ވާނުވާ ބަންދު އުވާލާނެ ވަކި ދުވަހެއް ބުނަން ނޭނގޭ، އެކަމަށް އެދި ފޮނުވާނީ އޭޖީ އޮފީހުން - އަޒާން
މުޒާހަރާގެ ބައިވެރިން ވަނީ ވާނުވާ ބަންދަކީ އަނިޔާ އެއް ކަމަށާއި އެކަން ނިމުމަކަށް ގެންނަން ޖެހޭ ކަމަށް ބުނެފަ
މެމްބަރު އަޒާން (ވ) އަދި މެމްބަރު އިމްރާން (ކ) މުޒާހަރާގެ ބައިވެރިންނާއި ވާހަކަދައްކަނީ
ވާނުވާ ބަންދު އުވާލާނެ ވަކި ދުވަހެއް ބުނަން ނޭނގޭ ކަމަށާއި އެކަމަށް އެ ބަދަލު ގެނައުމަށް ހުށަހެޅުމަކީ އެޓަރނީ ޖެނެރަލްގެ އޮފީހުން ކުރައްވާ ކަމެއް ކަމަށް ހިތަދޫ މެދު ދާއިރާގެ މެމްބަރު އަހުމަދު އަޒާން މަރްޒޫޤް ވިދާޅުވެއްޖެއެވެ.
އަޒާން އެފަދައިން ވިދާޅުވީ ޕްރޮސެކިއުޓަރ ޖެެނެރަލް ހުސެއިން ޝަމީމް މަޤާމުން ވަކިކުރުމަށާއި ކުށް ސާބިތު ނުވާ މީހުން ޝަރީއަތް ނިމެންދެން ބަންދުގައި ބޭތިއްބުން، ނުވަތަ އާއްމު ބަހުރުވައިން ނަމަ ވާނުވާ ބަންދު އުވާލުމަށް ގޮވާލާ މަޖިލިސް ކައިރީގައި އާއްމުން ކުރި މުޒާހަރާގެ ބައިވެރިންނާއި މުޚާތަބުކޮށް ވާހަކަދައްކަމުންނެވެ.
މުޒާހަރާގެ ބައިވެރިން ވަނީ އަޒާން މަޖިލިސް ކައިރީގައި ހުންނަވަނިކޮށް، މީގެ ކުރިން އަޒާން އަކީ ވެސް ވާނުވާ ބަންދާއި ދެކޮޅަށް އަޑު އުފުލި މީހެއް ކަމަށާއި މިއަދު މަޖިލީހުގައި އެކަމަށް ވަކާލާތު ނުކުރައްވަނީ ކީއްވެތޯ ސުވާލުކޮށްފައެވެ. މީގެ އިތުރުން ޕީޖީ ޝަމީމް ވަކިކުރަން ގޮވާލި ފަރާތްތަކުން އައީ މިހާރުގެ މަޖިލީހުގެ ރައީސް އަބްދުއްރަހީމް އަބްދުﷲ އާއި ޝަމީމް އާއި ދެމެދު ގޮތް ނޭނގޭ ޑީލްތަކެއް ހަދާފައިވާ ކަމަށް ތުހުމަތުކުރަމުންނެވެ. އެކަމާއި ގުޅޭގޮތުން މެމްބަރު އަޒާން އާއި މުޒާހަރާގެ ބައިވެރިން ސުވާލުކުރުމުން އޭނާ ވިދާޅުވީ އެފަދަ މައުލޫމާތެއް އެނގިވަޑައިގަންނަވާފައި ނެތް ކަމަށެވެ. އަދި ސޯޝަލް މީޑިއާގައި ދެކެވޭ ހުރިހާ ވާހަކައަކީ ތެދެއް ނޫން ކަމަށް ފާހަގަކުރައްވާ އަޒާން ވިދާޅުވީ އެ ސުވާލަށް ޖަވާބު ދިނުމަށް އެންމެ ރަނގަޅު ބޭފުޅަކީ އޭނާ ކަމަށް ޤަބޫލު ނުކުރައްވާ ކަމަށެވެ.
