މީހުން ބުނެއެވެ. ގެންދަވާނީ ދައްކަވާނެ ތަނެއް ދައްކަވާފައެވެ. އެއީ އިލާހީ ގާނޫނެވެ. މަތިން ގަޑިޖެހުނީމާ ލަހެއް ފަހެއް ނުވެ އެކަން ވެދެއެވެ.
އެބީދައިން ބަލާއިރު އޭގެ ދިރިހުރި އެއް މިސާލަކީ މިހާރުގެ ރައްޔިތުންގެ މަޖިލީހުގެ ރައީސް ޢަބްދުއްރަހީމް ޢަބްދުﷲ ނުވަތަ އަދުރޭއެވެ.
ގިނަބަޔަކަށް އެނގޭ ގޮތުގައި އަދުރޭގެ ސިޔާސީ ކާމިޔާބުގެ ފެށުމަކީ ރައީސް ޔާމީނެވެ. ޑީއާރުޕީ ތެރެއިން ފެންނަން ފެށި އަދުރޭގެ ސިޔާސީ ކާމިޔާބީތަކާ ގުޅިފައިވަނީ ރައީސް ޔާމީނެވެ. އެހެންކަމުން އަދުރޭ ވެގެން ގޮސްފައިވަނީ ރައީސް ޔާމީންދެކެ ނުހަނު ލޯބިވި ބޭފުޅަކަށެވެ. ޚާއްސަކޮށް ރައީސް ޔާމީން ޖަލުގައި އޮންނެވިއިރު އެންމެބޮޑަށް ދެރަފުޅުވި އެއްބޭފުޅަކީ އަދުރޭއެވެ. އަދުރޭ އޭރު ކީރިތި ކުރެއްވިއެވެ. އެމަނިކުފާނުގެ ދިފާއުގައި މުޒާހަރާއަށް ވަޑައިގެންނެވިއެވެ. ޝަރީއަތްތައް ލައިވްކޮށް އަޑުއައްސަވަން ކޯޓަށް ވަޑައިގެންނެވިއެވެ. އަދި އަދުރޭގެ އޭރުގެ ހާލަތު ކުރުކޮށް ސިފަކުރައްވާނަމަ އެންމެ ފަސޭހަ މިސާލަކީ އަދުރޭ ވިދާޅުވި ވާހަކަފުޅެވެ. "ޔާމީންގެ ބަދަލުގައި ޖަލުގައި އޮންނަވަން ތައްޔާރު" ކަމަށް ވިދާޅުވި ވިދާޅުވުމެވެ.
ބަދަލުވީ ކުއްލިއަކަށެވެ. ރައީސް ޔާމީން ޖަލުގައި އޮންނަވަނިކޮށް ޕީއެންސީގެ ޓިކެޓް ހޯއްދަވައިގެން ވެރިކަމަށް ވަޑައިގެންނެވުމާއެކު އަދުރޭގެ އުޅުއްވުމާއި ރާގު އެކޮޅުކޮޅުން ޖެހުނެވެ. މުޅިން ބަދަލުވިއެވެ. ރައީސް ޔާމީން ދޫކޮށްލައްވާ ރަނގަޅަށް މުއިއްޒު ވެލެއްވިއެވެ. އެންމެ ބާރުގަދަ އަދި އެންމެ އަރިސް މީހާގެ ގޮތުގައި ހުންނެވީކީ އެކަންޏެއް ނޫނެވެ. ރަތްމަހަކަށް ނުގޮވާވަރަށް ރައީސް ޔާމީނަށް ބަސްވިދާޅުވާން ފެށްޓެވިއެވެ. ރައީސް ޔާމީނާ ނުލައި ނޫޅެވުނު އަދުރޭ ރައީސް ޔާމީން ދުކޮށްލައްވައި ސިޔާސީ ހަތުރަކަށް ހެއްދެވިއެވެ. އަދި ރައީސް މުއިއްޒު ވެރިކަމަށް ގެންނެވުމަކީ މާކުރިން ރޭވި، ވަކި އިންތިޒާމަކުން ކުރެއްވި ކަމެއްކަމށް ވިދާޅުވެ އެތައް ބަޔަކަށް ނޭނގޭ ބޮޑު ސިއްރު ހާމަކޮށްލެއްވިއެވެ.
