ދައުލަތުގެ ބަޖެޓުން 2024 ވަނަ އަހަރު އެންމެ ގިނަ ފައިސާ ލިބުނީ އެމްޑީޕީއަށް، އެއީ 15.1 މިލިއަން ރުފިޔާ
18 ޖޫން 2024 | އަންގާރަ 08:39ޕާޓީތަކަށް ދޫކުރި ޖުމްލަ ފައިސާގެ އަދަދަކީ 43.7 މިލިއަން ރުފިޔާ
އެމްޑީޕީގެ ޗެއަރޕާސަން ފައްޔާޒު އިސްމާއީލު އާއި ޕާޓީގެ ލީޑަރޝިޕްގެ އެހެން ބައެއް ބޭފުޅުން
ދައުލަތުގެ 2024 ވަނަ އަހަރުގެ ބަޖެޓުން ފައިސާ ދިނުމަށް ޝަރުޠު ހަމަވި ހުރިހާ ސިޔާސީ ޕާޓީއަކަށް ފައިސާ ދޫކޮށްފި ކަމަށް އިލެކްޝަންސް ކޮމިޝަނުން ބުނެފިއެވެ.
ސިޔާސީ ޕާޓީތަކުގެ ދަފްތަރުގައި ހިމެނޭ 10 ސިޔާސީ ޕާޓީ ގެ ތެރެއިން، އެ ކޮމިޝަނުން ބުނީ ފައިސާ ދޫކުރީ 6 ޕާޓީ އަކަށް ކަމަށެވެ.
އިލެކްޝަންސް ކޮމިޝަނުން ޕާޓީތަކަށް ފައިސާ ދުކޮށްފައިވާ ގޮތައް ބަލާއިރު މި އަހަރުގެ ބަޖެޓުން އެންމެ ގިނަ ފައިސާ ލިބުނީ މޯލްޑިވިއަން ޑިމޮކްރެޓިކް ޕާޓީ(އެމްޑީޕީ) އަށް 15.1 މިލިއަން ރުފިޔާ އެވެ.
ސިޔާސީ ޕާޓީތަކުގެ ޤާނޫނުގައި އޮންނަ ގޮތުން، ކޮންމެ އަހަރެއްގެ ދައުލަތުގެ ބަޖެޓުގެ 0.01 އިން ސައްތަ ސިޔާސީ ޕާޓީތަކަށް ދޭން ޖެހެއެވެ. ފައިސާ ދޫކުރަނީ ބަޖެޓް ފާސްކުރާ އިރު ޕާޓީގެ ދަފްތަރުގައި 10،000 މީހުން ހަމަވާ ޕާޓީތަކަށެވެ.
މިއަހަރުގެ ބަޖެޓުން ދެވަނަ އަށް އެންމެ ގިނަ ފައިސާ ލިބުނު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަށް 10.4 މިލިއަން ރުފިޔާ ދޫކޮށްފައިވާ އިރު، ތިން ވަނަ އަށް އެންމެ ގިނައިން ފައިސާ ލިބުނު ޕީޕަލްސް ނޭޝަނަލް ކޮންގްރެސް (ޕީއެންސީ) އަށް 8.0 މިލިއަން ރުފިޔާ ލިބިފައިވެއެވެ. މީގެ އިތުރުން ޖުމްހޫރީ ޕާޓީ (ޖޭޕީ) އަށް 5.3 މިލިއަން ރުފިޔާ، އަދާލަތު ޕާޓީ އަށް 2.5 މިލިއަން ރުފިޔާ އަދި މޯލްޑިވްސް ޑިވެލޮޕްމެންޓް އެލަޔަންސް(އެމްޑީއޭ) އަށް 2.4 މިލިއަން ރުފިޔާ ދޫކޮށްފައިވާ ކަމަށް އިލެކްޝަންސް ކޮމިޝަނުން ވަނީ ހާމަ ކޮށްފައެވެ.
2024 ވަނަ އަހަރުގެ ބަޖެޓުން 6 ސިޔާސީ ޕާޓީއަށް ދޫކުރި ފައިސާގެ ޖުމްލަ އަދަދަކީ 43.7 މިލިއަން ރުފިޔާ އެވެ.
