ފުލުހުންގެ އަބުރާ ބެހޭ ނަމަ ފިޔަވަޅު އަޅާނަން: ސީޕީ އަރީފް
10 އޯގަސްޓު 2017 | ބުރާސްފަތި 06:18ފުލުހުންގެ އަބުރާބެހޭ ނަމަ އެ މައްސަލަތައް ބެލޭނީ ސީރިއަސް މައްސަލަތަކެއްގެ ގޮތުގައި
އެެއްވުންތަކުގައި ފުލުހުންވެސް ހާލަތާއި ނުބައްދަލު ބާރުގެ ބޭނުންކުރާކަމަށް އިދިކޮޅު ފަރާތްތަކުން ބުނޭ
ފުލުހުންގެ އަބުރާ ބެހޭ ނަމަ އެ މައްސަލަތައް ސީރިއަސް މައްސަލަތަކުގެ ގޮތުގައި ބަލައި ފިޔަވަޅު އަޅާނެކަމުގެ އިންޒާރު ކޮމިޝަނަރ އޮފް ޕޮލިސް އަހުމަދު އަރީފް ދެއްވައިފިއެވެ.
ސީޕީ އަރީފް ސޮއިކުރައްވައި، ބުދަ ދުވަހު ނެރުއްވި ބަޔާނެއްގައި ބުނެފައިވަނީ، ފުލުހުންގެ ގާނޫނީ މަސްއޫލިއްޔަތު އަދާކުރަން އުޅޭއިރު އެކި ފަރާތްތަކުން ގާނޫނާ ޚިލާފަށް ފުލުހުންނާ މެދު އަބުރުގެ އަމަލުތަކެއް ހިންގަމުންދާ ކަމަށެވެ. ފުލުހުން ގާނޫނީ މަސްއޫލިއްޔަތު އަދާކުރަން އުޅޭއިރު ފުލުހުންގެ އަމިއްލަ ޒާތާއި އަބުރަށް ހުތުރުވާ ގޮތަށް ބަހެއް އަދި އަމަލެއް ހިންގި ކަމަށް ފުލުހަކު ހުށަހަޅައިފި ނަމަ އަބުރުގެ ގާނޫނުގެ ދަށުން، އެކަން ބަލައި ގާނޫނީ ފިޔަވަޅު އަޅާނެ ކަމަށް މި ބަޔާނުގައި ވެއެވެ.
މި ބަޔާނުގައި އިތުރަށް ބުނެފައި ވަނީ، ފުލުހަކާ މެދު މީހަކު ކުރާ އެފަދަ އަމަލެއްގެ ސަބަބުން އެ ފުލުހަކަށް ލިބޭ ގެއްލުމުގެ މަދަނީ ބަދަލު ހޯދުމަށް އެ ފުލުހަކު އަމިއްލަ ހައިސިއްޔަތުން ޝަރީއަތަށް ހުށަހަޅައި މައްސަލަތަކުގައި މޯލްޑިވްސް ޕޮލިސް ސާވިސްއިން ދެވެން ހުރި އެންމެހާ ގާނޫނީ އެހީތެރިކަން ދޭނެ ކަމަށެެވެ.
ފުލުހުންގެ އަބުރާ ބެހޭ ނަމަ، ފިޔަވަޅު އަޅާނެ ކަމުގެ އިންޒާރު ދީފައި މިވަނީ، ސިޔާސީ މަޝްރަހު ހަލަބޮލިވެ، އެއްވުންތަކުގައި ހާލަތާއި ނުބައްދަލު ބާރު ބޭނުންކޮށް ފުލުހުން ޣައިރު ގާނޫނީ، އަމަލުތަކަށް ތަބާވަމުންދާ ކަމަށް އިދިކޮޅު ފަރާތްތަކުން ބުނަމުންދާ ދަނޑިވަޅެއްގައެވެ. އަދި އެފަދަ ބައެއް ފުލުހުންގެ ފޮޓޯތަކާއި ވީޑިއޯތައް ސޯޝަލް މީޑިއާގައި އާންމުކޮށް ފާޑުކިޔަމުން ދާދަނޑިވަޅެއްގައެވެ.
ފުލުހުންގެ ބައެއް މައްސަލަތައް ވަނީ ނެޝަނަލް އިންޓެގްރިޓީ ކޮމިޝަނަށް ވެސް ހުށަހަޅައިފައެވެ.
