ސްޕޭނުގެ ރަސްގެފާނު ފައިނަލް މެޗު ބައްލަވަން ޖަރުމަނަށް

ސްޕޭނުގެ ރަސްގެފާނު ފިލިޕް ހުއާން ޕަބްލޯ ޔޫރޯ ފުޓްބޯޅަ މުބާރާތުގެ ފައިނަލް މެޗު ބައްލަވަން ޖަރުމަނަށް ވަޑައިގަންނަވަން ނިންމަވައިފި އެވެ.

އާދީއްތަ ދުވަހުގެ ރޭ ކުޅޭ ފައިނަލް މެޗުގައި ސްޕޭން ވާދަކުރާނީ އިނގިރޭސިވިލާތާ އެވެ. މި މެޗަށް ނުކުންނައިރު ސްޕޭނަކީ މުބާރާތުގެ ހޮޓް ފެވަރިޓެވެ. އެ ގައުމު ފައިނަލަށް ދަތުރުކުރީ އެއްވެސް މެޗަކުން ބަލިނުވެ އެވެ.

ރަސްގެފާނު ފިލިޕް ވަނީ މި މުބާރާތުގައި ސްޕޭނާއި އިޓަލީ ބައްދަލުކުރި މެޗު ބެއްލެވުމަށް ވެސް ޖަރުމަނަށް ވަޑައިގަންނަވާފަ އެވެ. އަދި މެޗަށް ފަހު ޗޭންޖިން ރޫމަށް ވަޑައިގެން ކުޅުންތެރިންނާ ބައްދަލުކުރައްވައި ހިތްވަރު ދެއްވި އެވެ.

ފުޓްބޯޅަ އަށް ވަރަށް ބޮޑަށް ލޯބިކުރައްވާ ފިލިޕް އަކީ މިކަހަލަ ބޮޑު މުބާރާތްތަކުގައި އަބަދުވެސް ސްޕޭން ކުޅޭ މުހިންމު މެޗުތައް ބައްލަވަން ވަޑައިގަންނަވާ ބޭފުޅެކެވެ.

ސްޕޭންގެ ރަސްގެފާނު މެޗު ބައްލަވަން ވަޑައިގަންވާނެކަން އިއުލާނު ކުރެއްވިއިރު އިނގިރޭސި ރަސްގެފާނު ޗާލްސް މެޗު ބައްލަވަން ވަޑައިގަންނަވާނެކަން ބަކިންހަމް ޕެލަސްއިން އަދި ޔަގީންކޮށްނުދެ އެވެ. ނަމަވެސް އޭނާގެ ދޮށީ ދަރިކަލުން އަދި އިނގިރޭސި ފުޓްބޯޅަ އެސޯސިއޭޝަނުފެ ރައީސް ފްރިންސް ވިލިއަން މެޗު ބައްލަވަން ވަޑައިގަންނަވާނެ އެވެ.

ސްޕޭން ވަނީ މީގެ ކުރިން ތިން ފަހަރު މި މުބާރާތް ކާމިޔާބުކޮށްފަ އެވެ. މި ފަހަރު ތަށި ލިބިއްޖެނަމަ ސްޕޭންވާނީ މުބާރާތުގެ އެންމެ ކާމިޔާބު ޓީމަށެވެ.