ފާޑުނުކިޔައި ގައުމީ ޓީމަށް ހިތްވަރުދީ މެޗުތައް ކާމިޔާބުކުރުމަށް އެހީތެރިވެދޭން ކުރީގެ އެއްވަނަ ފޯވަޑް ގެރީ ލިނެކާ އަށް އިނގިރޭސި ގައުމީ ކެޕްޓަން ހެރީކޭން ގޮވާލައިފި އެވެ.

ކޭން މިފަދައިން ބުނީ ޔޫރޯ ފުޓްބޯޅަ މުބާރާތުގައި އިނގިރޭސީން ދައްކަމުން އަންނަ ކުޅުމަށް ކުރީގެ ކުޅުންތެރިންނާއި އިނގިރޭސި މީޑިއާތަކުން ވަރަށް ބޮޑަށް ފާޑުކިޔަމުންދަނިކޮށެވެ. ލިނެކާ އަކީ މީޑިޔާގައި ޝޯތައް ހުށަހަޅައިދީ ގައުމީ ޓީމުގެ ކަންކަމަށް ވަރަށް ބޮޑަށް ފާޑުކިޔަމުންދާ މީހެކެވެ. އޭނާ އަކީ ގައުމީ ޓީމަށް 1984 އިން 1992 އަށް 80 މެޗުން 48 ގޯލު ޖަހައިދީފައިވާ ފޯވަޑެކެވެ. އޭނާ އެންމެ ފަހުން ބުނެފައިވަނީ އިނގިރޭސި ކުޅުންތެރިންގެ ގުޅުން ރަނގަޅު ނޫން ކަމަށާއި ޓީމުގެ ތެރޭގައި އެއްބައިވަންތަކަން ވެސް ކުޑަކަަށެވެ. އަދި ކޯޗު ގެރެތް ސައުތުގޭޓާއި އިނގިރޭސި ކުޅުންތެރިންގެ މެދުގައި ވެސް މައްސަލައުޅޭ ކަމަށެވެ.

މިވާހަކަތައް ދޮގު ކުރަމުން ކޭން ބުނެފައިވަނީ މިފަދަ ވާހަކަތަކުން ދެރަ ލިބޭނީ އިނގިރޭސިންނަށް ކަމަށާއި ކާމިޔާބު ލިބުނަސް ނުލިބުނަސް މުޅި ގައުމުގެ އެންމެން އެކަމެއްގައި ބައިވެރިވާނެ ކަމަށެވެ.

ކޭން ބުނީ މީޑިއާތަކުން ދައްކާ ކޮންމެ ވާހަކައަކީ ތެދެއްނޫން ކަމަށާއި ޓީމުގެ ކުޅުންތެރިން އެކަކު އަނެކާމެދު މައްސަލަ އުފައްދައިގެން ނޫޅޭ ކަމަށެވެ. އޭގެ ބަދަލުގައި ހުރިހާ ކުޅުންތެރިން ވެސް ތިބީ ސްލޮވީނިއާއާ ދެކޮޅަށް މިރޭ ކުޅޭ މެޗުން މޮޅުވެ ގްރޫޕުގެ ކުރި ހޯދަން އަމާޒު ހިފައިގެން ކަމަށެވެ.

ސްލޮވީނިއާއާ ދެކޮޅަށް ކުޅޭ މެޗުން އިނގިރޭސިން ބަލިވެއްޖެނަމަ ޔޫރޯގެ ދެ ވަނަ ބުރުގައި ގަދަ ޓީމަކާ ކުޅެން ޖެހުން ގާތެވެ. އިނގިރޭސިންނަށް އެންމެ ވަރުގަދަ ޓީމަކާ ދެކޮޅަށް ކުޅެން ނުޖެހި ފަރުޖެހޭނީ ގްރޫޕުގެ ކުރި ހޯދިގެންނެވެ. އެކަންވާނީ މިރޭގެ މެޗު ކާމިޔާބުކޮށްގެންނެވެ.