އިނގިރޭސި ފުޓްބޯޅަ އެސޯސިއޭޝަނުގެ ރައީސް ޕްރިންސް ވިލިއަމް ޓީމަށް ހިތްވަރު ދެއްވައި ވާހަކަ ދައްކަވައިފި އެވެ.

ޖަރުމަނުގެ ފްރޭންފަޓްގައި އިނގިރޭސިންނާއި ޑެންމާކް ކުޅުނު މެޗަށް ފަހު އޭނާ ވަނީ ސީދާ ޗޭންޖިމް ރޫމަށް ވަޑައިގެންނަވާފަ އެވެ. އަދި ކުޅުންތެރިން ގާތުގައި ވިދާޅުވީ ޑެންމާކް މެޗުން މޮޅު ނުވުމަކީ ދުނިޔެ ނިމުން ނޫން ކަމަށެވެ.

އިނގިރޭސި މީޑިއާތަކުން ބުނަނީ ވިލިއަމް ވަނީ ކުޅުންތެރިންނާ ވާހަކަ ދައްކައި ވަރަށް ބޮޑަށް ހިތްވަރު ދެއްވާފައި ކަމަށެވެ. އަދި އެއަށްފަހު ޓީމު ތިބޭ ކޭމްޕްގައި ކޯޗު ގެރެތް ސައުތުގޭޓްއާ ވަކި ބައްދަލުކޮށް މަޝްވަރާކުރެއްވި ކަމަށް ވެސް އިނގިރޭސި މީޑިއާތަކުން ބުނެ އެވެ.

ވިލިއަމް ޓީމަށް ހިތްވަރު ދެއްވާފައިވީ ނަމަވެސް ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖުގެ ފަހު މެޗުގައި މިރޭ ސްލޮވީނިއާއާ ދެކޮޅަށް ކުޅޭ މެޗު ބައްދަލަވަން ދަނޑަށް ވަޑައިގަންނަވާނެކަން ޔަގީނެއްނޫނެވެ. މި މެޗުން އިނގިރޭސިން މޮޅުވެގެން ނޫނީ މުބާރާތުގެ ގަދަ 16ގައި ގަދަ ޓީމަކާ ވާދަކުރަން ޖެހުން ނިމުމަކަށް ނުގެނެވޭނެ އެވެ.

ޔޫރޯ ފުޓްބޯޅަ މުބާރާތުގެ ގަދަ 16 އަށް އިނގިރޭސިން ދަތުރުކުރި ނަމަވެސް އެގައުުގެ މީޑިއާތަކުން ދަނީ ޓީމަށް ވަރަށް ބޮޑަށް ފާޑުކިޔަމުންނެވެ. ސަބަބަކީ މުބާރާތުގައި މިހާތަނަށް ދައްކާފައިވާ ގޯސް ކުޅުމެވެ. ގިނަ މީޑިއާތަކުން ބުނަނީ އިނގިރޭސިންގެ ކިބައިގައި މުބާރާތް ކާމިޔާބުކުރެވޭހާ ފެންވަރު ނެތް ކަމަށެވެ.

އިނގިރޭސިން މުބާރާތުގައި މިހާތަނަަށް ކުޅުނު ދެ މެޗުގެ ތެރެއިން ފުރަތަމަ މެޗުގައި ސާބިއާ އަތުން މޮޅުވީ 1-0އިންނެވެ. އަދި ޑެންމާކް މެޗު ނިމުނީ 1-1އިން އެއްވަރުވެގެންނެވެ. މިހެންވެ މިރޭގެ މެޗުން ބަލިވެއްޖެނަމަ އިނގިރޭސިން ގްރޫޕުގެ ތިން ވަނަ އަށް ދިއުމަކީ އެކަށީގެންވާ ކަމެކެވެ.