ޚާން ޔޫނިސްގެ "ރައްކައުތެރި ސަރަހައްދު" އަކަށް އިޒްރޭލް ސިފައިން އަންގާރަ ދުވަހު ވައިގެ މަގުން ހަމަލާދީ ފަލަސްތީނުގެ 12 މީހުން މަރާލައިފިއެވެ.

މި ހަމާލާގައި އެއް އާއިލާގެ ނުވަ މެމްބަރުން މަރުވި ކަމަށް އެސޯސިއޭޓެޑް ޕްރެސް އިން ބުނެފައިވެއެވެ.

އިޒްރޭލުން އަންގަމުންދަނީ ޚާން ޔޫނިސްގެ އިރުމަތީ ސަރަހައްދުން މީހުން ވަގުތުން ފައިބައިގެން ދިއުމަށެވެ. އެއާ އެކު ގެދޮރު ދޫކޮށްލަން ޖެހުމުގެ ސަބަބުން އެތައް ހާސް ބަޔަކު މަގުމަތިވެފައިވާ ކަމަށް ރިޕޯޓުތައް ބުނެއެވެ.

އދ. އިން ލަފާ ކުރާ ގޮތުގައި ޚާން ޔޫނިސް އިން މީހުން ފައިބަން އިޒްރޭލުން އޯޑަރު ނެރުމުން މަދުވެގެން 250،000 މީހުން މަގުމަތިވެ ވަޒަން ގެއްލިފައިވާ މީހުންގެ ގޮތުގައި ވެގެން ދާނެއެވެ. ޚާން ޔޫނިސް އިން މީހުން ނުކުންނަން އިޒްރޭލުން އަންގަމުން ދާއިރު، މިހާރުވެސް ފަލަސްތީނުގެ 1.9 މިލިއަން މީހުންނަށް ވުރެ ގިނަ މީހުންނަކީ އަމިއްލަ ވަޒަން ގެއްލިފައިވާ މީހުންގެ ގޮތުގައި އދ އިން އަންދާޒާ ކުރެއެވެ.

ޚާން ޔޫނިސް އިން މީހުން ފައިބަން އެންގުމާއެކު އެ ސަރަހައްދުގެ ޔޫރަޕިއަން ހޮސްޕިޓަލުގައި ފަރުވާ ހޯދަން އެނދުމަތި ކޮށްފައި ތިބި ޒަޚަމްވެފައިވާ މީހުންނާއި ބަލި މީހުން މަޖުބޫރު ވެގެން ހޮސްޕިޓަލުން ވަނީ ނެރެފައެވެ. ޑަބްލިޔުއެޗްއޯ އިން ބުނެފައިވާ ގޮތުގައި އެ ހޮސްޕިޓަލުގައި ބާކީ މިހާރު ތިބީ އެންމެ 3 މީހުންނެވެ.

އިޒްރޭލުގެ ހަމަލާތައް ދޭ ތަނަކަށް ހޮސްޕިޓަލް ނުހެދުމަށް ޑަބްލިޔުއެޗްއޯ އިން އިޒްރޭލުގެ ކިބައިން އާދޭސް ކުރަމުންދާ ކަމަށް ޑަބްލިޔުއުޗްއޯގެ މަންދޫބް އާ ހަވާލާދީ އަލްޖަޒީރާ އިން ބުނެފައިވެއެވެ.

އަނެއްކޮޅުން، ހުޅަނގު އައްސޭރީގެ ނޫރް ޝަމްސް ރެފިއުޖީ ކޭމްޕަށްވެސް މި ދިޔަ 24 ގަޑިއިރުގެ ތެރޭގައި އިޒްރޭލް ސިފައިން ވައިގެ މަގުން ވަނީ ހަމަލާ ދީފައެވެ. މި ހަމަލާގައި އެ ކޭމްފުގައި ދިރިއުޅޭ 6 މީހުން ވަނީ މަރުވެފައެވެ. އޭގެ ތެރޭގައި އަންހެނަކާ ކުޑަކުއްޖަކުވެސް ހިމެނެއެވެ.

ޔަހޫދީ ސިފައިން ގާޒާ އަށް އަރާ ދެމުންދާ ހަމަލާތަކުގައި ހުސްވި އަހަރުގެ އޮކްޓޯބަރު 7 ވަނަ ދުވަހުން ފެށިގެން މިހާތަނަށް 37،925 މީހުން ވަނީ ފަލަސްތީނުން މަރުވެފައެވެ. ޒަޚަމްވި މީހުންގެ އަދަދު 87،141ށް ވަނީ އަރާފައެވެ. މި މުއްދަތުގައި ފަލަސްތީނުގެ ހަމާސް އިން އިޒްރޭލަށް ދިން ހަމަލާތަކުގައި އިޒްރޭލުން މަރުވެފައިވަނީ 1،139 މީހުންނެވެ.