މިއީ ސިއްރު ދައުލަތަކަށް ވެފައިވާ ކަމަށާއި އެހެން މީހުންނަށް ވިސްނަން ނޭނގޭ އެތައް ކަމެއް އެބަ ހިނގާ ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.
އޭނާ އެފަދައިން ވިދާޅުވީ ބުރާސްފަތި ދުވަހުގެ ރޭ ބޭއްވި ޕީއެންއެފްގެ ޖަލްސާގައި ވާހަކަދައްކަވަމުންނެވެ.
ކަންކަމުގެ މައުލޫމާތު ހާމަކުރުމުގައި ސަރުކާރުން ގެންގުޅޭ ސިޔާސަތު ރަނގަޅު ނޫން ކަމަށް ފާހަގަކުރައްވާ އެމަނިކުފާނު ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.
އަދި މައުލޫމާތު ހާމަކުރަން ސަރުކާރުން ދެކޮޅު ހަދަމުންދާ ކަމަށާއި ނާމާން އެތައް ކަމެއް ހިނގަމުންދާ ކަމަށް އެމަނިކުފާނު ވަނީ ވިދާޅުވެފައެވެ.
މީގެ އިތުރުން ގައުމުގެ އިގްތިޞާދީ ހާލަތާއި މެދު ވެސް ރަނގަޅު މައުލޫމާތު ސަރުކާރުން ފޯރުކޮށްދެމުންދާތީ އެކަމަށް ކުރީގެ ރައީސް ޔާމީން ވަނީ ފާޑު ވިދާޅުވެފައެވެ.
މި ސަރުކާރަކީ ދެ ފުށް ފެންނަ ސަރުކާރެއް ނޫންކަމަށް ފާހަގަކުރައްވާ ކުރީގެ ރައީސް ޔާމީން ވަނީ މި އަހަރުގެ މާލީ ހިސާބުތައް މާރޗް މަހުން ފެށިގެން ހާމަ ނުކުރައްވާކަމަށް ވިދާޅުވެފައެވެ.
މައުލޫމާތު ނުލިބިގެން ފިނޭންސާއި އެހެނިހެން ތަންތަނަށް ލިޔަން ޖެހޭ ކަމަށާއި ކޮންމެ މައުލޫމާތެއް ވެސް ސާފު ނުވެގެން އިންފޮމޭޝަން ކޮމިޝަނާއި ހިސާބަށް ދާން ޖެހޭ ކަމަށް އެ މަނިކުފާނު ވިދާޅުވިއެވެ.
އެއީ އުނދަނގޫ މަރުހަލާ އެއް ކަމަށް ފާހަގަކުރައްވާ ކުރީގެ ރައީސް ޔާމީން ވަނީ އެއީ "މުއިވަލަށް ވެއްޓުނު ގެރި" ނެގުން ކަހަލަ ކަމެއް ކަމަށް ސިފަކުރައްވާފައެވެ.
މި ސަރުކާރުން ސިއްރު ކުރަނީ ގައުމީ ސަލާމަތަށް ނުރައްކާވާ ކަންކަން އެކަނި ނޫން ކަމަށާއި އާއްމުންނާއި ގުޅުން ހުރި ތަފާސްހިސާބުތަކާއި މައުލޫމާތުތައް ވެސް ސިއްރުކުރަމުންދާ ކަމަށް އެމަނިކުފާނު ވިދާޅުވިއެވެ.
މީގެ އިތުރުން އިޤްތިޞާދު ގޯސްވެ ހިތި ބޭސް ބޯން ޖެހިދާނެކަމަށް ސަރުކާރުން ބުނި ނަމަވެސް އެކަމުގެ އަސަރު ކުރާނީ އާދައިގެ ރައްޔިތުންނަށް ކަމަށް އެމަނިކުފާނު ވަނީ ވިދާޅުވެފައެވެ.
