ކ. މާލެ
|
11 ޖުލައި 2024 | ބުރާސްފަތި 02:19
މެޗުގައި ލަނޑު ޖެހުމަށްފަހު އިންގްލެންޑުގެ ކުޅުންތެރިން އުފާ ފާޅުކުރަނީ
މެޗުގައި ލަނޑު ޖެހުމަށްފަހު އިންގްލެންޑުގެ ކުޅުންތެރިން އުފާ ފާޅުކުރަނީ
ރޮއިޓާސް
ޔޫރޯ 2024
ނެދަލެންޑްސް ބަލިކޮށް، ޖެހި ޖެހިގެން ދެވަނަ ފަހަރަށް އިންގްލެންޑު ފައިނަލަށް
މެޗު އިންގްލެންޑުން ކާމިޔާބު ކުރީ ފަހަތުން އަރައި ދެ ލަނޑު ޖަހައިގެން، 2-1ންނެވެ.

ޖަރުމަނުގައި މިހާރު ކުރިއަށްދާ ޔޫރޯ ފުޓުބޯޅަ މުބާރާތުގެ ސެމީ ފައިނަލްގެ ދެ ވަނަ މެޗުގައި ނެދަލަންޑްސް ބަލިކޮށް، އިންގްލެންޑުން ފައިނަލްގެ ފަހު ޖާގަ ހޯދައިފި އެވެ.

ބުދަ ދުވަހުގެ ރޭ ދަންވަރު ކުޅުނު މެޗު އިންގްލެންޑުން ކާމިޔާބު ކުރީ ފަހަތުން އަރައި ދެ ލަނޑު ޖަހައިގެން، 2-1ންނެވެ.

މެޗު ފަށައިގެން ދެ ޓީމުގެ ފަރާތުން ވެސް ފެނުނީ ދާދި ހަމަހަމަ ކުޅުމެކެވެ. ދެ ޓީމުން ވެސް ވަނީ ލަނޑު ޖެހުމަށް މަސައްކަތްކޮށް، ފުރުސަތުތަކެއް ތަނަވަސްކޮށްފަ އެވެ.

މެޗު ފަށައިގެން ހަ ވަނަ މިނެޓުގައި ނެދަލެންޑްސް އިން ވަނީ ލަނޑު ޖަހައި ލީޑު ނަގައިފަ އެވެ. އިންގްލެންޑުގެ އޭރިޔާ ކައިރިން ޒަވީ ސިމޮންސް ފޮނުވާލި ބޯޅަ ގޯލަށް ވަނީ، އިންގްލެންޑުގެ ގޯލި ކީޕަރު ޖޯޑަން ޕިކްފޯޑުގެ އަތުގައި ޖެހިފަ އެވެ.

ނެދަލެންޑްސް އިން ލީޑު ނެގި ފަހުން އިންގްލެންޑަށް ވަނީ ނަތީޖާ ހަމަހަމަ ކުރުމަށް ފުރުސަތު ލިބިފަ އެވެ. އިންގްލެންޑުގެ ކެޕްޓަން ހެރީ ކޭން ފޮނުވާލި އެއް ބޯޅަ ނެދަލެންޑްސްގެ ކީޕަރު މަތަކުރިއިރު، އަނެއް ބޯޅަ ދިޔައީ ހުރަސް ދަނޑި މަތިން ބޭރަށެވެ.

އޭގެ ފަހުން ނެދަލެންޑްސްގެ އޭރިޔާ ތެރެއިން ކޭން އަށް ކުރި ފައުލަކަށް، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށްފަހު ރެފްރީ ވަނީ ޕެނަލްޓީ ދީފަ އެވެ. ޕެނަލްޓީ ކާމިޔާބުކޮށް، މެޗުގެ 17 ވަނަ މިނެޓުގައި އިންގްލެންޑަށް ނަތީޖާ ހަމަހަމަ ކޮށްދިނީ ކޭން އެވެ.

ނަތީޖާ ހަމަހަމަ ކުރި ލަނޑަށް ފަހި، އިންގްލެންޑުން ވަނީ ރަނގަޅަށް ކުޅެފަ އެވެ. އެ ޓީމުން ވަނީ މެޗުގައި އިތުރު ލަނޑު ޖަހާނެ ފުރުސަތުތަކެއް ހޯދައިފަ އެވެ. މެޗު އެއްވަރުވާން ދަނިކޮށް، މެޗުގެ ފުރިހަމަ ވަގުތު ހަަމަވެ އިތުރަށް ދެއްކި ވަގުތުގައި އިންގްލެންޑު މޮޅުވީ އޮލީ ވަޓްކިންސް ޖެހި ލަނޑުންނެވެ.

މޮޅާއެކު އިންގްލެންޑުން މުބާރާތުގެ ފައިނަަލަށް ގޮސްފައިވާއިރު، މި މަހުގެ 15 ވަނަ ދުވަހު ކުޅޭ ފައިނަލްގައި އެ ޓީމު ނިކުންނާނީ ސްޕެއިންއާ ދެކޮޅަށެވެ. މީގެ ކުރިން 2021 ވަނަ އަހަރު އަމިއްލަ ޤައުމުގައި އޮތް މުބާރާތުގެ ފައިނަލްގައި ވެސް އިންގްލެންޑު ވަނީ ކުޅެފަ އެވެ

އެންމެ ފަހުން އަޕްޑޭޓް ކުރީ: 5 ދުވަަސް ކުރިން
ރިވިއު ކުރީ: މަރިޔަމް އުހާމަތު
- ކޮމެންޓް