ރައްޔިތުން ތަމްސީލްކުރަން ގިނަ މީހުން ކައުންސިލްގައި ތިބޭކަށް ނުޖެހޭ، ކައުންސިލްގެ ސައިޒްކުޑަކުރަން ހުށަހަޅާނަން - ރައީސް ޑރ.މުއިއްޒު

ރައްޔިތުން ތަމްސީލްކުރަން ގިނަ މީހުން ކައުންސިލްގައި ތިބެން ނުޖެހޭ ކަމަސާއި ކައުންސިލްގެ ސައިޒްކުޑަކުރަން ޤާނޫނަށް އިސްލާހު ހުށަހަޅުއްވާނެ ކަަމަށް ރައީސް ޑރ.މުހައްމަދު މުއިއްޒު ވިދާޅުވިއެވެ.

އެމަނިކުފާނު އެފަދައިން ވިދާޅުވީ އާދިއްތަ ދުވަހުގެ ރޭ ބޭއްވި ޕީއެންސީގެ ޖަގަހަ ޖަލްސާގައި ވާހަކަދައްކަވަމުންނެވެ.

އެމަނިކުފާނު ވިދާޅުވީ ގިނަ އަދަދެއްގެ ކައުންސިލަރުން ތިއްބެވުމުން ދައުލަތުގެ ބަޖެޓުން އެ ފަރާތްތަކަށް މުސާރަ ދިނުމަށް ވަރަށް ބޮޑު ހޭދައެއް ކުރަން ޖެހޭ ކަަމަށެވެ. އެއީ އެންމެ އެކަށީގެންވާ ގޮތް ކަމަށް ޤަބޫލު ނުކުރައްވާ ކަމަށް ރައީސް މުއިއްޒު ވިދާޅުވިއެވެ.

ކައުންސިލްތައް ނުކަތާ މިންވަރަށް ބޮޑުވެފައިވާ ކަމަށާއި އެއީ ޚާރަދު ބޮޑު ނިޒާމެއް ކަމަށް ވެސް ރައީސް މުއިއްޒު ވިދާޅުވިއެވެ. މީގެ އިތުރުން ރަށެއްގެ 300 މީހުން 500 މީހުންގެ ރަށެއްގައި 3 މީހުން 5 މީހުން ހޮވުމަކީ އެންމެ ރަނގަޅު ގޮތް ނޫން ކަމަށް އެމަނިކުފާނު ވިދާޅުވިއެވެ.

ކުދި އާބާދީތައް ހުންނަ ރަށްރަށުގައި ކައުންސިލުގައި ރައީސާއި ނައިބު ރައީސް ތިބުމުން ފުދޭނެ ކަމަށާއި އާބާދީގެ މިންވަރަށް ބެލުމަށް ފަހު އެއަށް ވުރެ ކުޑަ ތަންކޮޅެއް މެމްބަރުން ކައުންސިލަށް އިތުރުކުރުން އެންމެ ރަނގަޅުކަމަށް ޤަބޫލުކުރައްވާ ކަމަށް ރައީސް ވިދާޅުވިއެވެ. އަދި ސިޓީތަކުގައި އެހެން ހިސާބުތަކަށް ވުރެ އިތުރަށް ކައުންސިލް މެމްބަރުން ތިބުން ރަނގަޅު ކަމަށް ވެސް ވިދާޅުވިއެވެ.

ރައީސް ވަނީ އަތޮޅު ކައުންސިލްތައް ހޮވާގޮތަކީ މާނައެއް ނެތް ގޮތެއް ކަމަށް ސިފަކުރައްވާފައެވެ. މިހާރު އެކަން ކުރާ ގޮތުން އަަތޮޅު ކައުންސިލަރުން ވާހަކަދައްކަނީ ވަކި ރަށެއްހެ މަސްލަހަތުގައި އެކަނި ކަމަށާއި އެ ނިޒާމަށް ވެސް ބަދަލުތަކެއް ގެންނަން ޖެހޭ ކަމަށް މުއިއްޒު ވިދާޅުވިއެވެ.

މިގޮތަށް ކަންކަން ބަދަލުކުރުމުން ލާމަރުކަޒީ ނިޒާމް ރައްޔިތުންނަށް އެންމެ ފައިދާ ހުރި ގޮތުގައި ހިނގާނެ ކަމަށް އެމަނިކުފާނު ވަނީ ވިދާޅުވެފައެވެ. އަދި އެ ނިޒާމް ޚަރަދުކުޑަކުރުމަކީ ރައްޔިތުންނަށް އެންމެ ރަނގަޅު ގޮތް ކަމަށާއި އެކަމުގެ ސަބަބުން ބަޖެޓުން ބޮޑު ބައެއް ޚަރަދު ކުޑަ ވެގެންދާނެ ކަމަށް އެ މަނިކުފާނު ވިދާޅުވިއެވެ.

ރައީސްގެ އެ ވާހަކަފުޅުތަކަކީ ލާމަރުކަޒީ ނިޒާމްގެ ބާރު ކަނޑުވާލުން ކަމަށް ބައެއް އާއްމުންނާއި ސިޔާސީ ފަރާތްތަކުން ވެސް ދަނީ ސިފަކުރަމުންނެވެ. އެގޮތުން އެމްޑީޕީގެ ރައީސް އަބްދުﷲ ޝާހިދު ވަނީ ލާމަރުކަޒީ ނިޒާމުގެ ޅަފަތުގައި، ރައްޔިތުންގެ ބާރު ކަނޑުވާލަން، އަނެއްކާވެސް ރަށްރަށުގެ ޢާންމުހާލަތު ސާފުނުވާ ބަޔަކު މާލޭގެ ފިނިކޮޓަރީގައި ތިބެގެން ރަށްރަށުގެ ކަންހިންގުމުގެ ބާރު އެފިނިކޮޓަރިއަށް ޖަމާކުރުމަށް އެއްބަސް ނުވެވޭނެ ކަމަށެވެ. އަދި ދައުލަތުގެކަންކަން ހިންގަންނޭގިގެން ޤައުމު ބަނގުރޫޓުގެ މަގަށްފުރޮޅެންފެށީމައި ލާމަރުކަޒީ ނިޒާމު ނެތިކޮށްލުމަކީ ގޮތެއް ނޫން ކަމަށް ވެސް އެމަނިކުފާނު ވިދާޅުވިއެވެ. އެމަނިކުފާނު އެފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

ކައުންސިލްތަކުގެ ސައިޒް ބޮޑުވެގެން އެކަން ބަދަލުކުރައްވާނެކަން ރައީސް ހާމަކުރެއްވި އިރު މި ސަރުކާރުން ވަނީ ލޯކަލް ގަވަމެންޓް މިނިސްޓްރީ އެއް އުފައްދާފައެވެ. އެ ވުޒާރާ އާއި ލޯކަލް ގަވަމެންޓް އޮތޯރިޓީގެ މަސައްކަތްތައް ދާދި އެއްގޮތްވުމުން އެއީ ސަރުކާރުން ކުރާ ބޭކާރު ޚަރަދެއްގެ ގޮތުގައި ބައެއް އާއްމުން ދަނީ ސިފަކުރަމުންނެވެ. އަދި ޕީޕީއެމް އާއި ޕީއެންސީ ވެރިކަމަށް އަންނަ ކޮންމެ ފަހަރަކު ލާމަރުކަޒީ ނިޒާމް ފުނޑާލާކަމަށް ބުނެ އާއްމުން ދަނީ އެ ނިންމުމަށް ފާޑުކިޔަމުންނެވެ.