76 ބިލެއް ހިމެނޭހެން ސަރުކާރުގެ ލެޖިސްލޭޓިވް އެޖެންޑާ އާންމުކޮށްފިއެވެ.

އެ ލެޖިސްލޭޓިވް އެޖެންޑަރ އާންމުކުރެއްވީ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އެޓަރނީ ޖެނެރަލް އަހުމަދު އުޝާމެވެ.

އުޝާމް ވިދާޅުވީ، އެ އެޖެންޑާގައި 6 ދާއިރާ އަކަށް އަލިއަޅުވާލާފައި ވާނެ ކަމަށެވެ. އަދި 2023 އިން ވަނަ އަހަރުން ފެށިގެން 5 އަހަރު ސަރުކާރުން ރައްޔިތުންގެ މަޖިލީހަށް ހުށައަޅަން ގަސްދުކުރާ ބިލުތައް އެ އެޖެންޑާގައި ހިމެނޭ ކަމަށް އޭނާ ވަނީ ވިދާޅުވެފައެވެ.

ޖުމުލަ 13 މިނެޓު ހިމެނޭ މި އެޖެންޑާ ފާސްކުރީ ބުރާސްފަތި ދުވަހުގެ ވަޒީރުންގެ މަޖިލީހުންނެވެ.

އުޝާމް ވިދާޅުވީ މި އެޖެންޑާ އެކުލަވާލި އިރު ޤާނޫނު އަސާސީގެ ދަށުން އެކުލަވާލަން ޖެހޭ ބިލުތައް ޤާނޫނު އަސާސީއާ ތަޢާރުޟުވުމުގެ ސަބަބުން އިސްލާހު ގެންނަންޖެހޭ ނުވަތަ އުވާލަންޖެހޭ ޤާނޫނުތައް ހިމަނާފައިވާނެ ކަމަށެވެ. އަދި އިދާރާތައް ހިންގުމާއި ގުޅުން ހުރި ބިލުތައް ވުޖޫދަށް ގެނައުމަށް މަސައްކަތް ކުރައްވާނެކަން ފާހަގަކުރެއްވިއެވެ. ހަމައެހެންމެ ޤާނޫނުތައް ތަންފީޒުކުރުމުގައި ދިމާވާ ގޮންޖެހުންތައް ހައްލުކުރުމަށް ވެސް ބިލުތައް ހުށަހަޅުއްވާނެ ކަަމަށް ވިދާޅުވިއެވެ. މީގެ އިތުރުން ޤާނޫނުތައް ޒަމާނަށް ފެތޭ ޤާނޫނުތަކަށް ހެދުމުގެ މަސައްކަތް ވެސް ކުރާނެ ކަމަށް އުޝާމް ވިދާޅުވިއެވެ.

ޤައުމީ ތަރައްޤީގެ މާސްޓަރ ޕްލޭން އެކުލަވާލުމަށް ބޭނުންވާ ނޭޝަނަލް ޕްލޭނިންގ ޤާނޫނުގެ ބިލުވެސް މިއެޖެންޑާގައި ހިމަނާފައިވެއެވެ. ސަރުކާރުން ބުނީ ސަރުކާރުތައް ބަދަލުވީ ނަމަވެސް ބުރަ މަސައްކަތްކޮށްގެން އެކުލަވާލާ ޤައުމީ ތަރައްޤީގެ މާސްޓަރ ޕްލޭނަށް ބަދަލު ނުގެނެވޭ ގޮތަށް އެ ޤާނޫނުގެ ދަށުން މަގުފަހިވެގެންދާނެ ކަމަށެވެ. ލެޖިސްލޭޓިވް އެޖެންޑާގެ ދަށުން އެކުލަވާލާ 78 ބިލަކީ މުޅިން އަލަށް އެކުލަވާލާ ބިލެވެ. އެ ބިލުތައް އެކުލަވާލާފައި ވަނީ ޖުމްލަ 15 މައުޟޫއަކަށެވެ.