މުޒާހަރާގެ ބައިވެރިން ވަނީ ސަރުކާރުގެ މެމްބަރުންނާއި ބައްދަލުކުރުމަށް ޑިމާންޑްކޮށްފައެވެ. މުޒާހަރާގެ ބައިވެރިންނާއި އެންމެ ފުރަތަމަ ބައްދަލުކުރެއްވީ ހެންވޭރު ދެކުނު ދާއިރާގެ މެމްބަރު ހުސެއިން އިމްރާން ލަތީފްއެވެ. އޭނާ ވަނީ މުޒާހަރާގެ ބައިވެރިންނަށް މަޝްވަރާގެ މޭޒަށް އައުމަށް ދައުވަތުދެއްވާފައެވެ. އެ މުޒާހަރާގެ ބައިވެރިންގެ ޝަކުވާތަކާއި ގުޅުން ހުރި ކަންތައްތަކަކީ މިހާރުވެސް ޕީއެންސީގެ ޕީޖީ ގްރޫޕްގެ ތެރޭގައި ވާހަކަދައްކަމުންދާ ކަންތައްތައް ކަމަށް އިމްރާން ވަނީ ވިދާޅުވެފައެވެ. އަދި މުޒާހަރާގެ ބައިވެރިންގެ ޑިމާންޑްތަކަށް އެދެވޭ ޖަވާބެއް ދެވޭނީ މަޝްވަރާގެ މަތިން ކަމަށް އިމްރާން ވިދާޅުވިއެވެ. މުޒާހަރާކުރުމަކީ އޭގެ ޒާތުގައި މައްސަލަ އެއް ނޫން ކަަމަށް ވީ ނަމަވެސް މުޒާހަރާގެ ބައިވެރިން ބޭނުންވާ ކަންކަމަކީ މަގުމަތިން ހައްލު ލިބޭނެ ޒާތުގެ ކަމެއް ކަމަށް ނުބެލެވޭ ކަމަށް އިމްރާން ވިދާޅުވިއެވެ.
ޕީއެންސީގެ ވެރިކަމެއްގައި ޝަރުއީ ނިޒާމަށް ގެންނަ އިސްލާހުތަކުގެ ތެރެއިން ވާނުވާ ބަންދު އުވާލާނެ ކަމަށް މިހާރުގެ ރައީސް ޑރ. މުހައްމަދު މުއިއްޒު ވަނީ ރިޔާސީ އިންތިޚާބުގެ ކެމްޕެއިން ދުވަސްވަރު ވައުދުވެވަޑައިގަންނަވާފައެވެ. ތ. ތިމަރަފުއްޓަށް ވަޑައިގެން އެރަށު ރައްޔިތުންނާ ބައްދަލުކުރައްވައި ވާހަކަދައްކަވަމުން މުއިއްޒު ވަނީވީ ވާނުވާ ނޭނގުމުގެ ތެރޭގައި އެތައް އަހަރެއް ބަންދުގައި ހުންނަން ޖެހުމަކީ އިންސާފެއް ނޫން ކަމަށް ވިދާޅުވެފައެވެ. މުއިއްޒު ވިދާޅުވީ އެމަނިކުފާނުގެ ވެރިކަމުގައި މީހަކާމެދު ގޮތެއް ނުނިންމައި ބަންދުގައި ބެހެއްޓޭނީ ގިނަވެގެން 48 ގަޑިއިރު ވަންދެން ކަމަށެވެ.
ހޯމަ ދުވަހު އާއްމުން މުޒާހަރާކޮށްފައި ވަނީ އެ ވައުދު ފުއްދަން މަސައްކަތް ނުކުރާ ކަމަށް ބުނެއެވެ. މުޒާހަރާގެ ބައިވެރިން ވަނީ ވާނުވާ ބަންދަކީ އަނިޔާ އެއް ކަމަށާއި އެކަން ނިމުމަކަށް ގެންނަން ޖެހޭ ކަމަށް ބުނެފައެވެ. އަދި އެ ވައުދު ނުފުއްދާ ނަމަ މުޒާހަރާތައް ކުރިއަށް އޮތްތާގަވެސް ކުރާނެ ކަަމަށާއި ދެން މުޒާހަރާކުރާނީ އެއްވާ މީހުންގެ އަދަދު އިތުރުކޮށްގެން ކަމަށް މުޒާހަރާގެ ބައިވެރިން ވަނީ ބުނެފައެވެ. 11:30ގައި ފެށި އެ މުޒާހަރާ ނިންމާލީ މެންދުރު ނަމާދު ބަންގިވަގުތަށެވެ. ޖަލުގައި ލިބޭ އަނިޔާ އާއި ދެކޮޅަށް ވެސް އެ މުޒާހަރާގައި ވަނީ އަޑު އުފުލާފައެވެ.
