އެސެޓް ރިކަވަރީގެ ޤާނޫނެއް ހުށަހަޅާ، ދައުލަތަށް ލިބެން ޖެހޭ ފައިސާ ނުލިބި އޮތުން ނިމުމަކަށް ގެންނާނަން - ރައީސް ޑރ. މުއިއްޒު
8 ޖުލައި 2024 | ހޯމަ 01:40ރައީސް މުއިއްޒު ވިދާޅުވީ ކޮރަޕްޝަނާއި ހިޔާނާތުގެ ސަބަބުން ދައުލަތަށް ގެއްލޭ ފައިސާ ހޯދުމަށް މިހާރު ހުރި ޤާނޫނުތަކުން އެންމެ ރަނގަޅަށް މަގުފަހި ނުވާ ކަަމަށް
ރައީސުލްޖުމްހޫރިއްޔާގެ އޮފީސް
އެސެޓް ރިކަވަރީގެ ޤާނޫނެއް ހުށަހަޅާ، ދައުލަތަށް ލިބެން ޖެހޭ ފައިސާ ނުލިބި އޮތުން ނިމުމަކަށް ގެންނަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެންސީގެ ހަރުގެ ޖަލްސާގައި ވާހަކަދައްކަވަމުން ރައީސް މުއިއްޒު ވިދާޅުވީ ކޮރަޕްޝަނާއި ހިޔާނާތުގެ ސަބަބުން ދައުލަތަށް ގެއްލޭ ފައިސާ ހޯދުމަށް މިހާރު ހުރި ޤާނޫނުތަކުން އެންމެ ރަނގަޅަށް މަގުފަހި ނުވާ ކަަމަށެވެ.
ދައުލަތަށް ގެއްލިފައި ހުރި ފައިސާ އަކީ ރައްޔިތުންގެ ފައިސާ ކަަމަށާއި އެ ފައިސާ އަނބުރާ ހޯދެން ޖެހޭ ކަމަށް ރައީސް ވަނީ ވިދާޅުވެފައެވެ. އަދި ކޮރަޕްޝަންގެ ނުބައި އަމަލުތައް ހިންގާ މީހުންނާއި އެކަމުގައި ބައިވެރިވާ މީހުން ޖަވާބުދާރީކޮށް އިންސާފުގެ ކުރިމައްޗަށް ގެންނަން ޖެހޭ ކަމަށް ވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ އެފަދަ ކުށްތަކުގައި ޝާމިލްވާ މީހުންނަށް ހައްގު އަދަބު ލިބެންޖެހޭ ކަމަށެވެ. އެސެޓް ރިކަވަރީ ޤާނޫނެއް އެކުލަވާލައްވާނެ ކަމަށް ވިދާޅުވި ނަމަވެސް އެކަމުގެ އިތުރު ތަފްސީލެއް އެމަނިކުފާނު ހާމައެއް ނުކުރައްވައެވެ.
ރައީސް ވިދާޅުވީ އެސެޓް ރިކަވަރ ކުރުމުގެ މަސައްކަތް ކުރާނީ ރާއްޖެއިން ބޭރުގައި ރައްކާކޮށްފައި ހުރި ފައިސާ ހޯދަން މަގުފަހިވާ ގޮތަކަށް ކަމަށެވެ. އެކަން އެގޮތަށް ކޮށްގެން ނޫނީ އެސެޓް ރިކަވަރކުރުމުގެ ރަނގަޅު ނަތީޖާ އެއް ހާސިލް ނުވާނެ ކަމަށް އެމަނިކުފާނު ސިފަކުރެއްވިއެވެ. އިތުރަށް ވާހަކަދައްކަވަމުން އެމްއެމްޕީއާރްސީގެ ހިޔާނާތުން ގެއްލުނު ފައިސާ ހޯދާ އެ ޚިޔާނާތުގެ ބައިވެރިން އިންސާފުގެ ކުރިމައްޗަށް ގެންނާނެ ކަމަށް ރައީސް ވަނީ ވިދާޅުވެފައެވެ.
