ޔޫރޯ ހުޅުވުމުގެ ޝަރަފު ބެކެމްބާގެ އަންހެނުންނަށް

ޖަރުމަނުގައި މިރޭ ފަށާ ޔޫރޯ ފުޓްބޯޅަ މުބާރާތް 2024 ހުޅުވުމުގެ ޝަރަފު އެ ގައުމުގެ މަޝްހޫރު ލެޖެންޑް ފްރާންޒް ބެކެމްބާގެ އަންހެނުން ހެއިޑީ އަށް ދޭން ނިންމައިފި އެވެ.

ޔޫރަޕުގެ ފުޓްބޯޅަ ޖަމިއްޔާ ޔޫއޭފާއިން މި ގޮތަށް ނިންމީ މި އަހަރުގެ ޖެނުއަރީ މަހު އުމުރުން 78 އަހަރުގައި އަވަހަރާވި ބެކެމްބާގެ ޝަރަފުގަ އެވެ. އޭނާ އަކީ ގިނަ ބަޔަކު ގަބޫލުކުރާ ގޮތުގައި ޖަރުމަނުގައި އުފެދުނު އެންމެ އަގުހުރި ފުޓްބޯޅަ ޝަހުސިއްޔަތެވެ.

ބެކެމްބާގެ އަންހެނުން ހެއިޑީ މުބާރާތުގެ ވާދައިގެ ތަށި ދަނޑަށް ނެރެދެއްވާނެ އެވެ. އޭނާއާއެކު މި ކަމުގައި ބައިވެރިކުރަން ނިންމާފައިވަނީ ޖަރުމަނުގެ ކުރީގެ ދެ ކެޕްޓަނުން ކަމަށްވާ ބާނާޑް ޑީޒް އާއި ޔާގެން ކްލިންސްމަން އެވެ. މިއީ ޔޫރޯ 1980 އާއި 1996ގައި ޖަރުމަނަށް ކާމިޔާބުކޮށްދިން ދެ ކެޕްޓަނުންނެވެ.

ބެކެމްބާ އަކީ ކުޅުންތެރިއެއްގެ ގޮތުގަ އާއި ކޯޗެއްގެ ގޮތުން ވޯލްޑްކަޕް ކާމިޔާބުކުރި މީހެކެވެ. އަދި ޖަރުމަނުގެ ބަޔާން މިއުނިކަށް ކުޅެ، ކޯޗުކޮށްދީ ފަހުން ކުލަބުގެ ރައީސްކަން ވެސް ކުރި އެވެ. 2006 ވަނަ އަހަރު ޖަރުމަނުގައި ބޭއްވި ވޯލްޑްކަޕް އޮގަނައިޒިން ކޮމިޓީގެ ޗެއާމަނަކީ ވެސް އޭނާ އެވެ.

ދުނިޔޭގެ ފުޓްބޯޅަ ޖަމިއްޔާ ފީފާގެ ރައީސް ޖިއާނީ އިންފަންޓީނޯ ބުނީ އެއީ ޖަރުމަނާއި ދުނިޔޭގެ ފުޓްބޯޅައިގެ ލެޖެންޑެއް ކަމަށެވެ.

ޔޫރަޕުގެ ފުޓްބޯޅަ ޖަމިއްޔާގެ ރައީސް އެލެގްޒެންޑާ ސެފެރިން ބުނީ ޖަރުމަނުގެ ފުޓްބޯޅައިގެ ލެގަސީ ދުނިޔެ އަށް ފަތުރައިދިނީ ބެކެމްބާ ކަމަށެވެ.

ބެކެމްބާ ވަނީ ޖަރުމަުގެ ބަޔާން މިއުނިކަށް އަށް ގިނަ ކާމިޔާބީތަކެއް ކުޅުންތެރިއެއް އަދި ކޯޗެއްގެ ގޮތުން ހޯދައިދިނުމަށްފަހު އެކުލަބުގެ ރައީސްކަން ވެސް ކޮށްފަ އެވެ.

ޔޫރޯ ހުޅުވުމުގެ ރަސްމިއްޔާތުގައި އޭނާގެ ހަނދާން އާ ކުރުމުގެ އިތުރަށް ޖަރުމަނުގެ ސަޕޯޓަރުންނަށް އޭނާގެ ހާއްސަ ވީޑިއޯ އެއް ވެސް ދެއްކުން އޮންނާނެ އެވެ.