ދެކުނު އެމެރިކާ ސަރަހައްދުގެ ފުޓުބޯޅަ މުބާާރާތް (ކޮޕާ އެމެރިކާ)ގެ ގްރޫޕް ސްޓޭޖުގައި ފަހު މެޗުގަައި ޕެރޫ ބަލިކޮށް، އާޖެންޓީނާ އިން ފުރިހަމަ ރެެކޯޑެއް ހޯދައިފި އެވެ.

އާދިއްތަ ދުވަހުގެ ފަތިހު ޕެރޫއާ ދެކޮޅަށް ނިކުތްއިރު ވެސް، އެންމެ ފަހުގެ ޗެމްޕިއަން އާޖެންޓީނާ އަށް ވަނީ މުބާރާތުގެ ކުއާޓާ ފައިނަލުން ޖާގަ ލިބިފަ އެވެ. އެއީ ގްރޫޕް ސްޓޭޖުގައި ކުޅުނު ދެ މެޗުން މޮޅުވެފައި އޮތުމުންނެވެ.

ޕެރޫއާ ދެކޮޅަށް އާޖެންޓީނާ އިން ކުޅުނު މެޗުގައި ކެޕްޓަން ލިއޮނަލް މެސީ ނުކުޅެ އެވެ. އެއީ ކުރީ މެޗުގައި މެސީ އަށް ކޮންމެ ވެސް ވަރަކަށް އަނިޔާވެފައި ހުރުމުން، ކުއާޓާ ފައިނަލްގެ މެޗަށް އޭނާ އަށް ފުރުސަތު ދިނުމުގެ ގޮތުންނެވެ.

މެޗުގައި އާޖެންޓީނާ އިން އެ ޓީމުގެ ލަނޑުތައް ޖެހީ ފަހު ހާފުގަ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި އާޖެންޓީނާ އަށް ލީޑު ނަގައިދިނީ ލައުޓާރޯ މާޓިނޭޒް އެވެ. އޭގެ ފަހުން 72 ވަނަަ މިނެޓުގައި އާޖެންޓީނާގެ ލިއާންޑްރޯ ޕަރޭޑަސް އަށް ވަނީ ލަނޑު ޖަހާނެ ފުރުސަތު ލިބިފަ އެވެ. އާޖެންޓީނާ އަށް ލިބުނު ޕެނަލްޓީ ޕަރޭޑަސް ފޮނުވާލި ނަމަވެސް، އެ ބޯޅަ އަމާޒުވީ ގޯލުގެ ދަނޑިއާ އެވެ. މެޗުގައި އާޖެންޓީނާގެ ދެ ވަނަ ލަނޑު 86 ވަނަ މިނެޓުގައި ޖެހީ މާޓިނޭޒް އެވެ.

އާޖެންޓީނާ އަކީ މުބާރާތުގެ އެންމެ ފަހުގެ ޗެމްޕިއަނުންނެވެ. މިއަހަރުގެ މުބާރާތާ ކުރިމަތިލީއިރު، އާޖެންޓީނާ އޮތީ ވެސް ވަރަށް ފޯމުގަ އެވެ. އެ ޓީމަކީ މިއަހަރުގެ މުބާރާތުގެ އެންމެ ބޮޑު ފޭވަރިޓުންނެވެ.