އަބްދުއްރަހީމް އަކީ ޕާޓީއަށްލިބުނު ފައިސާއަށް ދުވާލަކު ސިނގިރެޓް ކާޓޫނު ގަނެ މެންދުރު ގެއަށް ދާއިރު ޕާޓީ އޮފީހުން ފެންކޭސް ގެއަށް ގެންގޮސް އެ ބޮއެގެން އުޅުނު މީހެއް ކަމަށް މަލީހް ޖަމާލު ވިދާޅުވެއްޖެއެވެ.
މަލީހް ވިދާޅުވީ "އަދުރޭއަށް މިކަން ދޮގު ނުކުރެވޭނެ." ކަމަށެވެ.
އަބްދުއްރަހީމް ވަނީ އާދިއްތަ ދުވަހުގެ ރޭގެ ޖަލްސާގައި އޭރު ޕީޕީއެމް-ޕީއެންސީ ކޯލިޝަން އަށް ލިބުނު ފައިސާ ރައީސް ޔާމީން މުޅިން ބޭނުން ކުރެއްވި ކަމަށް ދޭހަވާ ގޮތައް ވާހަކަ ދައްކަވާފައެވެ.
ރައްޔިތުންގެ މަޖިލީހުގެ ރައީސްގެ މަގާމުގައި މިހާރު ހުންނެވި އަބްދުއްރަހީމަށް ރައްދުވާ ގޮތައް ކުރިން ކޮމިއުނިކޭޝަން ވަޒީރުކަން ކުރެއްވި މަލީހް މިހެން ވިދާޅުވިއިރު، އާދިއްތަ ދުވަހުގެ ރޭ ޕީއެންސީ ހައުސް ހުޅުވުމަށް ބޭއްވި ރަސްމިއްޔާތުގައި އަބްދުއްރަހީމް ވަނީ ރައީސް ޔާމީން އަށާއި އެމަނިކުފާނުގެ އަރިހުގައި މަސައްކަތް ކުރައްވަމުން ގެންދަވާ މަލީހް ޖަމާލް އަށާއި ޑރ މުހައްމަދު ޖަމީލަށް ނިސްބަތްކޮށް ވަރަށް ބޮޑަށް ފާޑު ވިދާޅުވެފައެވެ.
ފިނިކޮޓަރީގައި ގޭގައި ތިއްބަވައިގެން ބައިކިލޯ ހަމަނުވާ ދެތިން މީހުން ނެރެގެން ޕީއެންސީއާ ބެހެން ނޫޅުމަށް އެބޭފުޅުންނަށް ނިސްބަތް ކޮށް އަބްދުއްރަހީމް ވިދާޅުވިއެވެ.
ވެރިކަމަށް އަންނަން ޖެހޭނީ ވަކިފާހެއް އޮވެގެންނެއް ނޫން ކަމަށް ވިދާޅުވެ އަބްދުއްރަހީމް ގެ ވާހަކަ ކުރިއަށް ގެންދަވަމުން، ކުރިން ރާއްޖޭގެ ނައިބު ރައީސް ކަމާއި، ވަޒީރު ކަމުގެ މަގާމު ފުރުއްވާފައިވާ ޑރ. މުހައްމަދު ޖަމީލަށް އިޝާރާތް ކުރައްވާ ވިދާޅުވީ، ޕީއެޗްޑީ އޮވެގެން ވީކަމެއް ނެތް ކަމަށާއި، ދުވަހަކު އެ ބޭނުންވާ ކަމެއް ޑރ. ޖަމީލަށް ހާސިލެއް ނުވި ކަމަށެވެ.
"ކީއްކުރާ ޕީއެޗްޑީ އެއް މި." އަބްދުއްރަހީމް ވިދާޅުވިއެވެ.
"ރައީސް ޔާމީނަށް ދަންނަވަން ބޭނުންވަނީ އަޅުގަނޑުމެންގެ ހިތުގައި ގަދަރު ނެތީއެއް ނޫނޭ، އެކަމަކު ތި މަލީހް އާ ޖަމީލް އާ ދެމީހުން ބަލައެއް ނުގަނެއޭ، އެމީހުން ގޮވައިގެން ތިކުރާ މަސައްކަތަކުން ކުރިއެރުމެއް ނެތޭ، އެއީ މިގައުމުގެ ރައްޔިތުން ދަންނަ ބައެއް ނޫނޭ." އަބްދުއްރަހީމް ވިދާޅުވިއެވެ.
އަބްދުއްރަހީމްގެ މި ވާހަކައަށް ރައްދު ދެއްވާ "އެކްސް" ގައި މަލީހް ވިދާޅުވީ، ތަޢުލީމާއި އުނގެނުމަކީ ބޭކާރު ކަމެއްގެ ގޮތުގައި ހާމަކޮށް އަބްދުއްރަހީމް ދެއްކެވީ ވަރަށް ޒިންމާދާރުކަން ކުޑަ ބިރުވެރި ވާހަކައެއް ކަމަށެވެ.
"ޕީއެޗްޑީ ކިޔަންވެސް އަދުރޭއަށް ނޭގޭނެ. ތައުލީމަކީ ކޯއްޗެއްކަން އަދުރޭއަށް އެނގޭނީ ސްކޫލަށް ދިޔާމަ. ޖާހިލުކަމަކީ ނުރައްކާތެރި ކަމެއް." މަލީހް ކުރެއްވި ޕޯސްޓްގައި އަބްދުއްރަހީމަށް ރައްދުކޮށް ވިދާޅުވެފައިވެއެވެ.