ހިތިބޭސް ބޯން މި އަންގަނީ، މާލޭގެ ބޮޑުންނެއް ހިތި ބޭހެއް ނުބޯނެ. އެކަން ކުރާނީ ނިކަމެތި ރައްޔިތުން. އެކަން ބަދަލުކުރަން ހާލަތު ބަދަލުކުރަން ޖެހޭ. ސިއްރުކޮށްފައި ހުރި މައުލޫމާތު ހާމަކުރަން އެބަ ޖެހޭ.ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް![]()
އެމަނިކުފާނު ވަނީ އިގްތިޞާދީ ހާލަތު ގޯސް ނަމަ ވެރިކަމަށް ވަޑައިގެން ރައީސް ޑރ.މުއިއްޒު ބޮޑެތި ޚަރަދުތަކެއްް ކުރެއްވީ ކީއްވެގެންތޯ ސުވާލު އުފައްދަވާފައެވެ. އެގޮތުން ހުވާކުރަން 26 މިލިއަން، މުލިއާގެ މަރާމާތަށް 21 މިލިއަން ރުފިޔާ، ހިލާލީގެ އަށް 15 މިލިއަން ރުފިޔާ ޚަރަދުކުރީ ކީއްވެގެންތޯ ސުވާލުކުރެއްވިއެވެ. ހަމައެހެންމެ ތުރުކީން ޑްރޯންތައް ގަންނަން ހޭދަކުރި 500 މިލިއަން ރުފިޔާ ވެސް ވީ ބޭކާރު ކަމަށާއި އެކަމުގެ ނަތީޖާ އެއްވެސް ނުފެންނަ ކަމަށް ކުރީގެ ރައީސް ޔާމީން ވިދާޅުވިއެވެ. އެ މަނިކުފާނު އިތުރަށް ވިދާޅުވީ މާލެ އާއި ވިލިމާލެ އާއި ދެމެދު އޮތް ބްރިޖްގެ ޚަރަދަކީ މި ވަގުތަށް ކުރުން އެންމެ ރަނގަޅު ޚަރަދެއް ކަމަށް ޤަބޫލު ނުކުރައްވާ ކަމަށެވެ. އަދި އެމްޕީއެލް ވިއްކާލާ ވާހަކަ ދެކެވެމުންދާތީ އެއީ ސަރުކާރުން ނިންމާ ގޯސް ނިންމުމެއް ކަމަށް ފާހަގަކުރައްވާ އެކަމަށް ވެސް ފާޑު ވިދާޅުވިއެވެ.
މީގެ އިތުރުން އީދަށް ބޮކި ދިއްލުންމާއި، މަޖިލިސް އިންތިޚާބަށް ކުރި ހޭދަ އާއި ސަސްޕެންޝަންގައި ތިއްބެވި ނައިބު ރައީސުންނަށް ކުރި ޚަރަދުތަކަކީ ވެސް ކުރަން ނުޖެހޭ ބޭކާރު ޚަރަދުތައް ކަމަށް ކުރީގެ ރައީސް ޔާމީން ވިދާޅުވިއެވެ. އެ ހުރިހާ ކަމެއް ކުރެއްވީ ޤައުމުގެ ހާލަތު ރައީސް ޑރ.މުހައްމަދު މުއިއްޒު އަށް އެނގިވަޑައިގެން ހުންނަވާ ނޫންތޯ އެމަނިކުފާނު ވަނީ ސުވާލު އުފައްދަވާފައެވެ. ޔާމީން އިތުރަށް ވިދާޅުވީ ވެރިކަމަށް އަންނަ އިރު ކޮންމެ ސަރުކާރެއްގައި ވެސް ދަރަނި ހުންނަ ކަމަށެވެ. އެހެންކަމުން ވެރިކަމާއި ހަވާލުވަނީ އެކަން ވާނެ ކަމަށް ދެކިގެން ކަމަށާއި ވެރިކަމަށް އައިސް ދަރަނި ނުދެއްކޭނެ ކަމަށް ބުނުމަކީ ބަލައިގަނެވޭނެ ކަމެއް ނޫން ކަަމަށް އެ މަނިކުފާނު ވިދާޅުވިއެވެ.