ދިވެހި ހުރިހާ ހައްޖުވެރިން ހައްޖުގެ އެންމެ ފަހުގެ ކަންކަން ފުރިހަމަ ކުރުމަށް މިހާރު ތިބީ މައްކާގައި
20 ޖޫން 2024 | ބުރާސްފަތި 14:30މައްކާ ގައި ހައްޖުވެރިން ގެންދަނީ އެންމެ ފަހު ތަވާފު ކުރުމާއި، ސައުޔު ކުރުމުގެ ކަންކަން ފުރިހަމަ ކުރަމުން
ހައްޖުވެރިންނަށް ފަސޭހަވާނެ ގޮތަށް ހުރިހާ އިންތިޒާމެއް ހަމަޖައްސާނެ ކަމަށް ރާއްޖެ ހައްޖު މިޝަން އިން ކުރިން ބުނެފައިވޭ (ފައިލް ފޮޓޯ)
މިއަހަރު ދިވެހިރާއްޖެއިން ޙައްޖަށް ދިޔަ އެންމެން ހައްޖުގެ އެންމެ ފަހު ކަންކަން ފުރިހަމަ ކުރުމަށް މިހާރު ތިބީ މައްކާގައެވެ.
މިއަހަރު ރާއްޖޭން ހައްޖަށް ދިޔައީ 1150 މީހުން ކަމަށް މައުލޫމާތު ލިބިފައިވެއެވެ.
ދިވެހި ހައްޖުވެރިން، މިނާ އާއި އަރަފާތުގައި އަދި މުޒްދަލިފާގައި ތިބުމަށްފަހު، އެނބުރި މިނާ އަށް އައިސް މިނާ ގައި އައްޔާމުއްތަޝްރީގުގެ 3 ދުވަސް ހޭދަ ކޮށް ޖަމްރާ އަށް ހިލައުކުން ފުރިހަމަ ކުރުމަށްފަހު ހުރިހާ ހައްޖުވެރިން އެނބުރި މައްކާއަށް ވަނީ އައިސްފައެވެ.
މައްކާ ގައި ހައްޖުވެރިން ގެންދަނީ އެންމެ ފަހު ތަވާފު ކުރުމާއި، ސައުޔު ކުރުމުގެ ކަންކަން ފުރިހަމަ ކުރަމުންނެވެ. މައުލޫމާތު ލިބިފައިވާ ގޮތުގައި ރާއްޖޭން ހައްޖަށް ދިޔަ އެންމެން ހައްޖުގައި އެންމެ ފަހުން ފުރިހަމަ ކުރަން ޖެހޭ ކަންކަން ބުރާސްފަތި ދުވަހުގެ ނިޔަލަށް ފުރިހަމަ ކޮށް ނިމޭނެއެވެ.
މި ފަހަރުގެ ހައްޖަށް ދިޔަ ބައެއް މީހުންނަށް ސިއްހީ އެކިއެކި މައްސަލަތައް ކުރިމަތިވި ނަމަވެސް ޖުމްލަ ގޮތެއްގައި ހައްޖުވެރިންގެ ހާލު ރަނގަޅު ކަމަށް ހައްޖު ކޯޕަރޭޝަނުން ބުނެފައިވެއެވެ.
މިއަހަރު ރާއްޖެއިން ހައްޖަށް ދިޔަ މީހުންގެ ތެރެއިން އެކަކު ޙައްޖުގެ އަޅުކަން ފެށުމުގެ ކުރިން ވަނީ ނިޔާވެފައެވެ.
