ތުރުކީން އިޓަލީއާ އެއްވަރު ކޮށްފި
5 ޖޫން 2024 | ބުދަ 06:45މި މެޗަކީ، މި މަހު ޖަރުމަނުގައި ފަށާ ޔޫރޯ ފުޓުބޯޅަ މުބާރާތަށް ތައްޔާރުވުމުގެ ގޮތުން ކުޅުނު މެޗެއް
އިޓަލީ އާއި ތުރުކީން ކުޅުނު މެޗުގެ ތެރެއިން
ބައިނަލްއަޤުވާމީ ރަޙުމަތްތެރިކަމުގައި އިޓަލީއާ ދެކޮޅަށް ކުޅުނު މެޗު ތުރުކީން އެއްވަރު ކޮށްފި އެވެ.
އަންގާރަ ދުވަހުގެ ރޭ ކުޅުނު މި މެޗަކީ، މި މަހު ޖަރުމަނުގައި ފަށާ ޔޫރޯ ފުޓުބޯޅަ މުބާރާތަށް ތައްޔާރުވުމުގެ ގޮތުން ކުޅުނު މެޗެވެ. މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
އެންމެ ފަހުން 2020 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބު ކުރި އިޓަލީން ވަނީ، މި މެޗުގައި ރަނގަޅަށް ކުޅެ ލަނޑު ޖެހުމަށް މަސައްކަތް ކޮށްފަ އެވެ. މެޗުގައި އިޓަލީގެ ލޮރެންޒޯ ޕެލެގްރިނީ އާއި ފެޑެރިކޯ ޗިއެސާ އަށް ވަނީ ލަނޑު ޖަހާނެ ރަނގަޅު ފުރުސަތު ލިބި، ބޭކާރުވެފަ އެވެ. އަނެއްކޮޅުން ތުރުކީ އަށް ވެސް މެޗުގައި ލަނޑު ޖަހާނެ ފުރުސަތު ލިބުނެވެ. ތުރުކީން ވަނީ އިޓަލީގެ ގޯލަށް އަމާޒުކޮށް، ދެ ހަމަލާއެއް ވެސް ފޮނުވާލައިފަ އެވެ.
ޔޫރޯގައި ތުރުކީ ހިމެނިފައި އޮތީ ގުރޫޕް އެފްގަ އެވެ. މި ގުރޫޕުގައި ދެން އޮތް ތިން ޓީމަކީ، ޖޯޖިއާ، ޕޯޗުގަލް އަދި ޗެކް ރިޕަބްލިކް އެވެ. އިޓަލީ ހިމެނިފައި އޮތީ، ސްޕެއިން، ކްރޮއޭޝިއާ އަދި އަލްބޭނިއާ އާއެކު ގުރޫޕް ބީގަ އެވެ.
