އުފާ ފާޅުކުރުމުގައި އެހެން ދީންތަކުގެ އަހުލުވެރިންގެ ގޮތްތައް ކޮޕީކުރުން ދޫކޮށްލާން ޖެހޭ: ޚުތުބާ
16 ޖޫން 2024 | އާދީއްތަ 05:57އެ ޤައުމެއްގެ އަހުލުވެރިންނަށް އުފާ ފާގަތިކަން ލިބުމަކީ ޤައުމަކަށް ލިބޭނެ ބޮޑު ނިއުމަތެއް
ހުތުބާގައި ވަނީ މުސްލިމުން އީދުގެ އުފާ ފާޅުކުރާއިރު ދީނުގެ އުސޫލުތަކަށް ތަބާވާން ޖެހޭނެކަމަށް ބަޔާންކޮށްފައި
އުފާ ފާޅުކުރުމުގައި އެހެން ދީންތަކުގެ އަހުލުވެރިންގެ ގޮތްތައް ކޮޕީ ކުރުން ދޫކޮށްލާން ޖެހޭކަމަށް އަޟްހާ އީދުގެ ޚުތުބާގައި ބުނެފިއެެވެ.
ރާއްޖޭގެ އެކި ކަންކޮޅުތަކަށް އިއްވި އީދު ޚުތުބާގައި ބުނީ، އަމާންކަން ލިބުމާއި، އެ ޤައުމެއްގެ އަހުލުވެރިންނަށް އުފާ ފާގަތިކަން ލިބުމަކީ ޤައުމަކަށް ލިބޭނެ ބޮޑު ނިއުމަތެއް ކަމަށެވެ.
އެކަންކަން ޙާސިލުވާނީ ދޭދޭ ފަރުދުންގެ ގުޅުންތައް ވަރުގަދަވެ، އެއްބައިވަންތަ ބަޔަކަށް ވެގެންކަމަށްވެސް ޚުތުބާގައި ބުނެފައިވެއެވެ. އެކަން ކުރުމަށްޓަކައި ހިޔާލު ތަފާތުވުންތަކުގައި އެކަކު އަނެކަކަށް އިހުތިރާމުކޮށް، އަމިއްލަ މަސްލަޙަތުގެ ބަދަލުގައި ދީނާއި ވަތަނުގެ މަސްލަޙަތު އިސްކުރަންޖެހޭނެކަމަށްވެސް ޚުތުބާގައި ބުނެފައިވެއެވެ.
އޭގެ އިތުރުން، އިސްލާމް ދީނުގައި މީސްތަކުންގެ މެދުގައި ޤާއިމުކޮށްފައިވާ ހަމަހަމަކަމަށްވެސް ޚުތުބާގައި އަލިއަޅުވާލާފައިވެއެވެ.
ޚުތުބާގައި އިތުރަށް ބުނީ، މުސްލިމުން އީދުގެ އުފާ ފާޅުކުރާއިރު ދީނުގެ އުސޫލުތަކަށް ތަބާވާން ޖެހޭނެ ކަމަށެވެ. އެގޮތުން ދީނުގައި ޙަރާމް ކުރައްވާފައިވާ ކަންކަން ކުރުމާއި، އުފާ ފާޅުކުރުމުގައި އެހެން ދީންތަކުގެ އަހުލުވެރިންގެ ގޮތްތައް ކޮޕީ ކުރުން ދޫކޮށްލާން ޖެހޭކަމަށް ޚުތުބާގައި ބުނެއެވެ.
އޭގެ އިތުރުން، އިސްލާމް ދީނަކީ އިއްޒަތްތެރިވެގެންވާ ދީނެއްނަމަވެސް، މިއަދު މުސްލިމުން ނިކަމެތިވެފައިވާ މަންޒަރު އެކި ކަންކޮޅުތަކުން ފެންނަކަން ފާހަގަކޮށް ޚުތުބާގައި ވަނީ ފަލަސްތީނުގެ ޙާލަތަށް އަލިއަޅުވާލާފައެވެ.
އަދި އަދުއްވުން އިސްލާމް ދީނާ ދެކޮޅަށް ރާވާ މަކަރުވެރި ރޭވުންތަކާ ދެކޮޅަށް އެއްބައިވަންތަކަމާއެކު ކުރިމަތިލުމަށްވެސް ޚުތުބާގައި ގޮވާލާފައިވެއެވެ.
