މާލީ ހާލަތު ގޯސްވެގެން ފިޔަވަޅު އަޅަން ފަށަންޖެހޭނީ ތިމާ ގާތުން، ކައުންސިލަރުން މަދުކުރުމަކީ ވި ވައުދާ ހިލާފުކަމެއް - އަނަސް

މާލީ ހާލަތު ގޯސްވެގެން ފިޔަވަޅު އަޅަން ފަށަންޖެހޭނީ ތިމާ ގާތުން ކަމަށާއި، ކައުންސިލަރުން މަދުކުރުމަކީ ކެމްޕޭނުގެ ތެރޭގައި ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދާ ހިލާފުކަމެއް ކަމަށް އެމްޑީޕީގެ ތަރުޖަމާނު އަނަސް އަބްދުއްސައްތާރު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އަނަސް ވިދާޅުވީ ރައީސް ޑރ. މުހައްމަދު މުއިއްޒު މިފަހުން ހުށަހަޅުއްވާނެކަމަށް ވިދާޅުވި ބައެއް ބަދަލުތަކުގައި، އުސޫލެއްގެ ގޮތުން ރަނގަޅު ބައެއް ވާހަކަތައް އެބަހުރިކަމަށެވެ. ރައީސް މުއިއްޒު އިންތިހާބުވެވަޑައިގެންފައި ހުންނެވީ ރައްޔިތުންނަށް ވެވަޑައިގެންނެވި ވައުދާއި މެނިފެސްޓޯގައި ހުރި ވައުދުތައް ރައްޔިތުންނާއި ހަމައަށް ހިއްސާކުރުމަށް ކަމަށެވެ. ނަމަވެސް އެ ހުށަހެޅުއްވި ހުށަހެޅުއްވުންތަކަކީ މެނިފެސްޓޯގައި އަދި ވައުދުވެވަޑައިގެންނެވި ކަންތައްތަކުގެ ތެރޭގައި ހިމެނޭ ކަންތައްތަކެއް ނޫން ކަަމަށެވެ.

Advertisement

އަނަސް ވިދާޅުވީ ކައުންސިލަރުންގެ އަދަދު މަދުކުރުމަކީ ކަންބޮޑުވެވަޑައިގަންނަވާ ކަމެއް ކަމަށާއި، އެމްޑީޕީ ނޫން ސިޔާސީ ޕާޓީއެއް ވެރިކަމުގައި އޮންނަކަމުގައިވާނަމަ، އެ ބައެއްގެ އަމާޒަކީ ލާމަރުކަޒީ އުސޫލުން އިދާރީ ދާއިރާތައް ހިންގުން ނޫން ކަމަށެވެ. އަނަސް ވިދާޅުވީ ރައީސް މުއިއްޒު ކެމްޕޭންގެ ތެރޭގައި ރަށްރަށަށް ވަޑައިގެން ކައުންސިލްތައް ބާރުވެރިކުރައްވާނެކަމަށް ވިދާޅުވި ކަމަށާއި، ނަމަވެސް އެ ވިދާޅުވި ކަންކަން ކުރައްވާތައް ފެނިވަޑައިނުގަންނަވާ ކަމަށެވެ.

އަނަސް ވިދާޅުވީ މި ސަރުކާރުގެ ސިޔާސީ މަގާމުތަކުގެ އަދަދު 2000 އާއި ގާތްކުރާ ކަމަށާއި، އެ ތުހުމަތުތަކަށް ޖަވާބުދާރީވުމުގެ ގޮތުން، ސިޔާސީ މަގާމުތަކުގެ އަދަދު އެނގިވަޑައިގަންނަވާ އަދި ހާމަކުރައްވާނެ ބޭފުޅެއް މި ސަރުކާރުގައި ނެތް ކަމަށެވެ. އަނަސް ވިދާޅުވީ ދައުލަތުގެ މާލީ ހާލަތު އޮތްގޮތަށް ބަލާފައި ފިޔަވަޅު އަޅާނަމަ އެންމެ ފުރަތަމަ ސިޔާސީ މަގާމުތައް މަދުކުރަންޖެހޭ ކަމަށެވެ.

އަނަސް ވިދާޅުވީ ސަރުކާރު ޖަވާބު ދާރީކުރުމަށް އެމްޑީޕީން ތަފާތު މަސައްކަތްތަކެއް ކުރަމުން އަންނަ ކަމަށާއި، މަޖިލިސް މެންބަރުން މަޖިލީހުގެ ތެރެއިން އެކަން ކުރަމުން އަންނަ އިރު ރައްޔިތުންވެސް ދަނީ އަމިއްލައަށް ވެސް ސަރުކާރު ޖަވާބުދާރީކުރުމަށް މަސައްކަތްތަކެއް ކުރަމުން ކަމަށެވެ. ނަމަވެސް މައުލޫމާތު ހޯދުމަށް އާރުޓީއައި ލައިގެންވެސް މި ސަރުކާރުން ދެނީ ބީރު ކަންފަތެއް ކަމަށެވެ.