.ދަ ޑިމޮކްރެޓްސް ޕާޓީގެ ނައިބު ރައީސް މުހައްމަދު ޝިފާޒު
މި ސަރުކާރުން ފެންނަނީ ހާމަކަން ކުޑަ ސަރުކާރެއްގެ ގޮތުގައިކަން ފާހަގަކުރައްވާ ޝިފާޒު ވިދާޅުވީ ރަނގަޅު އެއްވެސް ވެރިއަކު ނޫސްވެރިންގެ ސުވާލުތަކަށް ނުފިލާނެ ކަމަށެވެ. ހާމަކަންބޮޑުވުން ނުވަތަ ޓްރާންސްޕޭރެންސީ އަކީ ބިރުގަންނަން ޖެހޭ ކަމެއް ނޫން ކަމަށާއި، އެއީ އާއްމުންނާއި އިދާރާތަކާއި މުއައްސަސާތައް އަދި ވެރިންނާއި މެދު އޮންނަ ގުޅުން ހަރުދަނާކޮށް އިތުބާރު ގާއިމްކުރަން ލިބޭ ފުރުސަތެއް ކަމަށް ޝިފާޒް ވިދާޅުވިއެވެ.
