ރަށު ރައްޔިތުންނާއި ބައްދަލުނުކުރަން ވެގެން ތޮއްޑޫ ކައުންސިލް ބަންދުކޮށް ފުލުހުން ފޯރިމަރަން ފަށައިފި

ތޮއްޑޫގެ ދަނޑުވެރިންނާއި ކައުންސިލްގެ ރައީސް އަހުމަދު ކަރަމް ބައްދަލުނުކުރަން ވެގެން ކައުންސިލް އިދާރާ ބަންދުކޮށް ފުލުހުން ފޯރިމަރަން ފަށައިފިއެވެ.

ތޮއްޑޫ އިން ރާއްޖެއެމްވީ އާއި ވާހަކަ ދެއްކި މީހަކު ބުނީ ކައުންސިލް ބަންދުކުރީ ބުދަ ދުވަހު ކައުންސިލުން ރައްޔިތުންގެ ބައްދަލުވުމެއް މެންދުރު 1:00 ގައި ބާއްވަން ކައުންސިލްގެ ރައީސް ނިންމާފައިވާތީ 1 ޖެހި އިރު ރައްޔިތުން ކައުންސިލް އިދާރާއަށް ދިޔައިރު ކައުންސިލް ބަންދުކޮށް ތަޅުލާފައި އެތަނުގައި ކައުންސިލުން އެދިގެން ފުލުހުން ސެކިއުރިޓީ ބަލަހައްޓަމުން ދާ ކަމަށެވެ.

Advertisement

މީގެ އިތުރުން ކައުންސިލްގެ ރައީސްއާއި ކުރިން ބައްދަލުކުރި އިރު ބުދަ ދުވަހު ކައުންސިލުން ރައްޔިތުންނާއި ބައްދަލުކުރާނެ ކަމަށް ބުނެ ދައްކާފައިވާ ވާހަކައަކީ މަޖަލަކަށް ދެއްކި ވާހަކައެއް ކަމަށް ރާއްޖެއެމްވީއާއި ދެއްކި މީހުން މައުލޫމާތު ދިނެވެ. އަދި ބުދަ ދުވަހު ކައުންސިލްގައި ބޭއްވި ކައުންސިލަރުންގެ ބައްދަލުވުމުގައިވެސް ރައްޔިތުންގެ ބައްދަލުވުމެއް ބާއްވައިދޭނެކަމަށް ބުނެފައިވަނީ މަޖަލަކަށް ކަމަށް ބުނެފައިވާ ކަމަށެވެ.

ތޮއްޑޫއިން ވާހަކަ ދެއްކި މީހާ ބުނީ ރައްޔިތުން ކައުންސިލާއި ބައްދަލުކުރަން އެދިފައިވަނީ ދަނޑުބިންތަކާއި ގުޅިގެން ހުރި ކަންބޮޑުވުންތައް ހައްލުކުރުމަށް ކަމަށާއި، ރޯދައިގެ ފަހުން ބައްދަލުކުރަން އެތައް ފަހަރެއްގެ މަތިން އެދުނު ނަމަވެސް މިހާތަނަށް ވެސް ކައުންސިލް ރައީސްއާއި ބައްދަލުކުރެވޭ ގޮތެއް ނުވި ކަމަށެވެ. އަދި ރައްޔިތުންގެ ކަންބޮޑުވުމެއް އޮތް ބޮޑު މައްސަލައެއް އޮއްވާ ކައުންސިލްގެ ރައީސް ދިޔައީ ޗުއްޓީ ނަގައިގެން ބޭރުގައި އޮތް ފެއަރއަކާއި، ގެސްޓްހައުސްއާއި ގުޅުންހުރި ކަންތަކެއްގެ ކަމަށެވެ. އަދި ރަސްމީ މަސައްކަތްތައް ފުނިޖެހިފައި ހުރިނަމަވެސް އެއިން އެއްވެސް މަސައްކަތެއް ނުކުރާ ކަމަށެވެ.

މީގެ އިތުރުން ގަވާއިދުން ބާއްވަން ޖެހޭ ރައްޔިތުންގެ ބައްދަލު ނުބޭއްވުމާއި، ރައްޔިތުންގެ ކަންބޮޑުވުންތަކާއި ގުޅިގެން ކައުންސިލްގެ ރައީސް ގެންދަވަނީ އަމިއްލަ މަސައްކަތްތައް ކުރަމުން ކަމަށް ރާއްޖެއެމްވީއާއި ވާހަކަ ދެއްކި މީހުން ވަނީ ބުނެފައެވެ.

ރާއްޖެއެމްވީއާއި ވާހަކަ ދެއްކި ތޮއްޑޫގެ ދަނޑުވެރިން ބުނެފައިވަނީ ކައުންސިލާއި ބައްދަލުކުރަން ދާން އެދިފައިވަނީ ކޮވިޑްގެ ތެރޭގައި އެއިރު ދަނޑުބިންތަކާއި ގުޅޭގޮތުން ހަދާފައި އޮތް އުސޫލު ބަދަލުކޮށްދިނުމަށް ކަމަށެވެ. އަދި ގަވާއިދާ ހިލާފަށް އުޅޭ ބިދޭސީން ދަނޑުހައްދާ މައްސަލަ ބޮޑުވެ ދަނޑުވެރިންގެ ކަންބޮޑުވުންތައް އެބަހުރި ކަމަށާއި، ބިންތައް ރަޖިސްޓްރީ ކޮށްގެން ލޯނު ނަގައިގެން ހިންގަން ކައުންސިލުން ބޭނުންވާތީ އެކަން އެގޮތަށް ކުރަން ރައްޔިތުން ބޭނުން ނުވާ ކަމަށެވެ.

މީގެ އިތުރުން ރޯދަ މަހުގެ ތެރޭގައި ކުރިން ބިންތައް ދޫކޮށްފައި އޮތް މުއްދަތު ހަަވެފައިވާ ކަމަށާއި، ރައްޔިތުން ބައްދަލުވުން ބާއްވަން އެދުމުން ފުރަތަމަ އެކަން ކުރަން ކައުންސިލްގެ ރައީސް ކަރަމް އެއްބަސްވެ ފަހުން އެގޮތަށް އެއްބަސްވީ މަޖަލަކަށް ކަމަށް ކައުންސިލްގެ ރައީސް ވިދާޅުވި ކަމަށެވެ. އަދި ބިންތަކުގެ މައްސަލައިގައި ކައުންސިލުން ގޮތެއް ނުނިންމާ، ރައްޔިތުންނާއި ދެކޮޅަށް ކައުންސިލުން ކަންކަން ނިންމަމުންދާ ކަމަށް ވެސް ވާހަކަ ދެއްކި ދަނޑުވެރިން ބުނެފައިވެއެވެ.

ކައުންސިލް އިދާރާ ބަންދުކޮށް ރައްޔިތުންގެ ބައްދަލުވުން ނުބާއްވަން ކައުންސިލުން ނިންމާފައިވާއިރު، އެ ސަރަހައްދުގައި ތޮއްޑޫގެ ގިނަ އަދަދެއްގެ ދަނޑުވެރިން ދަނީ ނުރުހުންފާޅުކޮށް އެއްވަމުންނެވެ.

މިކަމާއި ގުޅޭގޮތުން ތޮއްޑޫ ކައުންސިލްގެ ރައީސްގެ ބަހެއް ހޯދުމަށް ކުރި މަސައްކަތް ވަނީ ފޯނު ނުނެގުމުގެ ސަބަބުން ކާމިޔާބުނުވެފައެވެ.