"ތަރައްޤީ އާއި އެކު ރައްޔިތުން" މި ނަމުގައި ޕީޕީއެމުން ހަރަކާތްތަކެއް ކުރިއަށް ގެންދަން ނިންމައިފި
10 އޯގަސްޓު 2017 | ބުރާސްފަތި 13:21އޮގަސްޓް މަހުގެ 12 ވަނަ ދުވަހު ހަރަކާތްތައް ފަށަނީ
ޕީޕީއެމް ނޫސް ކޮންފަރަންސްގެ ތެރެއިން
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ފަރާތުން "ތަރައްޤީ އާއި އެކު ރައްޔިތުން" މި ނަމުގައި ޕީޕީއެމުން ހަރަކާތްތަކެއް ކުރިއަށް ގެންދަން ނިންމައިފިއެވެ.
ޕީޕީއެމްގެ ފަރާތުން ބުރާސްފަތި ދުވަހު ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެ ޕާޓީގެ ނައިބު ރައީސް އަދި ފޮނަދޫ ދައިރާގެ ރައްޔިތުންގެ މަޖިލީސް މެމްބަރު އަބްދުއްރަހީމް އަބްދުﷲ ވިދާޅުވީ އޮގަސްޓް މަހުގެ 12 ވަނަ ދުވަހު ރައިސުލް ޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމްގެ ސަރުކާރުން ޤައުމަށް ކޮށްދެއްވާފައިވާ ތަރައްޤީއާ އެކު ރައްޔިތުން ތިބިކަން ހާމަކޮށްދޭ ހަރަކާތްތަކެއް ހިންގުމަށް ހަމަޖެހިފައިވާ ކަމެށެވެ. އަދި މި ހަރަކާތްތައް ކުރިއަށް ގެންދިއުމަށް ހަމަޖެހިފައި ވަނީ ރާއްޖޭގެ 25 ރަށެއްގައި ކަމަށާއި ހަރަކާތްތައް ހިންގުމަށް ހަމަޖެހިފައިވާ ބައެއް ރަށްތަކަކީ ހއ. ހޯރަފުށި، ހއ. ދިއްދޫ، ހދ. ކުޅުދުއްފުށި، ނ. ވެލިދޫ، ރ. އުނގޫފާރު، ބ. އޭދަފުށި، ޅ. ހިންނަވަރު، ކ. ތުލުސްދޫ، އއ. ތޮއްޑޫ ފަދަ ރަށް ރަށް ކަމަށް އަބްދުއްރަހީމް ވިދާޅުވިއެވެ.
މި ހަރަކާތްތައް ހިންގުމަށް ހަމަޖެހިފައި ވަނީ ތަފާތު އެކި ގޮތްގޮތަށް ކަމަށް ފާހަގަކުރައްވާ އަބްދުއްރަހީމް ވިދާޅުވީ މި ހަރަކާތުގެ ތެރެއިން ސައިކަލު ބުރު ތަކާއި ކުޑަކުދިންގެ ހަވީރުތަކާއި މިޔުޒިކް ޝޯތަކާއި ހިނގާލުންތަކާ ޖަލްސާތަކާއި ޝުއޫރު ފާޅުކުރުމުގެ ހަރަކާތްތައް ކުރިއަށްދާނެ ކަމަށެވެ.
މި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވިލިމާލެ ދާއިރާގެ މެމްބަރު އަދި ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހުމަދު ނިހާން ހުސެއިން މަނިކު ވިދާޅުވީ މި ހަރަކާތްތަކަކީ ޤާނޫނު އަސާސީއަށް 9 އަހަރު ފުރުން ވެސް ފާހަގަކުރުމަށް ހިންގޭ ހަރަކާތްތަކެއް ކަމަށާއި މިނިވަންމުވައްސަސާތަކާއި ސަރުކާރުގެ އެކި ކުންފުނިތަކުން މި ހަރަކާތްތައް ހިންގުމަށްޓަކައި އެހީތެރިވާނެ ކަމަށެވެ.
އަބްދުލްރަހީމް ވަނީ މި ހަރަކާތްތަކުން އިދިކޮޅު ފަރާތްތަކަށް ޤައުމުގައި ތާއީދު ނެތްކަން ހާމަވެގެންދާނެ ކަމަށް ފާހަގަ ކުރައްވާފައެވެ.
