މާމިގިލީ ފަޅުން ޕިކްނިކް ދިއުމަށް ވަކި ރަށެއް ހިއްކަން ނިންމައިފިއެވެ.
މާމިގިލީ ކައުންސިލް އިދާރާއިން ގެޒެޓުކުރި އިއުލާނެއްގައި ބުނީ، އދ.މާމިގިލީ އުތުރުފަރާތު ފަޅުތެރޭގައި މާމިގިލީ ރައްޔިތުންނަށް ޕިކްނިކް އައިލެންޑެއް ތަރައްގީކުރުމަށާއި އެ ރަށުން ރައްޔިތުންނަށް ޓުއަރިޒަމްގެ ބޭނުންހިފޭގޮތަށް ރަށެއް ހިއްކުމަށް ބޭނުންވާ ކަމަށެވެ.
ކައުންސިލުން ވަނީ ކައުންސިލުން ބޭނުންވާ ގޮތަށް 150 ފޫޓާއި 250 ފޫޓްގެ ރަށެއް ހިއްކުމާއި ރޮކްބޯޑަރ ޖެހުމަށް ބޭނުންވާ އީ.އައި.އޭ ހަދައިދޭނެފަރާތެއް ހޯދަން އިއުލާނުކޮށްފައެވެ.
އެ މަސައްކަތް ކުރުމަށް ޝައުޤުވެރިވާ ފަރާތްތަކުން 2024 ޖުލައި 25 ވާ ބުރާސްފަތި ދުވަހު 13:00ށް އދ.މާމިގިލީ ކައުންސިލް އިދާރާއަށްގޮސް އަންދާސީހިސާބު ހުށަހެޅުމަށް އެދިފައިވެއެވެ.
އަންދާސީހިސާބު ހުށައެޅުމުގެ ފުރުޞަތު އޮންނާނީ އިކޮނޮމިކް މިނިސްޓްރީގައި ވިޔަފާރި ރަޖިސްޓަރީކޮށްފައިވާ ފަރާތްތަކަށް އެކަންޏެވެ.
މާމިގިލީ ފަޅުން ޕިކްނިކް ދިއުމަށް ވަކި ރަށެއް ހިއްކަން ނިންމާފައިވާއިރު، މާމިގިލީ ދާއިރާގެ މެމްބަރު ގާސިމް އިބްރާހިމްއަކީ މި ސަރުކާރުގެ ކޯލިޝަން ޕާޓްނަރެކެވެ. ސަރުކާރަށް ވަރަށް ބޮޑަށް ތައުރީފުކޮށް ވާހަކަ ދައްކާ މެމްބަރެއްގެ ގޮތުގައި ގާސިމް މިހާރު ފާހަގަ ކުރެވިފައިވެއެވެ.
