ކެރިއަރުގެ 45 ވަނަ ތައްޓާއެކު، މެސީގެ ރެކޯޑަށް ފުރިހަމަ ކަމެއް!

އެމެރިކާ ގައި ކުރިއަށް ދިޔަ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) ކާމިޔާބުކޮށް، އާޖެންޓީނާގެ ކެޕްޓަން ލިއޮނަލް މެސީ އަށް ކެރިއަރުގައި 45 ވަނަ ތަށި ކާމިޔާބު ކޮށްފި އެވެ.

އެމެރިކާ ގައި ކުރިއަށް ދިޔަ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް އާޖެންޓީނާ އިން ކާމިޔާބު ކުރީ ހޯމަ ދުވަހުގެ ފަތިހު ކޮލަމްބިއާއާ ދެކޮޅަށް ކުޅުނު މެޗު ކާމިޔާބުކޮށްގެންނެވެ. އެ މެޗުގައި މެސީ ވަނީ ފުރަތަމަ 11 ގައި ހިމެނިގެން ކުޅެފަ އެވެ. ނަމަވެސް މެޗުގެ ދެ ވަނަ ހާފުގައި މެސީ ބަދަލު ކޮށްފައި ވަނީ، ފައިގެ ކުޑަ ހުޅަށް ލިބުނު އަނިޔާގެ ސަބަބުންނެވެ.

މެސީ ވަނީ ކެރިއަރުގައި ސްޕެއިންގެ ބާސެލޯނާގެ އިތުރުން، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެފަ އެވެ. މެސީ މިހާރު ކުޅެމުން އަންނަނީ އެމެރިކާގެ އިންޓަ މިއާމީ އަށެވެ. މެސީ ވަނީ ބާސެލޯނާ އާއެކު 34 ތަށި ކާމިޔާބު ކޮށްފަ އެވެ. އޭގެ ފަހުން މެސީ ޕީއެސްޖީ އަށް ބަދަލުވީއިރު، އެ ކުލަބާއެކު މެސީ ވަނީ ތިން ތައްޓެއް ކާމިޔާބު ކޮށްފަ އެވެ. މިހާރު ކުޅެމުން އަންނަ އިންޓަ މިއާމީ އާއެކު މެސީ ވަނީ އެއް ތަށި ކާމިޔާބު ކޮށްފަ އެވެ.

މީގެ އިތުރުން މެސީ ވަނީ އާޖެންޓީނާގެ ސީނިއާ ޤައުމީ ޓީމާއެކު ހަތަރު ތައްޓެއް ކާމިޔާބު ކޮށްފަ އެވެ. އޭގެ ކުރިން މެސީ ވަނީ އާޖެންޓީނާގެ 20 އަހަރުން ދަށުގެ ޤައުމީ ޓީމާއެކު، އަދި އާޖެންޓީނާގެ 23 އަހަރުން ދަށުގެ ޤައުމީ ޓީމާއެކު ވެސް ތައްޓެއް ކާމިޔާބު ކޮށްފަ އެވެ.

ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު 8 ފަހަރު ކާމިޔާބު ކޮށްފައިވާ މެސީ އަކީ، ފުޓުބޯޅައިގެ ތާރީޚުގައި ވެސް އެންމެ ގިނަ ތަށި ކާމިޔާބު ކޮށްފައިވާ ކުޅުންތެރިޔާ އެވެ. މެސީގެ ފަހަތުން މި ލިސްޓުގެ ދެ ވަނައިގައި އޮތީ ބްރެޒިލްގެ ޑިފެންޑަރު ޑެނީ އަލްވޭސް އެވެ. އަލްވޭސް ވަނީ ކެރިއަރުގައި 43 ތައްޓެއް ކާމިޔާބު ކޮށްފަ އެވެ.