ކްރޮއޭޝިޔާ އާއި އިޓަލީ ސަޕޯޓަރުން ތަޅައިގަނެ، 20 މީހުން ހައްޔަރުކޮށްފި

އިޓަލީން ފަހު ވަގުތު އެއްވަރުކޮށް ޔޫރޯ ފުޓްބޯޅަ މުބާރާތުން ކްރޮއޭޝިޔާ ކަޓުވާލި މެޗަށް ފަހު ދެ ގައުމުގެ ސަޕޯޓަރުން ތަޅައިގަނެ 20 މީހުން ހައްޔަރުކޮށްފި އެވެ.

މި ދެ ގައުމު ރޭ ކުޅުނު މެޗު 1-1އިން އެއްވަރުވީ ފަހު ވަގުތު އިޓަލީން ޖެހި ލަނޑުންނެވެ. މިއާއެކު ކްރޮއޭޝިޔާގެ ބަދަލުގައި މުބާރާތުގެ ދެ ވަނަ ބުރަށް ދިޔައީ އިޓަލީ އެވެ. ކްރޮއޭޝިޔާ އަށް ދެ ވަނަ ބުރަކަށް ނުދެވޭނެ އެވެ.

ޖަރުމަނުގެ ފުލުހުން ބުނީ ދެ ގައުމުގެ ސަޕޯޓަރުން މެޗަށް ފަހު ތަޅައިގަތުމުން ކްރޮއޭޝިޔާގެ 20 މީހަކު ހައްޔަރުކޮށްފައިވާ ކަމަށެވެ. މެޗުގެ ނަތީޖާއާއ މެދު ހިތްހަމަނުޖެހިގެން ކްރޮއޭޝިޔާގެ ސަޕޯޓަރުން އިޓަލީ މީހުންނަށް ހަމަލާދޭން ފެށިއިރު ރޭ ޖަރުމަނުގެ ލައިޕްޒިގައި ކްރޮއޭޝިޔާގެ 40000 މީހުން ތިބޭނެ ކަމަށް ފުލުހުން ވަނީ އަންދާޒާކޮށްފަ އެވެ.

މީގެ އިތުރުން ޖަރުމަނުގެ ބޯޑަރު ވަގަށް ހުރަސް އެ ގައުމަށް އެތެރެވާން އުޅުނު އެތައް ބަޔަކު ވެސް ހައްޔަރުކޮށްފައިވާ ކަމަށް ޖަރުމަނުގެ ފުލުހުންނެވެ.

ޔޫރޯ ފުޓްބޯޅަ މުބާރާތުގެ މެޗުތައް ކުޅެމުންދާއިރު ދެ ގައުމުގެ ސަޕޯޓަރުންގެ މެދުގައި ހަމަނުޖެހުން އިންތިހާ އަށް ހިނގަމުންދާތީވެ ސަޕޯޓަރުންނަށް ފިޔަވަޅު އަޅަން ޖަރުމަނު ފުލުހުން މިހާރު ވަނީ ހަމަޖައްސައިފަ އެވެ. މި ގޮތުން ކުރިއަށްވުރެ ހަރުކަށިވުމާއި ގިނަ މީހުން އެއްވެ އުޅޭ ތަންތަނުގެ ސަލާމަތީ ސަބަބުތަކަށްޓަކައި ވަކި މިންވަރަކަށް މީހުން އެއްތަންވެގެން ތިބޭ ގޮތަށް ވެސް ވަނީ ހަމަޖައްސާފަ އެވެ.

ޖަރުމަނުގައި އެންމެ މައްސަލަ ގޯސްކޮށް، ބޭއަދަބީކޮށް އުޅެނީ އަލްބޭނިއާ އާއި ކްރޮއޭޝިޔާ އަދި އިނގިރޭސި ސަޕޯޓަރުންނާއި ސާބިއާގެ ސަޕޯޓަރުން ކަމަށް ވެސް ޖަރުމަނުގެ ފުލުހުންނާ ހަވާލާދީ އިޓަލީގެ ނޫސްތަކުން ބުނެ އެވެ.