ފްލައިޓްތައް ފުރި، އަގުތައް އުފުލިއްޖެ، ފައިނަލް މެޗަށް ނުދެވި ތިބީ ކުޅުންތެރިންގެ އާއިލާތައް
13 ޖުލައި 2024 | ހޮނިހިރު 02:31އަމިއްލަ ޖެޓްތައް ވެސް ދަތުރުކޮށްދޭ އަގު ވަނީ އިންތިހާ އަށް މަތިވެފައިވާއިރު ފްލައިޓްތަކުގެ ޓިކެޓް އަގުތައް ވެސް ވަނީ ތިން ގުނަ ބޮޑުވެފައި
އިނގިރޭސި ކުޅުންތެރިން އެމީހުންގެ އާއިލާގެ މެމްބަރުންނާއެކު
އިނގިރޭސި ގައުމީ ފުޓްބޯޅަ ޓީމުގެ ކުޅުންތެރިންގެ ލޯބިވެރިންނާއި އާއިލާތަކަށް ޔޫރޯ ފައިނަލް މެޗަށް ޖަރުމަނަށް ދިއުމުގައި ދަތިތަކެއް ކުރިމަތިވެއްޖެ އެވެ.
އިނގިރޭސި މީޑިއާތަކުން ބުނާ ގޮތުގައި ޖަރުމަނުގެ ބާލިންއާ ދަތުރުކުރާ ހުރިހާ ފްލައިޓެއް ވަނީ ފުލްވެފަ އެވެ. މިހެންވެ އަމިއްލަ ޖެޓްތައް ވެސް ދަތުރުކޮށްދޭ އަގު ވަނީ އިންތިހާ އަށް މަތިވެފަ އެވެ. އަދި ފްލައިޓްތަކުގެ ޓިކެޓް އަގުތައް ވެސް ވަނީ ތިން ގުނަ ބޮޑުވެފަ އެވެ. ކުރިން 167 ޕައުންޑަށް އިނގިރޭސިވިލާތުން ޖަރުމަނަށް ދަތުރުކުރެވުނު ނަމަވެސް މި އަގުތައް މިހާރު އުޅެނީ ހާހުން މަތީގަ އެވެ.
އިނގިރޭސި ކުޅުންތެރިއެއްގެ އާއިލާއަކާ ހަވާލާދީ ޑެއިލީ މެއިލްއިނ ބުނެފައިވަނީ ޕްރައިވެޓް ޖެޓެއް ލަންޑަނުން ބާލިން އަށް ދަތުރުކޮށްދޭ އަގު 18000 ޕައުންޑަށް އަރާފައިވާ ކަމަށެވެ، މިއީ އާއްމު އަގުތަކަށްވުރެ ތިން ގުނަ ބޮޑު އަދަދެކެވެ.
ކުޅުންތެރިންގެ އާއިލާތަކަށް ޖަރުމަނަށް ދިއުމުގައި ދަތިތަކެއް ކުރިމަތިވުމުން އިނގިރޭސި އެފްއޭއިން އަންނަނީ މިކަން ހައްލުކޮށްދިނުމަށް މަސައްކަތް ކުރަމުންނެވެ.
ސްޕޭނާ ދެކޮޅަށް އިނގިރޭސިން ކުޅޭ ފައިނަލް މެޗުން މޮޅުވެ، ތަށި ހޯދައިފިނަމަ މުޅި ގައުމުގައި ހަފުތާއެއް ވަންދެން އުފާފާޅު ކުރަން އިނގިރޭސި ސަރުކާރުން ދަނީ ވިސްނަމުންނެވެ. އަދި މި ފައިނަލް މެޗަށް ޖަރުމަނަށް އިނގިރޭސިންގެ ލައްކައަކަށްވުރެ ގިނަ މީހުން ޖަމާވާނެ ކަމަށް ވެސް ވަނީ އަންދާޒާކޮށްފަ އެވެ. ފައިނަލް މެޗުގައި ކުޅޭ އޮލިމްޕިއާ ސްޓޭޑިއަމަށް ވަނުމަށް ކޮންމެ ގައުމަކަށް 11000 ޓިކެޓް ވިއްކާފައިވީ ނަމަވެސް ބްލެކް މާކެޓުގައި ޓިކެޓް ގަނެގެން ކުޅިބަލަން ވަންނަ މީހުންނާއެކު އިނގިރޭސި ސަޕޯޓަރުންގެ އަދަދު 40000 އަށް އަރާނެ ކަމަށް ވެސް ވަނީ ލަފާކޮށްފަ އެވެ.
