އެމްޑީޕީ ޖަލްސާގައި ގުރުއާން ކިޔެވި މުވައްޒަފު އެޗްޑީސީގެ ވަޒީފާ އިން ވަކި ކޮށްފި

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ އޮޕަރޭޝަންސް އޮފިސަރުގެ މަގާމުގައި ހުރި އަހްމަދު ޝާޖިން، އޮފީހަށް ނުނިކުންނަ ކަމަށް ބުނެ ކުންފުނީގެ ވަޒީފާއިން އޭނާ ވަކި ކޮށްފިއެވެ.

"އެކްސް" ގައި އާންމު ކޮށްފައިވާ އޭނާ ވަޒީފާ އިން ވަކި ކުރި ސިޓީގައި ބުނެފައިވަނީ، ޗުއްޓީ ހަމަ ވުމަށް ފަހު ޖެހިޖެހިގެން ތިން ދުވަހު ވަޒީފާ އަށް ނުނިކުތުމާ ގުޅިގެން ވަޒީފާ އިން ވަކި ކުރީ ކަމުގައެވެ.

ހޯމަ ދުވަހު ވަޒީފާ އިން ވަކި ކުރި ލިޔުން ފޮނުވި މުވައްޒަފަކީ، މިދިޔަ ބުރާސްފަތި ދުވަހުގެ ރޭ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ބޭއްވި ހަރުގެ ޖަލްސާގައި ގުރުއާން ކިޔެވި ފަރާތް ކަން ފާހަގަ ކުރެވެއެވެ.

މި މައްސަލަ އާ ގުޅިގެން އެމްޑީޕީގެ ޗެއާޕާސަން ނައިބު އިދާރީ އިބްރާހިމް ވަހީދު ވިދާޅުވީ، މިއީ މުއިއްޒްގެ ސަރުކާރުން އެމްޑީޕީގެ ޖަލްސާތަކުގައި ބައިވެރިވާ މީހުންނަށް ބިރު ދެއްކުމުގެ ގޮތުން ކުރި ކަމެއް ކަމަށެވެ.

"ރިޔާސީ އިންތިޚާބު ކެމްޕެއިންގެ ތެރޭގައި އެމްޑީޕީން ބުނަމުން ދިޔައީ މުއިޒްގެ ސަރުކާރެއްގައި ރައްޔިތުންނަށް އަނިޔާވެރިވާނެ ކަމަށް،" އިބްރާހީމް ވަހީދު "އެކްސް" ގައި ވިދާޅުވެފައިވެއެވެ.

އެޗްޑީސީގެ ސިޓީގައި ބުނެފައިވަނީ އެ ކުންފުނީގެ ޑިސިޕްލިނަރީ އުސޫލުގެ ތެރޭގައި އެއްވެސް މުވައްޒަފަކު ސަބަބެއް ނެތި އަހަރެއްގެ ތެރޭގައި ތިން ދުވަހު މަސައްކަތައް ނުނިކުމެއްޖެ ނަމަ ވަޒީފާއިން ވަކި ކުރުމުގެ އިހުތިޔާރު ކުންފުންޏަށް ލިބިގެންވާ ކަމަށެވެ.