އޭގެ ދުވަސްކޮޅެއް ފަހެވެ. އަދި މިއުޅެނީ ވެރިކަމަށް ދެއަހަރު ނުވެއެވެ. އަދުރޭ މިއަދު އެހުރީ ބާކީވެފައެވެ. ގަދަބަސްވިދާޅުވެފައި އުޅުއްވި މަޖިލީހުގެ ރައީސް މިއަދު އެހުރީ "ނަގޫ ފިތިފަ"އެވެ. ހެދިހާ އެއްޗެއް ހެދޭހާ ކުޑަވެފައެވެ. ދިފާއުގައި ބަހެއްވިދާޅުވާން ކެރިވަޑައި ނުގަންނަވާވަރަށް ސައިޒްކޮށްފައެވެ. ނުވަތަ ސައިޒްވެފައެވެ. ނުގޮތަކަށް ކުޑަވައި އިނގިލި ހިއްލާލިއަސް ދެންވާނެގޮތް އެނގޭހާލު ހަމަހިމޭންވެފައެވެ.
ދައްކާން މިއުޅެނީ އެވާހަކައެއް ނޫނެވެ. އަދުރޭގެ އެސައިޒްވުން ނުވަތަ އެސައިޒްކުރުމާ ގުޅިފައިވާ އަނެއް ހަގީގަތުގެ ވާހަކައެވެ. ބާރުގަދަ ރައްޔިތުންގެ މަޖިލީހުގެ ޕީއެންސީގެ މެންބަރުންނަށް ވާނެ ގޮތެވެ. އަދުރޭވެސް އެހާލަތާ ކުރިމަތިލާން ޖެހިވަޑައިގަތީ އަދުރޭ ރައީސަކަށް އިންނަވައިގެން މެންބަރުންގެ ގޮނޑިގެއްލުވާލުމުގެ ބާރު ޕާޓީގެ ފިޔަވަޅުއަޅާ ކޮމެޓީއަށް އަމިއްލައަށް ހިލޭ ދޫކޮށްލެއްވި ދޫކޮށްލެއްވުމެވެ. އެދަންމަޅި ޖެހީ އެބޭފުޅުން އަމިއްލައަށެވެ. ފުރަތަމަ އެވައްޓާލެވުނީ އެންމެ އިސްކޮށް ރިޔާސަތުގައި އިންނެވި އަދުރޭގެ ކަރަށެވެ. އިސާހިތަކު އަދުރޭގެ މަޖިލިސް ރައީސް ކަމާއި މަޖިލިސް މެންބަރު ކަމުގެ ގޮނޑި ގެއްލިދާނެއެވެ. ހަމަ އެމޭރުމުން ޕީއެންސީގެ ދެންތިބި މެންބަރުންނަށް ވެގެން ދާނީ އިބުރަތަކަށެވެ. އެވެރިންގެ ގޮނޑި މުޅި ދައުރު ނިމެންދެން އޮންނާނީ ދެފެންދޭތެރޭގައެވެ. ނުމިޔަ ނުދިރިއެވެ. ސުވާލު މާކެއްގެ ތެރޭގައެވެ. ދީނަކީ އިސްލާމްދީނެއް ނޫނޭ ބުނާށޭ ބުންޏަސް އެގޮތައް ވޯޓު ނުލައިފިނަމަ ގޮނޑި ގެއްލުމަކީ ފެންތައްޓެއް ބޮއެފައި ވައެއް ލުން ފަދަ ފަސޭހަ ކަމަކެވެ.
ކޮންމެއަކަސް އަމިއްލައަށް ފޭހުނު އިލޮށިގަނޑު އެއަމާޒުވީ ސީދާ އަމިއްލަ ލޮލަށެވެ. ޖެއްސެވި މަޅި އެމެހުނީ އަމިއްލަ އަރަށެވެ. މިއަދު މުއިއްޒުގެ ސައިޒުން ސިފަކޮށްދެނީ ދެން ތިއްބެވި މެންބަރުންނަށް އިންޒާރަކަށެވެ.
