އިޓަލީއާ ދެކޮޅަށް މިރޭ ކޮންމެހެން މޮޅުވާންޖެހޭ މެޗަކަށް ނުކުންނައިރު އެންމެ ބޮޑު މައްސަލައަކީ ބައިކޮޅަށް ގިނަ ގޯލުތަކެއް ވަދެފައިވުން ކަމަށް ކްރޮއޭޝިޔާގެ ކޯޗު ލަޓްކޯ ޑަލިކް ބުނެފި.
ކްރޮއޭޝިޔާގެ ކުޅުންތެރިން ދަނޑުމަތީގައި
އިޓަލީއާ ދެކޮޅަށް މިރޭ ކޮންމެހެން މޮޅުވާންޖެހޭ މެޗަކަށް ނުކުންނައިރު އެންމެ ބޮޑު މައްސަލައަކީ ބައިކޮޅަށް ގިނަ ގޯލުތަކެއް ވަދެފައިވުން ކަމަށް ކްރޮއޭޝިޔާގެ ކޯޗު ލަޓްކޯ ޑަލިކް ބުނެފި އެވެ.
މި މެޗުން މޮޅުނުވެވިއްޖެނަމަ ކްރޮއޭޝިޔާ މުބާރާތުން ކަޓާނެ އެވެ. ސަބަބަކީ މުބާރާތުގައި މިހާތަނަށް ކުޅުނު ދެ މެޗުން އެންމެ ޕޮއިންޓަކާއެކު އޮތުމެވެ.
ނަމަވެސް އޭނާ ބުނީ ބައިނަލް އަގްވާމީ މުބާރާތްތަކުގައި ކްރޮއޭޝިޔާއިން މިދިޔަ 25 އަހަރު ތިން މެޑަލް ހޯދައިފި ކަމަށާއި މިހެންވެ މިފަދަ މެޗަކުން މޮޅުވެގެން ދެ ވަނަ ބުރަށް ނުދެވެންވީ ސަބަބެއް ނެތް ކަމަށެވެ.
މި މެޗަށް ނުކުންނައިރު ކޯޗު ބުނީ ހުރިހާ ކުޅުންތެރިން ވެސް ތިބީ ފިޓްކޮށް ކަމަށެވެ.
މި ދެ ބައި މީހުން މިހާތަނަށް ބޮޑު މުބާރާތެއްގައި ވާދަކުރީ ދެ މެޗެއްގަ އެވެ. ކްރޮއޭޝިޔާ އެއް މެޗުން މޮޅުވިއިރު އަނެއް މެޗުވީ އެއްވަރެވެ.
