ފަސް ލައްކައަށް ވުރެ ގިނަ ރުފިޔާ ފޭރިގަތް ސްކޭމްގެ މައްސަލަ އާ ގުޅިގެން އެކަކު ހައްޔަރުކޮށްފި

މީހަކަށް އޮޅުވާލައިގެން އެމީހާގެ އަމިއްލަ އެކައުންޓުންނާއި، އެމީހާގެ ބައިވެރިވުން އޮންނަ ޖަމިއްޔާގެ އެކައުންޓުން ފަސް ލައްކައަށް ވުރެ ގިނަ ރުފިޔާ ފޭރިގަތް މައްސަލައާ ގުޅިގެން އެކަކު ހައްޔަރުކޮށްފިއެވެ.

ބުރާސްފަތި ދުވަހު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި އެންޓި ސްކޭމްގެ ހެޑް އިންސްޕެކްޓަރ އޮފް ޕޮލިސް މަރިޔަމް ރަޝީދާ ވިދާޅުވީ ފަސްލައްކަ އަށްޑިހަ ހަތްހާސް ރުފިޔާގެ ސްކޭމްގެ މައްސަލައެއް ފުލުހުންނަށް ހުށަހަޅާފައިވާ ކަމަށެވެ.

މިމައްސަލައަކީ 12 ފެބްރުއަރީ 2024 ގައި އާއްމު ފަރުދަކަށް ނުދަންނަ ނަންބަރަކުން ގުޅައި ފްލެޓު ލިބިފައިވާ ކަމަށް ބުނެ އޮޅުވާލައި އީމެއިލް އެޑްރެސްގެ މައުލޫމާތު ހޯދައި ވިކްޓިމްގެ މޯބައިލް ނަންބަރު އީސިމްއަކަށް ބަދަލުކޮށް އިންޓަނެޓް ބޭންކިން ކޮންޕްރަމައިޒްކޮށް އަދި އިންޓެނެޓް ބޭންކިންގެ އެކްސެސް ހޯދައި ވިކްޓިމްގެ ޕަރސަނަލް އެކައުންޓުން 25000 ރުފިޔާއާ ވިކްޓިމްގެ ބައިވެރިވުން އޮންނަ ޖަމިއްޔާގެ އެކައުންޓުން ފަސްލައްކަ ފަސްކޮޅަސް ދެހާސް ރުފިޔާ ނަގާފައިވާ ކަމަށް ހުށަހެޅިފައިވާ މައްސަލައެއް ކަމަށެވެ. މިމައްސަލާގައި އެކަކު ހައްޔަރު ކުރެވިފައިވާ ކަމަށް އޭނާ ވިދާޅުވިއެވެ.

މިމައްސަލައާ ގުޅިގެން އިތުރު ތަފްސީލު ދެއްވަމުން އެންޓި ސްކޭމް ސެންޓަރުގެ ސްކޭމް އިންވެސްޓިގޭޝަންގެ ހެޑް އިންސްޕެކްޓަރ އޮފް ޕޮލިސް ޝާމް މުހައްމަދު ވިދާޅުވީ 587،149 ރުފިޔާ ނަގާފައިވާއިރު ބޭންކަށް މިމައްސަލަ ރިޕޯޓުކުރެވި މައްސަލައިން ވިކްޓިމްގެ އެކައުންޓުން 47 އިންސައްތަ ފައިސާ ސަލާމަތްވެ ޖަމިއްޔާގެ އެކައުންޓުން 42 އިންސައްތަ ފައިސާ ސަލާމަތް ކުރެވިފައިވާ ކަމަށެވެ.

ނިގުޅައިގަނެފައިވާ ފައިސާގެ ތެރެއިން 62 އިންސައްތަ ރާއްޖޭގެ އެކިކަންކޮޅުތަކުގައި ހުރި 8 އޭޓީއެމްއަކުން ފައިސާ ވިތްޑްރޯ ކޮށްފައިވާކަން ފާހަގަކުރައްވައި ޝާމް ވިދާޅުވީ 5 ވިޔަފާރިއަކުން އިލެކްޓްރޯނިކްސް އަގުބޮޑެތި މުދަލަށް ހޭދަކޮށްފައިވާކަން ފާހަގަކޮށްފައިވާ ކަމަށެވެ. އަދި ބޭނުން ނުކުރެވި ހުރި ފައިސާ 18 އިންސައްތަ ފައިސާ އެކައުންޓުތަކުގައި ފްރީޒް ކުރެވިފައިވާ ކަމަށް އޭނާ ވިދާޅުވިއެވެ.

މީގެ އިތުރުން ޝާމް ވިދާޅުވީ މިމައްސަލައާ ގުޅިގެން ކ.މާފުށި ޖަލުގެ ތިން ޔުނިޓެއް 16 ސެލްއެއް ބަލާ ފާސްކޮށްފައިވާ ކަމަށެވެ. އަދި ބަލާ ފާސްކުރުމުގެ ތެރެއިން 21 މޯބަލައިން ފޯނު، 10 ހެޑްސެޓް، ތިން ޔޫއެސްބީ ޗާޖަރު، އެއް ޕެންޑްރައިވް، އެކައުންޓް ނަންބަރު ތަކާއި މޯބައިލް ނަންބަރުތައް ނޯޓުކޮށް ހަދާފައިވާ 9 ފޮތް، ދެ ސިމް ކާޑު އަދި މެމޮރީކާޑެއް ފުލުހުންގެ ބެލުމުގެ ދަށަށް ގެނިވިފައިވާ ކަމަށް ޝާމް ވިދާޅުވިއެވެ.

ފުލުހުން ބުނީ މިސްކޭމް ހިންގާފައިވަނީ ގިނަ ބައެއްގެ ބައިވެރިވުމާއެކު ކަމަށާއި، މިމައްސަލަ އިތުރަށް ތަހުގީގު ކުރަމުންދާ ކަމަށެވެ.