ޝަމްނާޒް މަޤާމުން ވަކިކޮށް، ރަމީޒް ސަސްޕެންޑްކޮށްފި
ޝާމްނާޒް މަޤާމުން ވަކިކޮށްފައި ވަނީ ޖޫން މަހުގެ 26 ވަނަ ދުވަހު
ޝަމްނާޒް އަދި ރަމީޒު. އެކުގައި ނަގާފައިވާ ފޮޓޯ އެއް
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަށް ސިހުރު ހެދިކަމުގެ ތުހުމަތުގައި ހައްޔަރުކޮށްފައިވާ ފާތިމަތު ޝަމްނާޒް ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރު ކަމުން ވަކިކޮށް، އޭނާގެ ކުރީގެ ފިރިމީހާ އަދި ރައީސް އޮފީހުގެ މިނިސްޓަރު އާދަމް ރަޒީމު ވަޒީރުކަމުން ސަސްޕެންޑްކޮށްފިއެވެ.
ރަމީޒަކީ މީގެ ކުރިން ރައީސް ޑރ.މުއިއްޒުގެ ވަރަށް އަރިސް ބޭފުޅެއްކަން ފާހަގަކޮށްލެވެއެވެ. ރަމީޒު ސަސްޕެންޑްކޮށްފައިވާކަން ރައީސް އޮފީހުން ވަނީ ކަށަވަރުކޮށްދީފައެވެ.
އެހެންނަމަވެސް އޭނާ ސަސްޕެންޑް ކުރީ ކޮން މައްސަލަ އަކާއި ގުޅިގެންކަން އަދި ހާމައެއް ނުކުރެއެވެ.
ޝަމްނާޒް މަޤާމުން ވަކިކޮށްފައި ވަނީ ޖޫން މަހުގެ 26 ވަނަ ދުވަހުއެވެ. އަދި އޭނާ މިހާރު ހިމަނާފައި ވަނީ ކުރީގެ ސްޓޭޓް މިނިސްޓަރެއްގެ ގޮތުގައެވެ.
ފުލުހުން ބުނީ ފުލުހުން ތަހުގީގުކުރަމުންދާ މައްސަލައަކާއި ގުޅގެން ކުރީގެ ސްޓޭޓް މިނިސްޓަރ ފާތިމަތު ޝަމްނާޒް އަލީ ސަލީމް އާއި އިތުރު 2 މީހަކު ޖޫން 23 ވަނަ ދުވަހު ހައްޔަރުކޮށްފައިވާ ކަމަށެވެ. ނަމަވެސް އަނެއް ދެމީހުންގެ މައުލޫމާތެއް ފުލުހުން ހާމަނުކުރެއެވެ.
އަދި މި 3 މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 7 ދުވަހަށް ބަންދުކުރުމަށް ވަނީ އަމުރުކޮށްފައެވެ.
މައުލޫމާތު ލިބިފައިވާގޮތުގައި އޭނާގެ ބަންދުގެ މުއްދަތު ޖަހާފައިވަނީ ހުޅުމާލެ މެޖިސްޓްރޭޓް ކޯޓުންނެވެ. އަދި އޭނާ ހައްޔަރުކުރީ އޭނާ ދިރިއުޅޭ ގެއިންނެވެ. އަދި އެގެއިން ފުލުހުން ބައެއް ސާމާނުވެސް ވަނީ ގެންގޮސްފައެވެ.
މައުލޫމާތު ލިބޭ ގޮތުގައި ރައީސް ޑރ. މުހައްމަދު މުއިއްޒުއާއި ގާތްވުމަށް ސިހުރި ހެދިކަމުގެ ތުހުމަތުވެސް ޝަމްނާޒުގެ މައްޗަށް ވަނީ ކޮށްފައެވެ. ޝަމްނާޒު އަކީ ރައީސް އޮފީހުގެ މިނިސްޓަރ އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އެންމެ ގާތް އެއް ބޭފުޅާކަމުގައިވާ އާދަމް ރަމީޒުގެ ކުރީގެ އަނބިކަނބަލުން އަދި މި ސަރުކާރުގެ ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރެވެ.
ސްޓޭޓް މިނިސްޓަރ ފާތިމަތު ޝަމްނާޒް އަލީ ސަލީމް ފުރަތަމަ މަސައްކަތް ކުރެއްވީ ރައީސުލްޖުމްހޫރިއްޔާގެ ރަސްމީ ގެކޮޅުގެ މުލީއާގޭގައެވެ. ނަމަވެސް ފަހުން އޭނާ ބަދަލުކޮށްފައިވަނީ ތިމާވެއްޓާ ބެހޭ ވުޒާރާއަށެވެ. ތިމާވެއްޓާބެހޭ ވުޒާރާއަށް އޭނާ ބަދަލުކޮށްފައިވަނީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ލަވަކިޔުއްވާ ވީޑިއޯތަކެއް އާންމުވި ފަހުންނެވެ.
ސޯޝަލް މީޑިއާގައި ދައުރުވަމުން އަންނަ ވީޑިއޯއާއެކު ބައެއް ފަރާތްތަކުން ބުނެފައިވަނީ ސްޓޭޓް މިނިސްޓަރ ފާތިމަތު ޝަމްނާޒް އަލީ ސަލީމް ތިމާވެއްޓާ ބެހޭ ވުޒާރާއަށް ބަދަލުކުރީ އެ ވީޑިއޯ އާންމުވިފަހުން ރައީސްގެ އަނބިކަނބަލުން އެކަމާއި ހިތްހަމަޖެހިވަޑައިނުގެންއެވެ. އަދި އެ ވީޑިއޯ އާންމުކުރީ ޝަމްނާޒް ކަމަށްވެސް އަޑުތައް ފެތުރުނެވެ.
