ހަތް އަހަރަށް ފަހު ކޮންސެއިސާއޯ ޕޯޓޯ ދޫކޮށްލަނީ

ޕޯޗުގަލްގެ ޕޯޓޯ އަށް އިރުޝާދު ދެމުން އައި ސާޖިއޯ ކޮންސެއިސާއޯ އެ ކުލަބު ދޫކޮށްލަން ނިންމައިފި އެވެ.

އުމުރުން 49 އަހަރުގެ ކޮންސެއިސާއޯ ޕޯޓޯގެ ކޯޗުކަމާ ހަވާލުވީ 2017 ވަނަ އަހަރުގެ ޖޫން މަހުގެ ތެރޭގަ އެވެ. ހަތް އަހަރު ވަންދެން އެ ކުލަަބަށް އިރުޝާދު ދިނުމަށްފަހު، ކޮންސެއިސާއޯ ވަނީ އެ ކުލަބު ދޫކޮށްލަން ނިންމައިފި އެވެ.

ކޮންސެއިސާއޯ އެ ނިންމުން ނިންމީ، ޕޯޓޯގެ އިސްވެރިންނާއެކު ކުރިއަށް ގެންދިޔަ މަޝްވަރާތަކަށްފަހު އެވެ. ދެ ފަރާތުގެ ދެ މެދުގައި ކުރިއަށް ގެންދިޔަ މަޝްވަރާތަކަށްފަހު، ޕޯޓޯ އިން ވަނީ ކޮންސެއިސާއޯ އާއެކު ހަދާފައިވާ އެއްބަސްވުން އުވާލަން ނިންމައިފަ އެވެ.

އޭނާގެ އިރުޝާދުގެ ދަށުން ޕޯޓޯ އިން ވަނީ 379 މެޗު ކުޅެފަ އެވެ. އޭގެ ތެރެއިން އެ ޓީމުން ވަނީ 274 މެޗުން މޮޅުވެފަ އެވެ. 52 މެޗުން ބަލިވެފައިވާއިރު، 53 މެޗު ވަނީ އެއްވަރުވެފަ އެވެ. އެ މުއްދަތުގައި ޕޯޓޯ އިން ވަނީ 11 ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ޕްރިމެއިރާ ލީގު، ޕޯޗުގަލް ކަޕް، ޕޯޗުގަލް ލީގު ކަޕް އަދި ޕޯޗުގަލް ސުޕަ ކަޕް ހިމެނެ އެވެ.

ޕޯޓޯގެ ކޯޗުކަން ދޫކޮށްލަން ކޮންސެއިސާއޯ ނިންމާފައިވާއިރު، އޭނާ އަށް ފްރާންސްގެ މާސޭގެ ހުށަހެޅުމެއް ލިބިފައިވާ ކަމަށް މީޑިއާ ތަކުން ވަނީ ރިޕޯޓުކޮށްފަ އެވެ. ނަމަވެސް ޕޯޓޯގެ ކޯޗުކަން ދޫކޮށްލުމަށްފަހު، ދެން ހަވާލުވާނެ ވަކި ކުލަބެއް އަދި އޭނާ ނުނިންމާ ކަމަށް ވެސް ރިޕޯޓުތައް ބުނެ އެވެ.