ސަރުކާރުގެ ކުންފުނިތަކުގެ ހާލަތު ދަނީ ގޯހުން ގޯހަށް: އަމީރު

ސަރުކާރުގެ ކުންފުނިތަކުގެ ހާލަތު ދަނީ ގޯހުން ގޯހަށް ކަމަށް ކުރީ ސަރުކާރުގެ މާލީ ވަޒީރު އިބްރާހިމް އަމީރު ވިދާޅުވެއްޖެއެވެ.

ހޯމަ ދުވަހުގެ ރޭ ރާއްޖެޓީވީގެ ފަލަ ސުރުޚީ ޕްރޮގްރާމްގައި ރާއްޖޭގެ މިހާރުގެ މާލީ ހާލަތު އޮތް ގޮތާ ބެހޭ ގޮތުން ވާހަކަފުޅު ދައްކަވަމުން އަމީރު ވިދާޅުވީ، ކުންފުނިތަކުގެ މާލީ ހާލަތުވެސް ހިންގުމުގެ ހާލަތުވެސް ދުވަހެއް ދުވަހަކަށް ދަށްވަމުން އަންނަ ކަމަށެވެ.

އަމީރު ފާހަގަ ކުރެއްވި ގޮތުގައި ކުންފުނިތަކަށް ސިޔާސީ ގޮތުން އައްޔަން ކޮށްފައިވާ މީހުންގެ އަދަދު އިންތިހާ އަށް ވަނީ އިތުރުވެފައެވެ. ބައެއް ކުންފުނިތަކުގައި ސިޔާސީ ގޮތުން އައްޔަން ކޮށްފައި ތިބި މީހުން އެނޫން މުވައްޒަފުންނަށް ވުރެ އިތުރު ކަމަށާއި، އައްޔަން ކޮށްފައި ތިބި ބައެއް މީހުން ކުރާނެ މަސައްކަތެއްވެސް އިށީންނާނެ ތަނެއްވެސް ކުންފުނިތަކުގައި ނެތް ކަމަށެވެ.

އަމީރު ވިދާޅުވީ، އެމްޑީޕީ ސަރުކާރުގައި ސިޔާސީ މަގާމުތައް ގިނަ ކަމަށް އޭރު ވާހަކަ ދެއްކި އިރު، ތިބީ 700 އެއްހާ ސިޔާސީ މުވައްޒަފުން ކަމަށާ މިހާރު އެ އަދަދު 2000ން މައްޗަށް ހިނގައްޖެ ކަމުގެ ވާހަކަތައް އިވޭ ކަމަށެވެ.

އަމީރު ވިދާޅުވީ، ކުރީގެ އެއްވެސް ސަރުކާރަކުން ސިޔާސީ ކުލަ ނުޖައްސާ ހިންގަމުން އައި ބައެއް ކުންފުނިތައް ވެސް މިހާރު ފެންނަނީ ސިޔާސީ ވެފައިވާ ތަން ކަމަށެވެ. އެނާ ފާހަގަ ކުރެއްވި ގޮތުގައި، އެމްއޭސީއެލް، އެމްޕީއެލް، ބީއެމްއެލް އަދި އެމްޓީސީސީ ފަދަ ކުންފުނި ތަކަކީ ކުރިން ޕްރޮފެޝަނަލް ކޮށް ހިންގަމުން އައި ތަންތަން ކަމަށް ވިޔަސް މިހާރު އެފަދަ ކުންފުނި ތަކަށްވެސް ސިޔާސީ ގޮތުން މީހުން ލައި ސިޔާސީ ކޮށްފައިވާ ކަމުގެ ހިތްހަމަ ނުޖެހުން އެތަންތާނގައި މަސައްކަތް ކުރާ ޕްރޮފެޝަނަލް މުވައްޒަފުންވެސް ފާހަގަ ކޮށް އެކަމުގެ ޝަކުވާ ކުރަމުން އަންނަ ކަމަށެވެ.