ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތުގެ އެންމެ މޮޅު ކުޅުންތެރިޔަކަށް ސްޕެއިންގެ ރޮޑްރީ ހޮވުނުއިރު، އެންމެ މޮޅު ޒުވާން ކުޅުންތެރިޔަކަށް އެ ޓީމުގެ ލަމީން ޔަމާލް ހޮވިއްޖެ އެވެ.

މުބާރާތުގެ މޮޅު ކުޅުންތެރިޔަަކަށް ހޮވުނު ރޮޑްރީ ވަނީ ސްޕެއިން އަށް ފަސް މެޗު ކުޅެދީފަ އެވެ. އެއީ ގްރޫޕް ސްޓޭޖުގެ ދެ މެޗުގެ އިތުރުން، ގަދަ 16 ވަނަ ބުރު، ކުއާޓާ ފައިނަލް، ސެމީ ފައިނަލް އަދި ފައިނަލް މެޗެވެ. ރޮޑްރީ ވަނީ މުބާރާތުގައި ސްޕެއިން އަށް އެއް ލަނޑު ޖަހައިދީފަ އެވެ. މުބާރާތުގައި ސްޕެއިންގައި އެންމެ މޮޅު ކުޅުމެއް ދެއްކި އެއް ކުޅުންތެރިޔަކީ ވެސް ރޮޑްރީ އެވެ.

މުބާރާތުގެ އެންމެ މޮޅު ޒުވާން ކުޅުންތެރިޔަަކަށް ހޮވުނު އުމުރުން 17 އަހަރުގެ ޔަމާލް ވަނީ، މުބާރާތުގެ ހުރިހާ މެޗެއްގައި ވެސް ކުޅެފަ އެވެ. އޭނާ ވަނީ ސްޕެއިން އަށް އެއް ލަނޑު ޖަަހައިދީ، ހަތަރު ލަނޑު ޖަހަން އެހީތެރިވެދީފަ އެވެ. ޔަމާލް އަކީ ޔޫރޯ މުބާރާތެއްގައި ލަނޑު ޖަހައި، އަދި ލަނޑު ޖަހަން އެހީތެރިވެދިން އެންމެ ޒުވާން ކުޅުންތެރިޔާ އެވެ.

ސްޕެއިން އިން މި ވަނީ ހަތަރު ފަހަރެއްގެ މަތިން ޔޫރޯ މުބާރާތް ކާމިޔާބު ކޮށްފަ އެވެ. އެއީ 1964، 2008، 2012 އަދި 2024 އެވެ. ހަތަރު ފަހަރު މުބާރާތް ކާމިޔާބު ކޮށްފައިވާ ސްޕެއިން އަކީ މުބާރާތުގެ އެންމެ ކާމިޔާބު ޓީމެވެ. ސްޕެއިންގެ ފަހަތުން އޮތީ ތިން ފަހަރު މުބާރާތް ކާމިޔާބު ކޮށްފައިވާ ޖަރުމަނެވެ.