ސްނިކޯމީޓަރުން ލުކާކޫގެ ގޯލްތައް ކެންސަލް!

ޔޫރޯ ފުޓްބޯޅަ މުބާރާތުގައި ރޭ ބެލްޖިއަމްގެ ފަހު ގޯލު ސްނިކޯމީޓަރުގެ އެހީގައި ބަލައި ނުގަތުމުން ސްލޮވާކިޔާ އަށް ތާރީހީ ކާމިޔާބީއެއް ލިބިއްޖެ އެވެ.

މެޗުގެ 85 ވަނަ މިނެޓުގައި ބެލްޖިއަމްގެ ރޮމެލޫ ލުކާކޫ ލަނޑެއް ޖަހައި ނަތީޖާ އެއްވަރު ކުރި އެވެ. އަދި އޭނާ އާއި މުޅި ޓީމު މި ލަނޑަށް ފަހު އިންތިހާ އަށް އުފާފާޅު ކުރި އެވެ. ނަމަވެސް ތުރުކީގެ ރެފްރީ ނިންމީ ލުކާކޫގެ ކުލަބު ޕާޓްނަރު އޮޕެންޑާ އެބޯޅަ ހުރަސްކުރުމުގެ ކުރިން ކޮންޓްރޯލްކުރަން އުޅުމުގެ ތެރޭގައި އަތުގައި ޖެހުނުކަން ޔަގީން ކުރާށެވެ. ވީއޭއާރުން ބެލުމަށްފަހު، މިކަން ކަށަވަރުކުރީ ސްނިކޯމީޓަރުގެ އެހީގަ އެވެ.

ސްނިކޯމީޓަރަކީ އަޑުގެ އެހީގައި ބޯޅައިގެ އަތްލިކަން ކަށަވަރުކުރަން މި ފަހަރުގެ ޔޫރޯގައި ބޭނުންކުރާ ޓެކްނޮލޮޖީއެކެވެ. ސްނިކޯމީޓަރުން ދެއްކީ އޮޕެންޑާ ބޯޅަ ހުރަސްކުރުމުގެ ކުރިން އަތްލިކަމެވެ. ލުކާކޫގެ ގޯލް ކެންސަލް ވިއިރު އޭނާ ވަނީ ފަހު ހާފު ފަށައިގެން ވެސް ގޯލެއް ޖަހައިފަ އެވެ. އެކަމަކު އޮފްސައިޑުގައި ހުރުމުން އެ ލަނޑު ވެސް ކެންސަލްވީ އެވެ.

ބެލްޖިއަމްގެގެ ކޯޗު ޑޮމެނިކޯ ޑަޓެސްކޯ މެޗަށް ފަހު ބުނީ އޭނާގެ ކޯޗުކަމުގައި ފުރަތަމަ ފަހަރަށް ބަލިވިއިރު ކޮންމެވެސް ދުވަހަކު ބަލިވާނެކަން އެނގޭ ކަމަށެވެ. އަދި މެޗުގައި އޭނާގެ ޓީމަށް އެންމެ އެދެވޭ ގޮތުގައި ނުކުޅުނު ކަމަށް ވެސް ގަބޫލުކުރާ ކަމަށެވެ.

ފީފާ ރޭންކިންގެ 53 ވަނާގައި އޮތް ސްލޮވާކިޔާއިން ތިން ވަނާގައިވާ ބެލްޖިއަމްގެ މައްޗަށް ހޯދި މޮޅަކީ މުބާރާތުގެ ތާރީހުގައި އެންމެ ހައިރާންކުރުވަނިވި އެއް ނަތީޖާ ކަމަށް ގިނަ ބަޔަކު ސިފަކުރެ އެވެ.

މެޗަށް ފަހު ސްލޮވާކިޔާގެ ކޯޗު އިޓަލީގެ ކަލްޒޯނާ ބުނީ އޭނާގެ ކުޅުންތެރިން މެޗުން މޮޅުވެ، ތިން ޕޮއިންޓް ހޯދީ ހިތާއި ފުރާނައިން ގުރުބާންވެގެން ކަމަށެވެ.

މުބާރާތުގައި ބެލްޖިއަމާއި ސްލޮވާކިޔާ އަށް ވެސް ބާކީ އޮންނާނީ ރޮމޭނިޔާ އާއި ޔުކްރޭން މެޗެވެ.